A BUK KAI PAULO RA APOSTOLO TADAV PILEMON
1
Paulo, di tar vi ia ure Kristo Iesu, ma Timoteo tura i vevet, tadav Pilemon, nina ave mari ia, ma kaveve tena maramaravut, ma tadav Apia a tai vevet, ma Arkipo a talai vevet ta ra vinarubu, ma tadav ra ekelesia ta ra kubam: A varmari tadav avat ma ra malmal tai God, Tama i dat, ma ra Luluai Iesu Kristo.
A varmari ma ra nurnur kai Pilemon
Iau pite varpa tadav kaugu God, ma iau vatang vatikene u ta kaugu niaring, tago iau tar valongore ure kaum varmari, ma kaum nurnur ta ra Luluai Iesu, ma tadav ra umana tena gomgom par bula; upi ra kiki na maramaravut i kaum nurnur na ongor muka, ta ra kabinana ure ra lavur magit par nam i ki tam tai Kristo. Tago i ngala kaugu gugu ma kaugu ningo ure kaum varmari, turagu, tago u tar valagar pa ra bala i diat ra umana tena gomgom.
A nilul ure Onesimo
Io, a dovotina, i takodo piragu tai Kristo upi ina vartuluai piram ma ra magit i topa ia, ma iau lul vovo pa u ka ure ra varmari, tago iau Paulo ra patuana, ma go di tar vi iau ure Kristo Iesu; 10 iau lul vovo pa u ure natugu, Onesimo, nina iau tar vangala ta ra agu vivi, 11 nina ba amana pa i ga topa ta magit piram, ma go i topa u, ma i topa iau bula; 12 ma iau tulue mule piram, i da iau tulue ra balagu iat; 13 iau ga mainge ke ba na ki piragu, upi na pait kaum papalum piragu ta go ra vivi na bo na varvai; 14 ma pa iau ga mainge ba na pait ia, tago pa iau ga nunure boko ra nuknukim; upi koko kaum varmari na da ra magit da vovo pa ia, ba na da ka ra magit u ga upi ia. 15 Kan go bar i ga vana boko kan u tana, upi una vatur vatukum vake; 16 vakir da ra vilavilau mulai, na lia ta diat ra umana vilavilau, da a vakak na turam, i vakak muka piragu, ma i manga vakak piram, ure ra palapakana ma ta ra Luluai bula. 17 Ona u nuk pa iau ba dor varbete, una vatur vake, ma na da u vatur vake iau. 18 Ba i tar vakaina u, ba kana ta kinail piram, una luk tar nam tagu; 19 iau Paulo, iau tar tumu ia ma ra limagu iat, ina bali ia; ma pa iau biti tam, ba pa u ga bali u boko tagu. 20 Maia, turagu, boina ba ina gugu ure u ta ra Luluai; una valagar pa ra balagu tai Kristo. 21 Iau ga tutumu piram tago iau nurnur ta kaum tinorom. ma iau nunure ba una pait lake bula nam iau tar vatang ia. 22 Ma una vaninare bula ta tika na pal upi ina va tana; tago iau nuk ia ba da tul tar iau ta vavat ure kavava niaring.
A mutuaina tinata na varvagai
23 Epapras nina di ga vi ia bula ure Kristo Iesu, i vatatabe u; 24 ma Marko ma Aristarko, ma Demas, ma Luka, ra umana talaigu ta ra papalum.
25 A varmari kai kada Luluai Iesu Kristo na ki ta ra tulungeam. Amen.