2
A Tokodo na Tulungen i ki taun diat
1 Ba ra bung na Pentekost i tar pot, diat par dia kiki vung tai tika na pal. 2 Ma ra rurunga marama ra bala na bakut dir varogop ma ra rurunga i ra ngala na vuvu ta, i kakaviai muka, i vut vakaian diat, ma i kor ta nam ra pal dia ki tana. 3 Ma dia gire ra umana karameme da ra iap, dia vana varbaiai ma dia ki taun diat par tikatikai. 4 Ma diat par dia buka ma ra Takodo na Tulungen, ma dia tata tavuna ma ra lavur enana tinata da ra Takodo na Tulungen i vateten tar ia ta diat.
5 Ma mangoro na Iudaia dia ki Ierusalem, diat a umana tena variru, maro ta ra gunagunan par ta ra vavai na bakut. 6 Ba dia valongore go ra rurunga, dia kor varurung, ma i purpuruan ra bala i diat i tana, tago dia vura valongore diat, dia vatavatang kadia lavur tinata iat. 7 Ma diat par dia kaian, ma dia kokonge, ma dia biti: Gire, go diat dia tata, vakir diat vang a umana te Galilaia par? 8 Ma dat par tikatikai da valongore davatane kada lavur tinata, di ga kava dat me? 9 Dat a Partoi, ma ra Medoi, ma ra Elamitai, ma diat dia ki Mesopotamia, a Iudaia ma ra Kapadokia, a Ponto ma ra Asia. 10 a Prigia ma ra Pampilia, a Aigipto ma diat marama ra papar a Libia maravai Kirene, ma ra umana vaira maro Rom, ma ra Iudaia, ma diat dia lolotu da ra Iudaia, 11 ma ra Kreta ma ra Arabia, da valongore diat par, dia varvai ta kada lavur tinata ta ra lavur dekdek na papalum kai God. 12 Ma diat par dia kaian, ma i purpuruan ra bala i diat, ma dia tir vargiliane diat ba: Ava go? 13 Ma ta umana dia varkulumai, ma dia biti ba: Dia maur ma ra kalamana vain.
A varvai kai Petero
14 Ma Petero i tur, ma diat bula ra vinun ma tikai, ma i manga tata, ma i biti ta diat: Avat a tarai Iudaia. ma avat par ava ki Ierusalem, avat a matoto ta go, ma avat a valongore kaugu tinata. 15 Ava biti, ba go diat dia papaua ta ra nimomo; ma pata, tago i tar lavuvat ika ra pakana bung na malana; 16 go ia ra magit ba ra propet Ioel i ga varvai ure dari:
17 “God i biti: Ta ra mutuaina
Ina lolongoi pa ta ra Tulungeagu taun ra tarai par,
Ma ra umana natu i vavat, a umana tutana,
Ma ra umana natu i vavat, a umana vavina, diat a tata na propet.
Ma kavava lavur barmana diat a giragire ra umana ninana,
Ma kavava umana patuana diat a ririvone ra umana ririvon;
18 Io, ma taun diat bula kaugu umana tultul na tutana;
Ma taun kaugu umana tultul na vavina, ta nam ra bungbung
Ina lolonge ra Tulungeagu, ma diat a tata na propet.
19 Ma ina ve tar ra umana magit na kinaian arama liu ta ra bakut,
Ma ra umana vakilang ta ra gunagunan ra pia;
A gap, ma ra iap, ma ra vual na mi;
20 A matana keake na bobotoi,
Ma ra gai na gap uka;
Ma ra bung kai ra Luluai na murmur,
A ngala na bung nam, a bung na kinaian;
