1Ioane
Ioaneꞌa Mirihiroteꞌe Soꞌaḡa Ibiꞌa
Ihore Ḡoeꞌa
Soꞌa ꞌahiꞌe Ioaneꞌa mirihiro. Aniꞌe Iesu tahiꞌa gaubanana aheu fare boꞌaḡano tahiꞌa ꞌahoga. Aniꞌe ibite Iesu hari manoḡa zuni mirihiro. Soꞌa ꞌahi zamaḡano Iesuꞌe agaḡa huga zu Badiꞌa Ubuga rae fureranadu aniꞌe ḡabofeꞌeteꞌe vazeḡa rae ihoziro. Emeꞌe Badiꞌa zu Iesu zamare borofeꞌenaꞌa zeḡe teite unihiꞌuma, ebu emeḡe nabudi zuni zamare borofeꞌenaꞌa zeḡe teite unihiꞌuma rae ḡoeriro. Ḡuriro ihore azaḡaniꞌa Iesuꞌe ahirio mene ariro, rehano vineo daꞌo ariro rae veꞌone ihoziroteꞌe moneo zeḡe ihoreꞌe veꞌoḡa rae fureniro.
1
Ḡabone Ziniꞌeteꞌe Ḡoeꞌa
1 Emeꞌa ḡabone ziniꞌeteꞌe ḡoeꞌa moneo zae mazao rae fureneꞌohe. Ḡoere aꞌe ḡadaheḡanonoꞌo onao izidi radiuꞌohe. Emeꞌa ḡoere eꞌe igiro, ebu emeḡe ubuma hina horoniro, zu ḡianiro, ebu emeḡe ꞌevore hina oboniro. 2 Ḡabone eꞌeꞌa fureraro. Emeꞌe ani horoniro ebu ani moneo rae fureneꞌohe, ebu ḡabone tuḡutuḡu eꞌe moneo zae mazao harameꞌohe. Ḡabone tuḡutuḡu aꞌe Moga teite radiunu ebu emeḡe mazao fureraro. 3 Zae zuni emeḡe teite unihifine, eme emeḡeꞌa nagini horoniroteꞌe zu igiroteꞌe zae mazao rae fureneꞌohe. Emeꞌa unihotiteꞌetaꞌaꞌe Moga zu Ubuga, Iesu Keriso teite unihotiteꞌohe. 4 Emeḡe niduꞌa tiburu matuꞌe rudanoga veize emeꞌa ꞌahi miriheꞌohe.
Badiꞌaꞌe Agaḡa
5 Emeꞌa Iesuonoꞌo egadu zae mazao rae fureneꞌeteꞌe ḡoeꞌaꞌe ꞌahi eꞌe. Badiꞌaꞌe agaḡa. Ani mazaoꞌe uzabo oꞌoꞌa hune. 6 Emeꞌa, “Badiꞌa teite uniheꞌohe,” rae raenaꞌa, ꞌize uzabo zamaḡano radiune, eme ḡurireꞌohe zu ḡoere hugano mene radiuꞌohe. 7 Rehano Badiꞌaꞌa agaḡano radiuꞌeteꞌe teige, emeꞌa agaḡano radiune, emeꞌe unihotitiꞌuma zu ane Ubuga Iesu ruḡaniꞌa haḡaife sauꞌa niduꞌaonoꞌo emeḡe vuzuꞌe dehefiꞌuma. 8 Emeꞌa haḡaife sauꞌa oꞌoꞌa rae reine, eme emeḡeꞌa bare soꞌofeꞌohe zu ḡoere hugano mene radiuꞌohe. 9 Rehano emeꞌa haḡaife sauꞌa Badiꞌa mazao rae furenine, haḡaife sauꞌa rae modiꞌuma zu emeꞌa mene duduḡano haḡairoteꞌe haḡaiḡanonoꞌo vuzuꞌe dehefiꞌuma. Mazaḡa aniꞌe zama niduꞌa hina haḡaeꞌeteꞌe zu haḡai duduḡa daꞌo haḡaeꞌeteꞌe Badiꞌaḡa. 10 Badiꞌaꞌe, “Vaze niduꞌa haḡai sauꞌa haḡaeꞌohe,” rae raꞌohe. Rehano emeꞌa, “Haḡai sauꞌa mene haḡairo,” rae reine, eme, “Badiꞌaꞌe ḡuriro Badiꞌaḡa,” rae raꞌeteꞌe heuḡa. Ebu ani ḡoereꞌe emeḡe zamao mene radiuꞌohe.