1 Luluai, u ga mari kaum gunan;

U ga vakedek mule ra tarai Iakob.

2 U ga pun vue ra varpiam kai kaum tarai.

U tuba kadia lavur nirara. Sela.

3 U tur bat kaum kulot par;

U vung vue kaum dekdek na kankan.

4 Una lingan upi avet, God kaveve tena valaun,

Ma una tigal bat kaum kankan tadav avet.

5 Dave, una kankanuane avet vatikai vang?

Dave, una kankanuane ra lavur taun tarai par?

6 Dave, pa una valagar pa mule avet,

Upi kaum tarai diat a gugu tam?

7 Luluai, una vaarike kaum varmari ta vevet,

Ma una tul tar kaum valavalaun ta vevet.

8 Ina valongore, ra tinata kai ra Luluai God;

Tago na tatike ra tinata na malmal tadav kana tarai, ma tadav kana lavur tena lotu; la kaka, koko diat a lilikun tadav ra mangamangana papaua mulai.

9 A dovot kana valavalaun i maravai pire diat dia ru ia.

Upi ra minamar na ki ta kada gunan.

10 A varmari ma ra dovotina dir ga varkuvo,

A mangamangana takodo ma ra malmal dir ga vargalum.

11 A dovotina i gol ta ra gunagunan,

Ma ra mangamangana takodo i gigira ba marama ra bala na bakut.

12 Maia, ra Luluai na tul tar ra magit i boina;

Ma kada gunan na vuavuai.

13 A mangamangana takodo na lua tana,

Ma na mal ra pal a kauna upi ra nga.