1 Ra Luluai i ngala, ma: i ko tuna upi da pite pa ia,

Ta ra pia na pal kai kada God, ta kana luana gomgom.

2 A luana Sion a kaliana, i tuluai urama liu, a rakarakan a gunagunan par i gugu tana,

Ra ngungu aro iat ta ra papar a labur, a dekdek na pia na pal kai ra ngala na king.

3 God i vaarike mule ta diat dia ki ta ra lavur pal na luluai tana, ba ia iat a dekdek na pal na bakbakit.

4 Ea, tago ra umana king dia vana varurung,

Dia tar bolo lake varurung.

5 Dia gire, ma dia kaian tuna;

I bilua ra nuknuk i diat ma dia kavie ra nilop.

6 A nidadar i tadav diat ie;

A kinadik da i tadav ra vavina ba i kakava.

7 U pamapamar ra umana parau maro Tarsis

Ma ra vuvu na taubar.

8 Da ave valongore, damana ave tar gire

Ta ra pia na pal kai ra Luluai kai ra lavur kor, ta ra pia na pal kai kada God;

God na vatur vapadikat ia, ma pa na mutu. Sela.

9 God, ave tar nuk pa kaum varmari,

Livuan ta kaum pal i gomgom.

10 God, da ra iangim i tuk tar ta ra mutuai ra rakarakan a gunagunan,

Damana bula ra pite varpa tadav u;

A limam tuna i takodo kakit.

11 Boina ba ra luana Sion na ga,

Ma ra umana pia na pal Iuda diat a manga gugu

Ure kaum lavur varkurai.

12 Avat a vana vurvurbit ta ra gunan

Sion, ma avat a vana kikil ia;

Avat a luk guve kana lavur dekdek na pal na minakila.

13 Avat a gire bulu kana dekdek na liplip na balada,

Avat a nuk pa kana lavur pal na luluai;

Upi avat a ve ra taun tarai namur.

14 Tago dari God, kada God pa na mutu;

Na agagure vatikene pa dat.