2
A kakailai kai Ana
1 Ma Ana i ga kaile go ra kakailai na niaring:
A tulungeagu i pite pa ra Luluai,
A dekdekigu i tavua tai ra Luluai;
A ngiegu i manga pangapanganga tadav kaugu umana ebar
Tago iau gugu ure kaum valavalaun.
2 Pa ta tikai mulai i lia da ra Luluai;
Pa ta na i tur patuan da kada God.
3 Koko o una kolakolo mulai,
Ma koko una tibuna vavagia pa u.
Tago ra Luluai ia God, ma i kapa ure,
Ma nam iat ra tarai dia pait ia, ia iat i kure.
4 Ra panak kai ra tena ongor di bubur ia,
Ma i tul tar ra dekdek tai nina i malmalu.
5 Diat dia ga tar mamaur, dia papalum upi ra gem,
Ma diat dia mulmulum di tabar vakuku diat.
A biu na vavina i vatur vake a lavurua na natuna gori,
Ma tina i ra peal i taktakine ra umana natuna.
6 A Luluai i vardodoko, ma ra Luluai i vuna ta ra nilaun;
I vue tar ta umana ta ra babang na minat, ma i puak vatur diat.
7 A Luluai i varvaluveana, ma ra Luluai i varvauviana;
I vue tar ta umana ra pia, ma i vatut ta ra na.
8 I puak vatur ra lavur luveana kan ra tobon
Pi diat a ki marave ra umana luluai,
Ma i tabar diat ma ra umana kiki na minamar.
Tago ra Luluai i vatur vake ra lavur pagapaga ai ra rakarakan a gunagunan;
Ma i page ra rakarakan a gunagunan taun diat.
9 I balaure ra vinavana kai ra umana tena takodo,
Ma ra umana tena varpiam diat a virua ta ra bobotoi;
Tago pa ta tutana i rurung ma ra dekdekina iat.
10 A Luluai na vadidim vue kana umana ebar,
Nina i Lia Kakit ta ra bala na bakut na bubur gigi diat.
Ra lavur varkurai kai ra Luluai na kuvil taun ra lavur ngu na rakarakan a gunagunan par,
A Luluai na vadekdek kana king, ma na vangala pa nina i ga pilak pa ia.
11 Ma Elkana i ga lilikun uro Rama; ma ra bul i ga toratorom tai ra Luluai ta ra luaina mata i Eli ra tena tinabar.
Di tata na propet ure ra bartama i Eli
12 Ra ura natu i Eli, a ura tena varpiam. Pa dir ga nuk vangala pa ra Luluai, ma pa dir ga pait bulu kadir tiniba na tena tinabar. 13 Ba ta tika na tutana i ga tul tar ta tinabar, ra tultul kai ra tena tinabar i ga kapkap ra inging ta ra limana, nina ba a utul a ngiene tana. 14 ma i ga ing ra lavur mangana kabala nina di ga kabalane ra kirip tana, ma ra magit nina i ga ing pa ia, ra tena tinabar i ga kap ia upi ana. Damana di ga pait ia pire ra umana te Israel par nina dia ga pot upi diat a pait ra tinabar tadav ra Luluai abara Silo. 15 Maia pa, ba pa dia ga tun tar boko ra bira, ra tultul kai ra tena tinabar i ga pot, ma i ga ve ra tutana nina i pait ra tinabar ba na tul tar ra viono pire ra tena tinabar upi na tun ia, tago i mainge ra kalamana viono, ma vakir nam di tar kabalane. 16 Gala nam ra tutana i ga biti tana, Bea da tun value tar boko ra bira, ma namur una ga tak pa nam u mainge, gala i ga bali ia, Pata, una tul tar ia piragu go iat, ona pata, ina ra pa ia ka. 17 Ra varpiam kai ra ura barmana i ga manga bilak ta ra luaina mata i ra Luluai, tago a tarai dia ga nuk vaikilik pa nina di ga tul tar ia pire ra Luluai tana.
