1 A mamat na tinata ure ra magit ra propet Kabakuk i ga gire.

2 Luluai, aivia ra bung boko ina kakail, ma pa u torom? Iau tangi tadav u ure ra kaina mangamangana, ma pa u varvalaun. 3 Ta ra ava u vaarike tar ra bilak na mangamangana tagu, ma ta ra ava iau gire ra mangamangana gegagege? Tago a vinarubu ma ra varvakadik dir tur ta ra luaina matagu; iau gire ra varngangar, ma ra vartoto i vana rikai. 4 Kari di tar talanguan ta ra vartovo, ma ra takodo na varkurai pa i ongor; tago ra tena varpiam i vartakalat bat ra tena takodo, kari di vaarike varara ra varkurai.

5 Avat a gire pire ra lavur vuna tarai, ma avat a nuk pa ia, ma avat a kakaian tuna; tago di pait tika na magit ta kavava e, ma gala da ve avat i tana, gala pa avat a kapupi ia. 6 Tago iau vatut ra tarai Kaldea, nam ra vuna tarai ba a umana tena karangap ma ra umana tena ngarangara diat, diat dia vana alalu ta ra rakarakan a gunagunan upi diat a kale ra umana gunan ba vakir kadiat. 7 Dia varvaburut, ma ra tarai dia dadadar ta diat; kadia varkurai ma kadia kini na ruru i vuna ta diat iat mulai. 8 Kadia lavur os dia vutvut na kaia, ma ra lepad*A lepad, a mangana leing da ra ngala na pusi, a tena varkarat. pata, ma dia karangap tuna ta ra umana leing na pap ba dia rovoi ra ravian; ma kadia tarai ba dia ki ra os dia papait na luluai; maia, kadia umana tena ki os dia vut maro vailik, dia vutvut da ra luar upi na ian. 9 Dia vut par upi diat a vakavakaina; a mata i diat i gigira dekdek upi ra papar a taur; ma dia varurue ra umana vilavilau da ra veo. 10 Maia, i kulume ra umana king, ma ra umana luluai dia da ra magit na vargi pirana; i nongone ra lavur dekdek na pal na bakbakit par, tago i kal varurue ra pia ma i ongor pa diat. 11 Namur i kakavie da ra vuvu, ma i vana alalu, ma i rara; go ra dekdekina i da kana god.

12 Luluai, kaugu God, kaugu Lia Kakit, vakir u papa ania iat vang? Pa avet a virua. Luluai, u tar togue upi na varkurai; ma u, ra Vat Ki, u tar vatur ia upi ra varvatakodo. 13 A matam i gomgom tuna, ma i dekdek upi una gire ung ra kaina, ma i dekdek upi una bobe ra mangamangana gegagege, io, ta ra ava u gire ung diat dia vavagu, ma u ki mut uka ba ra tena varpiam i konom tikai ba i manga takodo ta dir? 14 U vardadane ra tarai ma ra en ika ara na ta, ma ra lavur magit dia kakakao ra pia, ba pa ta luluai i ki pire diat. 15 I il vapar diat, i voare pa diat ma kana ubene, ma i al varurue diat ma kana ubene na alal; kari i gugu ma i ga. 16 Kari i vartabar tadav kana ubene, ma i tun ra magit i ang na katkat tadav kana ubene na alal; tago ure dir kana tiniba i ngala, ma ra ana nian i bira. 17 Dave, na al pupule kana ubene, ma na ubu vatikene pa ra lavur vuna tarai, ma pa na mari diat?