1 Ma ra tiniba di ga padapadailam pa ia ba kai ra tarai Iosep, i ga tur pa ia ta ra Iordan aro Ieriko, ta ra tava kai Ieriko ta ra papar a taur, ma i vana ta ra bil nina i tur pa ia aro Ieriko ma i alalu ta ra gunan i lualuana upi na tadav Betel; 2 ma i vana rikai maro Betel ma i tadav Lus, ma i bolo tadav ra langun kai ra tarai Ark ma i tuk aro Atarot; 3 ma i kuba mur ra matana taoai ma i tadav ra langun kai ra tarai Iaplet, ma i tuk tar ta ra langun Bet-Koron nina i ki ara, ma i tadav Geser, ma i tuk tar ta ra ta.

4 Ma ra umana natu i Iosep, a tarai Manase ma Epraim dia ga kale kadia tiniba.

5 Ma ra langun kai ra tarai Epraim varogop ma kadia lavur apik na tarai i ga dari: a langun ure kadia tiniba ta ra papar a taur i ga tur pa ia aro Atarot-Adar ma i ga tuk tar Bet-Koron nina i ki arama; 6 ma ra langun i vana rikai upi ra taoai maravai Mikmetat ta ra papar a labur; ma ra langun i vana likun ma i mur ra matana taur ma i tadav Tanat-Silo, ma i pakit Ianoa ta ra papar a taur tana; 7 ma maro Ianoa i kuba ura Atarot ma Nara, ma i tuk tar uro Ieriko, ma i vana rikai ta ra Iordan. 8 Maro Tapua ra langun i mur ra matana taoai tadav ra tava alir Kana, ma ra ta a mutuaina. Go ia ra tiniba kai ra vuna tarai Epraim varogop ma kadia lavur apik na tarai, 9 varurung ma ra umana pia na pal nina di ga tibe vaire diat upi kai ra tarai Epraim livuan ta ra tiniba kai ra tarai Manase, a lavur pia na pal ma kadia lavur gunan ik. 10 Ma pa dia ga korot vue ra tarai Kanaan nina dia ga ki Geser; a tarai Kanaan dia ki livuan ta ra tarai Epraim tuk tar ta ra bung gori, ma dia ki na tultul uka.