18 Ma Samuel i ga mong ma ra mal kumau, ma i ga toratorom ta ra luaina mata i ra Luluai; ma ia ra bul uka. 19 Ma ta ra kilakilala tinana i ga pait kana ta olovoi, ma ba dir ga pot ma kana tutana upi ra vartabar na kilala, i ga tul tar ia pirana. 20 Ba dir ga poapot Eli i ga tatata vadoane pa Elkana dir ma kana taulai, ma i ga bitbiti: Boina ba ra Luluai na tabatabar u ma ra umana bul tai go ra vavina, upi ta balbali ure kana vartabar pire ra Luluai; ma namur dir ga lilikun ta kadir gunan. 21 Ma ra Luluai i ga mari Ana, ma i ga lalau, ma i ga kava a utul a bul tutana ma a ura bul vavina. Ma natuna Samuel i ga taiak vanavana ta ra luaina mata i ra Luluai.
22 Ma Eli i ga tar patuana muka; ma ba i ga valongore ure ra ura natuna ma kadir mangamangana tadav Israel par, ma ure kadir nipo ma ra umana tena varbalaurai, a umana vavina, ta ra matakilalat ai ra pal na varbarat, i ga biti ta dir: 23 Ta ra ava amur pait ra dari? Iau tar valongore ure tai ta tarai par. 24 Ea, a ura natugu, a kaina varvai go nina ra tarai kai ra Luluai dia tatata tana. 25 Ona ta tika na tutana na pait ra varpiam tadav ta enana tutana, God na vamaram dir, ba ona ta tutana i pait ra varpiam tadav ra Luluai, to ia bar ba dir a tata ma ra Luluai ure? Ma pa dir ga mainge ba dir a valongore ra tinata kai tama i dir; ma ra Luluai i ga kure ba dir a mat.
26 Ma Samuel i ga taiak vanavana, ma ra varmari kai ra Luluai ma kai ra tarai bula i ga ngala vanavana pirana.
27 Ma tika na tutana kai God i ga pot tadav Eli ma go ra tinata kai ra Luluai: Ea, pa iau ga vaarike tar laka iau iat mulai tadav diat ta ra kuba i tamam, ba dia ga ki ka boko aro Aigipto, ma ba dia ga ki na vilavilau pire Parao? 28 Ma pa iau ga pilak pa ia laka kan ra lavur vuna tarai Israel upi kaugu tena tinabar, pi na tur maravai ta ra uguugu na vartabar, upi na tun ra varporong, ma pi na ule tar ra mal i gomgom ta ra luaina matagu? Pa iau ga tibe laka pire diat ta ra kuba i tamam ra lavur vartabar di tuntun tar ia kai ra tarai Israel upi ra adia nian? 29 Ta ra ava vang u vilie vake ke ra magit nina ba di tuntun tar ia tagu, ma ta ra ava u nur tar ika ra ura natum pi dir a lua tagu, ma pi amutal a tubu ta ra luaina matagu ma ra vuai e ta ra uma, nina ba ra tarai Israel dia tul tar ia? 30 Damana ra Luluai, ra God kai Israel i biti: Iau ga mainge ba diat ta ra kubam ma ra kuba i tamam, ba diat a ki ta ra vavai kaugu varvadoan pa na mutu; ma gori, ra Luluai i biti, I enana ra nuknukigu. Ina ru diat dia ru iau, ma da kulume diat dia nuk vakuku pa iau. 31 A bung na vut boko ma ina vadidim vanavana vue ra umana natum, ma ra umana natu i diat ta ra kuba i tamam, tuk pa ta patuana tutana na laun valili ta kaum apik na tarai; 32 ma ta kaum kini na malari una gire ra ko na kini nina ba ina ga tul tar ia pire Israel. 33 Ta tikai ta kaum apik na tarai na laun valili ure kaugu uguugu na vartabar. Ina valaun pa ia ka pi na gire go ma ra kiau na matana, ma dir a bilua ta ra nibobo, ma na malari ra balana. Ma ra ngala na papar a tarai ta ra kubam diat a virua ma ra pakat na vinarubu kai ra tarai. 34 Nam nina ba na tadav ra ura natum, Kopni ma Pinekas, na da ra vakilang piram; dir parika dir a mat ta ra kopono bung. 35 Ma ina vatut kaugu ta enana tena tinabar, a tena tinorom, nina ba na pait nam iau nuknuk ure, ma nina ba iau mainge. Ina vangala ta vuna tarai tana nina ba na tur vatikai, ma na vala ki bulu pire nina ba iau tar pilak pa ia. 36 Ma nina ba na laun valili ta ra kubam na vana tadav ia, ma na va timtibum pirana upi ta mani ma ta pakana gem, ma na biti: Pa una tul tar laka ta tiniba tagu, upi ina maravut ra tena tinabar, pi ina en ta ik a nian tana?