1 Ea, kaugu vakak, u a valilingina, u a potar na vavina,

A ura kiau na matam dir da ra kiau na mata i ra uka;

Ra pepe na ulum i da ra kikil na me

Nina i va ta ra papar a luana Gilead.

2 Ra umana pal a ngiem dia da ra kikil na sip ba di kabur kut uka diat,

Ma nina ba di ga puk vagomgom diat;

Dia vanavana a ururua,

Ma pa ta tikai ta diat i iba.

3 Ra ura bul na ngiem dir da ra kuara i meme,

Ma ra ngiem i vakak;

A ura pagupagu na ngiem nina dir ki ta ra vavai na mal na tubatuba,

Dir da ra pakana gamata.

4 Ra inoam i da ra bur na pal nina David i ga pait ia ure ra vuvuvung na vargal,

Nina ba tika na arip na marmar na bakbakit dia ki tana,

Diat par ra umana ramravit kai ra umana rangrang na tutana.

5 A ura um dir da ra kanga, a ura natu i ra vakak na leing,

Nina ba dir ian maravai ta ra umana vaigoara.

6 Ba i vuvu ravian, ma ra lavur malur dia panie,

Ina vana tar ta ra luana na bira na davai,

Ma tadav ra buana na bulit i ang na katkat.

7 Kaugu vakak, ra pakam i potar,

Ma pa ta babale tana.

8 Dor a varagur maro Lebanon, kaugu taulai kalama,

Dor a varagur maro Lebanon;

Una gigira marama ra ul a Amana,

Marama ra ul a Senir dir ma Kermon,

Kan ra bala i ra babang kai ra umana leon,

Kan ra luana kai ra umana lepad.*A lepad, a mangana leing da ra ngala na pusi, a tena varkarat.

9 U tar vagugu ra balagu, u taigu, kaugu taulai kalama;

U tar vagugu ra balagu ba u kap lingan upi iau,

Ba iau gire ra kurkurua ta ra inoam.

10 Taigu, kaugu taulai kalama, kaum varmari i boina!

I manga boina ta dir ma ra polo na vuai na vain!

Ma ra vuvuluna ta kaum lavur vartap i lia ta ra lavur mangana magit dia ang na katkat!

11 Ea, kaugu taulai kalama, a ura bul na ngiem dir tuatua da ra bulit na livur.

A polo na bulit na livur, ma ra polo na u, dir ki ta ra vavai na karameam.

Kaum lavur mal dia ang na vuvuvul da Lebanon.

12 Taigu, kaugu taulai kalama, i da ra uma di liplip bat ia,

Da ra tava i ninim rikai nina di tuba bat ia,

Da ra tava i pupunuk nina di ang bat ia.

13 Kaum lavur. ibul dia da ra uma na gamata i vuai ra bo na vuaina;

A ena ma ra umana mapina nared,

14 A nared ma ra sapron,

Kalamus ma sinamon, ma ra lavur davai na bulit dia ang na katkat;

A bira na davai ma ra davai na alo ma ra umana vuai na davai dia ang na vuai, ma dia ngatngat muka.

15 U tika na uma na tava i pupunuk,

U tika na kivu, nina ba ra tava tana a launa,

U ra umana tava alir marama Lebanon.

16 Ea, u ra labur, una tavangun; ma u ra taubar, una vut;

Amur a vu taun kaugu uma, upi ra bo na vuvuluna tana na arikai.

Boina ba kaugu vakak na vana ta kana uma,

Ma na en ra bo na vuaina tana.