21 Ma na dari, ia nam ba na kail upi ra iang i ra Luluai na ti laun.”
22 Avat a tarai Israel, avat a valongore go ra lavur tinata: Iesu, a te Nasaret, nina ra tutana, God i ga vakilang tar ia ta vavat ma ra lavur dekdek na papalum, ma ra lavur magit na kakaian, ma ra lavur vakilang, God i ga papait ia tana pire vavat, ma avat bula ava ti nunure; 23 nina di ga ongo tar ia, da God i ga kubu ia ta kana mamainga ma i ga nunure value, ava ga ot ia ta ra bolo, ma, ava ga doka ma ra lima i ra tarai vakuku; 24 ma God i ga vatut pa mule ba i tar pala vue ra kinadik na minat, tago ra minat i mama vake. 25 Tago David i ga tatike ure dari:
“Iau ga gire vatikene ra Luluai ta ra luaina matagu,
Tago i ki ta ra limagu tuna upi koko ina dadadar;
26 Kari i ga ra balagu, ma ra karameagu i gugu,
Ma ra pakagu bula na ki nunur,
27 Tago pa una nur vue ra tulungeagu ta ra ruarua na tulungen,
Ma pa una tul tar kaum Gomgomuna upi na nunure ra mareng na minat.
28 U tar vateten iau ta ra umana nga na nilaun;
Una vabuka iau ma ra gugu ta ra matam.”
29 A tara na turagu, ina tata kapa ta vavat ure David, tama i dat lualua, ba i ga mat, ma di ga punang ia, ma kana babang na minat i ki pire dat gori. 30 Tago i ga propet, ma i nunure ba God i ga vatang ia ma ra vavalima, ba na vaki tika na natuna ta kana kiki na king, 31 i nunure value go, ma i vatang ia ure ra nilaun mulai kai Kristo, ba pa di ga nur vue ara ra ruarua na tulungen, ma ra pakana bula pa i ga mareng. 32 God i ga valaun pa go Iesu, ma avet par ave ga giragire. 33 Ma ba di ga vaki ia urama ta ra lima i tuna God, ma tago i ga vatur vake bula ra vamading tai Tamana, ure ra Takodo na Tulungen, go i tar lolonge nina ava ti gire ma ava ti valongore. 34 Tago David pa i ga vana urama ra bala na bakut, tago ia iat i ga biti dari:
“A Luluai i ga tatike tai kaugu Luluai: Una ki ta ra limagu tuna,
35 Tuk ta nam ra bung ba ina vadiop kaum lavur ebar upi ra ruarua na kakim.”
36 Boina ba ra kuba i Israel parika na nunure bulu, ba nam Iesu ava ga ot ia ta ra bolo, God i tar vaki ia upi na Luluai ma na Kristo bula.
37 Ba dia valongore go, i pinpidian ra bala i diat, ma dia tir Petero, diat ma ra umana apostolo, dari: A tara na tura i vevet, ava avet a pait ia? 38 Petero i biti ta diat: Avat par, tikatikai, avat a nukpuku, ma da baptaiso avat ta ra iang i Iesu Kristo, upi da pun vue kavava lavur varpiam, ma da tabar avat ma ra Takodo na Tulungen. 39 Tago di ga tatike go ra tinata tadav avat, ma tadav ra lavur natu i vavat, ma ta diat maro vailik bula, tadav avat par, ba God na oro pa avat pirana. 40 Ma mangoro na tinata bula i ve diat i tana, ma i vargat diat me dari:
Avat a valaun avat kan go ra taun tarai i gegagege. 41 Ma di baptaiso diat, dia kapupi kana tinata; ma di luk ra tarai dia tar agil diat ta nam ra bung, ba ra utul a arip na marmar. 42 Ma dia tur patuan vatikai ta ra vartovo kai ra umana apostolo, ma ta ra kini na varmari vargil, ma ta ra tabik gem, ma ta ra niaring.
A kini guvai kai ra umana tena nurnur
43 Ma ra tarai par dia burburut, ma ra umana apostolo dia pait mangoro na magit na kinaian, ma mangoro na vakilang bula. 44 Ma diat dia tar nurnur, dia vura ki guvai, ma dia vung guve kadia vurvur magit; 45 ma dia ivure kadia vurvur magit, ma dia tibe diat par me tikatikai da kadia niiba. 46 Ma ra bungbung diat par dia kiki vatikai ta ra pal na vartabar, ma dia tabik gem ta ra kubakuba i diat, ma dia ian ma ra gugu ma ra dovot na maukua i diat, 47 dia pite pa God, ma dia varmaram ma ra tarai par bula. Ta ra bungbung par ra Luluai i agagure vot i tar ta diat ma nina diat, di valavalaun pa diat.