2 Avat a pite pa ra Luluai,

Tago ra umana luluai dia ga lue rap Israel,

Ma ra tarai iat dia ga tul tar diat ma ra gugu.

3 A umana king, avat a valongore; a umana luluai, avat a kapupi ia;

Ma iau ina kakailai tadav ra Luluai;

Ina kakailai na pite varpa tadav ra Luluai ra God kai Israel.

4 Luluai, ba u ga vana rikai maro Seir,

Ba u ga vana pa kan ra langun Edom,

A rakarakan a gunagunan i ga dadadar, ma ra bala na bakut i ga tua,

Maia, a umana bakut dia ga tua ma ra tava.

5 A umana lualuana dia ga guria ta ra luaina mata i ra Luluai,

Maia pa, Sinai iat i ga damana ta ra mata i ra Luluai ra God kai Israel.

6 Ta ra e kai Samgar natu i Anat,

Ta ra e kai Iael, pa ta na i ga tur ta ra umana nga tur,

Ma ra umana tena vinavana dia ga vana irai ta ra umana nga ra pui.

7 Pa ta tena varkurai i ga ki Israel, dia ga tar ngo par,

Tuk tar ba iau Debora iau ga tut rikai,

Ba iau ga tut, nina ba iau ga varvangala livuan tai Israel.

8 Dia ga pilak pa ra umana kalamana god;

A vinarubu i ga tur ta ra umana mataniolo;

Dave vang, di ga gire ta bakbakit ba ta rumu

Pire ra ivat na vinun na arip na marmar na tarai dia ga ki Israel?

9 A balagu i malamalapang upi ra umana luluai Israel,

Nina dia ga tul tar diat ma ra gugu livuan pire ra tarai Israel;

Avat a pite pa ra Luluai.

10 Avat ava ki ta ra umana as dia pua,

Avat ava ki ta ra umana bo na kurit dia ngatngat muka,

Ma avat ava vanavana ka ta ra nga, avat a varvai ure.

11 Ta ra gunan ba pa di valongore ra nilai ra umana tena panak, ma ba di kulupe ra tava tana,

Ta nam iat ra pakana diat a varvai ure ra lavur bo na papalum kai ra

Luluai,

Maia pa, ra lavur bo na magit i pait ia ba i kure Israel.

Ma ra tarai kai ra Luluai dia ga vana ur tadav ra umana mataniolo.

12 Tavangun, una tavangun, Debora;

Tavangun, una tavangun, kaile ta kakailai;

Una tut rikai, Barak, ma una ben vavilavilau kaum umana vilavilau, u natu i Abinoam.

13 Ma diat dia ga ki valili ta ra umana luluai, ma ra tarai dia ga vana ur;

Ra Luluai i ga vana ba upi amir a kure ra umana lebe.

14 Dia ga vana rikai kan Epraim upi uro ra malamale,

Ma Beniamin i ga mur u tana livuan ta kaum vuna tarai;

A umana tena varkurai dia ga pot maro Makir,

Ma diat dia vatur vake ra buka kai ra lualua na tena vinarubu dia ga pot maro Sebulun.

15 Ma ra umana luluai Isakar dia ga tur maravut Debora,

Ma Barak bula i ga maravut varogop ma Isakar;

Dia ga vutvut tadav ia ta ra bala na male;

Maravai ra umana tava alir kai Ruben

Dia ga vavalima tana.

16 Ta ra ava u ga ki livuan ta ra umana kikil na sip,

Upi una valongore ra umana kaur na vuvu nina di ga ororo ra sip me?

Maravai ra umana tava alir kai Ruben dia ga nuknuk vatikene pa ia ta ra bala i diat.

17 Gilead i ga ki ta ra papar a tava Iordan maro;

Ma Dan, ta ra ava i ga ki ta ra bala i ra umana parau?

Aser i ga ki ka ta ra olaolo na ta,

Ma i ga bang maravai ta kana umana tava.

18 A tarai Sebulun dia ga nuk vaikilik pa kadia nilaun, ma dia ga tul tar diat mulai upi ra minat.

I ga damana bula ma Naptali ta ra bala na kamara ba pa ta bakbakit tana.

19 A umana king dia ga pot, ma dia ga varubu;

A umana king Kanaan dia ga varubu,

Ta ra gunan Tanak maravai ta ra tava Megido,

Ma pa dia ga kale ta tabarikik tana.

20 A bala na bakut i ga ebar ma diat,

Ra umana tagul dia ga tut ure Sisera.

21 A tava alir Kison i ga kap vue diat,

A tava alir Kison iat, nina i ga ki papa amana iat.

Ea, a tulungeagu, una ongor ta kaum vinavana.

22 A umana kau i ra umana os dia ga ruarua ra pia,

Dia ga ruarua ra pia ba dia vilau.

23 Na kaina piram Meros, ra angelo kai ra Luluai i ga biti,

Da tata vakaina ra tarai dia bang tana;

Tago pa dia ga maravut ra Luluai,

Pa dia ga maravut ra Luluai ba i ga varubu ma ra umana lebe.

24 Ma Iael na ti doan muka ta ra vaden par,

Ra taulai kai Keber ra te Ken,

Na ti doan muka ta ra vaden par ta ra umana pal na mal.

25 I ga lul upi ta tava ka, ma i ga tabar ia ma ra polo na u;

I ga tabar ia ma ra bira na polo na u ta ra ngatngat na la.

26 I ga vatur vake ra ot,

Ma ra limana tuna i ga vatur vake ra tututuk kai ra tena papalum;

Ma i ga ubu Sisera ma ra tututuk, ma i ga vila vurpu ta ra uluna,

Maia, i ga go ra papar a talingana.

27 Ta ra ruarua na kauna i ga bura timtibum, i ga bura muka ma i ga va,

Ra minatina i ga va ta nam iat ra pakana i ga bura timtibum tana.

28 I ga tur ta ra mata na kalangar, ma i ga gigira ma i ga tangi,

Tina i Sisera i ga oraoro ta ra ubene ai ra mata na kalangar,

Ta ra ava kana kiki na vinavana i vabing mat?

Ava i tur bat ra umana.vil ta kana kiki na vinavana?

29 Kana umana tena kabinana, a umana vavina, dia ga bali ia,

Maia, ia iat i ga bali mule kana tinir,

30 Dave, pa dia ga tikan boko ra tabarikik vang, ma vakir laka dia ga tibe?

Tikatika na tutana tika na vavina, maia pa, a uraura vavina kai tikatikai;

Ma pire Sisera a tabarikik i matatar, a minong,

A matatar na minong di ga viri ia,

A ura pakana matatar na mal di ga viri ia ure ra kongkongigu.

31 Boina, Luluai, ba kaum lavur ebar diat a panie,

Ma diat dia mari u diat a varogop ma ra keake ba i vana rikai ta ra dekdekina.