1 Avat a pite pa ra Luluai.

Tago i kat ba da kakailai tadav kada God;

Tago ia ra tena varmari, ma ra pite varpa i topa ia muka.

2 Ra Luluai i vatavua Ierusalem;

I ben varurue ra tarai Israel, diat di ga korot varbaiane vue diat.

3 I valagar pa diat i takunuan ra bala i diat,

Ma i pulu kadia lavur kinkin.

4 I luk valar pa ra lavur tagul,

Ma i vatang valar pa diat par ma ra iang i diat.

5 Kada Luluai i ngala tuna, ma i dekdek muka;

Pa ta langun ta kana minatoto.

6 Ra Luluai i maravut diat i madu ra bala i diat;

Ma i vaki vaba ra umana tena varpiam ura ra pia iat.

7 Avat a kakailai tadav ra Luluai ma ra pite varpa,

Avat a pite pa kada God ma ra pagol;

8 Nina i vaki ra umana bakut ta ra maup,

I vaninare ra bata ure ra rakarakan a gunagunan,

Ma i vatavua ra vura ta ra lualuana;

9 I tabatabar ra umana leing ma ra adia nian,

Damana bula ra umana nat na kotkot ba dia tangtangi.

10 Pa i gugu ta ra dekdek i ra os,

Pa i ga ta ra ngala na kak i ra tarai;

11 I gugu ka ta diat dia ru ia,

Ta diat dia nurnur ta kana varmari.

12 Ierusalem, una pite pa ra Luluai;

Sion, una pite pa kaum God.

13 Tago i tar vapadikat ra lavur okobat ta kaum umana matakilalat.

I tar vadoane ra umana natum piram.

14 I tul tar ra malmal ta kaum langlangun,

I tabar vamaur u ma ra kon i manga tubu.

15 I tulue vaarike kana vartuluai ta ra rakarakan a gunagunan;

Kana tinata i vutvut tuna.

16 I tul tar ra bata i pua da ra kabang;

I vue imimire ra mavoko da ra kabu;

17 I vue vaarike kana bata i dekdek da ra umana tagigi na gem;

Na tale to ia ba na tur ba i tulue ra mudian?

18 I tulue vaarike kana tinata, ma i rang vapolo ra ais;

I vatut kana vuvu, ma ra polo i alalir.

19 I ve tar kana tinata tai Iakob,

Kana lavur togotogo ma kana lavur varkurai tai Israel.

20 Pa ta vuna tarai mulai ba i mari ia dari,

Ma ure kana umana varkurai, pa dia ga nunure diat.

Avat a pite pa ra Luluai.