1 Nego nabudi, za edeḡa, emeḡeꞌa Tesalonika neḡano ꞌiꞌudirotaꞌaꞌe, mene tauḡe amiro. Mazaḡa zae ḡehaḡa huneꞌa eꞌea hari manoḡa mae ḡihiniro. 2 Za edeḡa, emeḡeꞌa zae ne ꞌizema amogano, Filipi neḡano vazeꞌa ifi sausaufiro, zuni rae aduga rifiro. Rehano Tesalonika neḡa amirotene, emeḡe Badiꞌaꞌa inarafeadu, agire boꞌaḡano, rehano Badiꞌa hari manoḡa inare haramiro. 3 Mazaḡa emeḡeꞌa haramirotaꞌaꞌe, zae tutuze veꞌozifine ga, haḡai sauꞌa zae mazao haḡaifine zu zae soꞌozifine mene haramiro. 4 Rehano emeꞌe hari manoḡa harameꞌohe, mazaḡa Badiꞌaꞌa eme ꞌai manoḡa radu, hari manoḡa haramiꞌuma gauḡano ohofiro ꞌahine. Eꞌanoꞌo emeḡeꞌa harameꞌetene, mene vazeꞌa matuꞌoga, rehano Badiꞌaꞌa matuꞌiꞌuma ibiḡano harameꞌohe. Badiꞌa ani emeḡe zama faifaine ḡianeꞌeteꞌe vazeḡa.

5 Zae edeḡa, emeḡeꞌa ḡorezinutaꞌe mene zamaze anoga radu, ga zae mazao ḡau mouga radu mene soꞌe ḡorezinu. Badiꞌa huga ani eme haḡai edeḡa. 6 Zuni emeꞌe, mene zaeꞌa ga vaze ꞌahoga ꞌahoganiꞌa nife mae ḡihinoga radu gauido, 7 emeꞌe Kerisoꞌa tuḡuiroteꞌe apostoloḡa azaḡa ꞌahine, nife boro azaḡa rouga zuni idaḡa. Rehano emeꞌe, roḡaꞌeꞌa ubuga duḡuru faifaizeꞌeteꞌe teige, zae boꞌaḡano roḡeru radiunu.

8 Eme zae zamare borofiro ꞌahine, matuꞌufeta Badiꞌa hari manoḡa haramo zinirotene, ḡabonefe niduꞌa hina zae danazoga veize ḡau niduꞌa haḡao ziniro. Mazaḡa emeḡe zamarone zae mazaoꞌe boro bagaḡa. 9 Nego nabudi, za hubehune edeḡa, emeḡeꞌa zae mazao Badiꞌa hari manoḡa haraminuteꞌe zamaḡano, emeḡeꞌa inare hune gauinutaꞌaꞌe. Emeꞌe zaeꞌa emeḡe uꞌano hadize mene modifine, madai zu ohere niduꞌa gauido.

10 Hubehune zaꞌe haḡaife horoniro, ebu Badiꞌa ane zuni edeḡa. Zaꞌe, Badiꞌa mazao fieꞌeteꞌe azaḡa teite, emeḡeꞌa radiunuteꞌe madaḡano, haḡaifeꞌe, Badiꞌaꞌa matuꞌiꞌuma haḡaiḡa zu duduḡa ebu mene veꞌoḡa haḡaiḡa haḡainu. 11-12 Zae edeḡa, ohozeꞌa ubuga duḡuru ihozeꞌeteꞌe teige, eme zae zaeꞌa fie gigaru onamogaradu danazinu, zu inara zinido, ebu iraduguzido, Badiꞌaꞌa matuꞌiꞌuma haḡaiḡano radiu onamifine. Mazaḡa za Badiꞌaꞌa huzeꞌohe, aneꞌa zae faifaine zuhiꞌaziꞌuma.

13 Zuni eme zae uꞌano iḡaiḡa Badiꞌa mazao manoḡa tauḡi raꞌohe, mazaḡa za aḡua mazaḡano emeḡeꞌa Badiꞌa hari manoḡa haramo zinirotaꞌaꞌe mene vaze ḡoere, rehano Badiꞌa ḡoere rae radu zaeꞌa mae ḡihiniro. Aꞌe hube Badiꞌa ḡoere. Ebu eꞌe ḡoeꞌaniꞌe, zae, Badiꞌa ḡoere mae ḡihineꞌeteꞌe azaḡa, zamao gaueꞌohe. 14 Eꞌanoꞌo, nego nabudi, zaꞌe Iudea habaꞌa zamaḡano Keriso Iesu niḡano radiuꞌeteꞌe ekalesiaḡa azaḡaniꞌa haḡaidoteꞌe teige haḡairo. Zeḡeꞌa Iuda azaḡa mazaonoꞌo aduga hididoteꞌe teige, zae zuni haba tiba azaḡa mazaonoꞌo aduga hidido. 15 Zuhiꞌa Boro Iesu ebu peroveta azaḡa runedirotaꞌaꞌe, Iuda azaḡaniꞌa, ebu emeḡe hegofe bufirotaꞌa zuni Iuda azaḡaniꞌa. Zeꞌe Badiꞌaꞌa mene matuꞌiꞌuma haḡaiḡa haḡaeꞌohe. Zeꞌe vaze niduꞌa agire. 16 Iuda azaḡaꞌe, mene Iuda azaḡa mazao hari manoḡa haramoga mene uratadu, eme garareꞌohe. Hena, zeꞌa ḡabone hidiꞌuma radu. Deꞌugeꞌenaꞌa, zeḡe haḡai sauꞌa ragate ragate tiꞌohe. Eꞌanoꞌo Badiꞌaꞌa maḡuno zenadu, naeḡa haḡaoga raꞌohe.

17 Nego nabudi, Tesalonika neḡano Iuda azaḡaniꞌa aduga boro fureraroteꞌe uꞌano, zaꞌe munemune azaḡa teiḡe emeḡeꞌa muhize iḡuniro, onao izidi mada nu vitineha (Aꞌe ahirioꞌe mene ḡiazeꞌe rehano, zamafeꞌe zae zamareꞌohe). Ebu zae ḡiazoga urate rudaunu ꞌahine, zae vaḡe bare amoga radu ibi vaḡe onainu. 18 Oꞌe, eme zae vaḡe amihi reiro. Hubehune eḡe, Pauloꞌa bare bare ibiḡa vaḡiro rehano, Sataniꞌa haḡai nunuoꞌnoꞌo ꞌuiro. 19 Eme uraꞌe bare ḡiazihi raꞌohe. Mazaḡa emeḡeꞌa zamareꞌetene, zaꞌe hubehune Badiꞌa mazao fie gigaruꞌeꞌuma, onamo emeḡe Zuhiꞌa Boro Iesuꞌa bare onaiteꞌe madaḡano ane zamao edaꞌuma. Ebu eꞌe madaḡano emeꞌe zaeꞌa naeḡa meiteꞌe uꞌano niguziꞌuma, ebu zae uꞌano matuꞌiꞌuma. 20 Hubehune eme zaꞌe niguzeꞌohe, ebu zae uꞌano matuꞌeꞌohe.