8
O Iesu anundat a mugumugu na tene etabor una matok na kunubus
1 Iri a labino utna ra met sa wasiso pas uni: Anundat a mugumugu na tene etabor torom o God i sa kis una papor sot na laman a kiskis anun o God, a labino King sakit sapat netes una langit. 2 I papam torom o God sapat netes una langit una rumu anun o God. I ra, a rumu mulus anun o God, ra a Labino ut i pami ma awu sur a taro det pami.
3 A kum mugumugu na tene etabor rop torom o God, o God i ubek tar det sur det in pitar tar a kum etabor ma det in tun a kum wewegua sur a etabor toromi. Lenkutkai ra, o Iesu anundat a mugumugu na tene etabor in etabor nam tu utna sur in pam sot pas anun a pinapam na etabor torom o God. 4 Ra gunuk in kis nin upiso, ken tene etabor torom o God, uni a ramano kum tene etabor kuri ut det upiso, ra det ser pitar a etabor elar nama Warkurai anun o Moses. 5 Kol 2:17; Ibr 9:23A pinapam na etabor det ser pami una rumu na etabor, ra i elar kut nama malalar ina rumu kusapat una langit. Iri a kibino ra o God i utumarong o Moses, ra i waninar sur in pam a rumu na sel sur det in ser tun etabor uni. I watungi tano lena, “Tamtama wakak taru ut! Un pam a kum utna rop, elar ut nama malalar ina rumu ra a sa ese tar ui uni sapat netes una tangai.” Kis 25:40
6 Ibr 7:22Ikut o Iesu i sa los pas a pinapam na tene etabor ra i labo sakit taun a pinapam na etabor anun a kum tene etabor. Lenkutkai ra a kunubus ra o Iesu i sa pam sot pasi sur in dat tomo a taro nam o God, i labo sakit taun a mugano kunubus. A kibin a matok na kunubus i a kum liliman, ra det wakak sakit taun a kum mugano liliman.
7 Ra gunuk a mugano kunubus in tokodos sakit, katutaio in tamtama melet mo sur tu kunubus. 8 Jer 31:31-34Ikut o God i upuaso a niraro anun a taro ra i watungi lena,
“A Labino i watungi lena: Tama i, a kum bung in nanpat,
ra an pam a matok na kunubus
tomo nama taro Israel
ma a taro Juda.
9 Ken elar nama kunubus
ra a pami tomo nama kum tumtubun det
una bung ra a ben pirso pas det tagitong o Ijip,
uni ka det mur anung a kunubus,
ra a rosumur gusun det.
10 A Labino i watungi lena: Iri a kunubus ra an pami tomo nama taro Israel,
una kum bung numur.
An ubek tar anung a kum warkurai una nuknukin det,
ma an tumus tari unin balandet.
Ma iau a God anundet,
ma det anung a taro.
11 Ma det ra det paspasano,
ma det ra det tar tistisino,
ka det in ususer det etalai melet mo lenri,
‘Un tasman a Labino,’
uni det rop det sa tasman tar iau,
a kum lamlabino ma det ra ka di ulabo pas det.
12 Uni an unus ru anundet a kum niraro,
ma kan nuk melet pasi mo anundet a kum sakino petutna.” Jer 31:31-34
13 Ra o God i watung a kunubus ri “a matok na kunubus,” i talapor lena a mugano kunubus i sa turai. Ma asau ra i turai ma i sa suano i, milau sur in rorom.