74
A niaring pire God upi na valaun pa kana tarai
A mari na kakailai kai Asap.
God, ta ra ava u ga okole vakakit vue avet?
Ta ra ava kaum kulot i vuvuvul ure kaum kikil na sip, nina u tabatabar ia?
Una nuk pa kaum tarai, diat u kul pa diat amana,
Diat u ga valaun pa diat upi diat kaum vuna tarai.
Una nuk pa bula ra luana Sion, nina u tar ki ie.
Una vutvut tar ta ra gunan di ga nila vatukum vue,
A ebar i tar pait ra lavur magit i kaina ta kaum pal i gomgom.
 
Kaum lavur ebar dia tar kukula livuan ta kaum pal na kivung,
Dia tar vatur kadia lavur vakilang tana;
Dia da ra tarai ba dia kap ra pem,
Ma dia bual ra makur a davai.
Ma go dia mut vakaina ra lavur davai par tana ba di ga poko mal ia,
Dia mut diat ma ra kalangar ma ra tututuk.
Dia tar vabirao kaum pal tabu;
Dia tar re vakaina vue ra kuba i ra iangim.
A nuknuk i diat dari: Boina ba dat a re vapar vue diat;
Dia tar tun.vue ra lavur pal na kivung kai God ta ra gunan.
 
Pa ave gire mule kaveve lavur vakilang,
Pa ta propet mulai i ki;
Ma pa ta na ati pire vevet ba i nunure ba na tuk vingaia.
10 God, aivia ra bung boko ra ebar na varkulumai?
Dave, ra ebar na vul vatikene pa bar ra iangim?
11 Ta ra ava u tak vue ra limam kan avet, a limam tuna iat?
Una tulue vaarike, ma una vamutue diat.
 
12 Ma God kaugu King papa amana iat;
I ongaongor ma ra valavalaun ta ra rakarakan a gunagunan.
13 U ga tibe varbaiane ra ta ma ra dekdekim;
U ga pamar gigi ra ulu i ra pukpuk ta ra tava.
14 U ga pamar gigi ra ulu i ra konakonom,
U ga tul tar ia pire ra tarai dia ki ra pupui, upi ra adia nian.
15 U ga kita pelegi ra vat i ta upi ra lovon na alir tavit tana,
U ga rang vamama ra umana tava alir, ma lua dia ga tavit vatikai.
16 Kaum ra keake, ma kaum bula ra marum,
U ga vaki ra kapa ma ra matana keake.
17 U ga pait ra langlangun na rakarakan a gunagunan par,
U ga pait ra e na taubar ma ra e na labur.
 
18 Luluai, una nuk pa ia, tago ra ebar i tar varkulumai;
Ma ra umana papaua dia tar vul ra iangim.
19 Koko una tul tar kaum vakak na uka ta ra umana leing.
Galiaka una valubane vatikene vue kaum malari na tarai.
20 Una nuk pa ra kunubu;
Tago ra lavur pakapakana gunan na bobotoi dia kor ma ra vinarubu.
21 Galiaka una tul vavirvir vue diat di arung bat diat;
Boina ba diat dia malari ma dia luveana diat a pite pa ra iangim.
 
22 God, una tut, una tata vovo ure kaum papalum iat,
Una nuk pa ra umana pepel, tago dia vul u a bungbung par.
23 Koko una valubane ra tinata kai kaum lavur ebar;
Ma kadia varvareo dia tut ure u i tubang rikai vatikai.