12
1 Nina i mainge ra varvateten i mainge ra kabinana,
Ma nina i milikuane ra varpit i tuptup uka.
2 A Luluai na manane ra bo na tutana,
Ma na kure vakaina ra tutana ba i bilak ra nuknukina.
3 Pa ta tutana na ki padikat ure ra bilak na mangamangana,
Ma ra vunapai ra tena takodo pa na takari muka.
4 A vavina ba i gomgom kana mangamangana i da ra kere na minamar ta ra ulu i kana tutana,
Ma nina i pait ra magit na vavirvir i da ra maroto ta ra uruna.
5 A nuknuk i ra umana tena takodo i ko,
Ma ra varvateten kai ra umana tena varpiam i vaongo ko.
6 A tinata kai ra umana tena varpiam i kobot upi ra gap,
Ma ga ra ngie i ra umana tena takodo na valaun diat.
7 Di vue pukue vue ra umana tena varpiam, ma dia panie,
Ma ga ra kuba i ra umana tena takodo na tur uka.
8 Di pite pa tikai varogop ma kana kabinana,
Ma di pidimuane ke nina i gegagege ra balana.
9 Nina di ru ia a ik ika, ma tika na tultul i ki pirana, i boina,
Ma pa i boina ba tikai i ru mule, ma i iba upi ra nian.
10 A tena takodo i mari kana vavaguai,
Ma ga ra bala i ra tena varpiam i varvakadik.
11 Nina i palum kana pia na uma na varurue ra ngala na magit na nian,
Ma ga nina ba i murmur ra mangamangana vakuku i papaua.
12 A bilak na tutana i mainge ba na pait ra kaina,
Ma ga ra okor i ra tena takodo i vuai.
13 Ba i rara ra ngie i ra tutana i da ra palai pirana,
Ma ga ra tena takodo na langalanga kan ra purpuruan.
14 A tutana na maur ma ra boina ure ra vuai ra ngiene,
Ma ra magit ba ra lima i tikai na pait ia da bali ia pirana.
15 A papaua i nuk ia ba i takodo kana nga,
Ma ga nina i kabinana i kapupi ra varvateten.
16 A kankan kai ra lunga i po rikai muka,
Ma ga ra tutana i matoto i ive ra magit na vavirvir.
17 Nina i tatike ra dovotina i vaarike ra mangamangana takodo,
Ma ra kaina tena varvai i vaongo.
18 Nina i lulut kana tinata i varvakinkin da ra pakat na vinarubu,
Ma ra karamea i ra tena kabinana i varvalagar.
19 A ngia i dovot na tur pa na mutu,
Ma ra karameme ba i vaongo i panie lulut.
20 A vavagu i ki ta ra bala i diat dia varpit upi ra kaina,
Ma diat dia tata rangup upi ra malmal dia gugu.
21 Pa ta kaina magit na tadav ra tena takodo,
Ma ga ra tena varpiam na tup ia.
22 A Luluai i milikuane ra ngia i vaongo,
Ma ga diat dia pait ra dovotina i manga gugu ta diat.
23 A tutana i minana i ive kana kabinana,
Ma ga ra nuknuk i ra umana papaua i varvarvai ta ra magit na papaua.
24 A lima i ra tena ongor na vatur vake ra varkurai,
Ma ga ra tabauma na ki na vilavilau.
25 A nginarao i vuna ba i mamat ra nuknuk i ra tutana,
Ma ra bo na tinata i vagugu ia.
26 A tena takodo i rap bulu talaina,
Ma ga ra mangamangana kai ra tena varpiam i varara diat.
27 A tabauma pa i rove pa ta magit,
Ma ga ra tena ongor na vatur vake ra ngatngat na tabarikik.
28 Da na tadav ra nilaun ta ra nga na mangamangana takodo,
Ma ra minat pa i tur ta kana pal a nga.