1 Vine Zaḡoḡaniꞌa ꞌahige deheru raꞌohe. Vesu vaze nuꞌa ihore huga mae ḡihineꞌeteꞌe modadu soꞌosoꞌo viga zu vine sauꞌa ihoreḡa hegotiꞌuma. 2 Ihore ꞌuguḡaꞌe zama guhi azaḡa ḡuriro ḡoeꞌanonoꞌo areꞌohe. Ze aḡuꞌa, zeḡe zamaroneꞌe auri gigiꞌaḡa hina hufiroteꞌe teige rudanadu zeḡe ihoreꞌe veꞌoḡa. 3 Ze vaze mazao, “Ago hahuroꞌi,” ebu “Ogomu nuꞌe ago anoꞌi,” rae raꞌohe. Rehano ogomu ꞌuguḡaꞌe Iesu mazao fieꞌeteꞌe zu ihore huga edereꞌeteꞌe azaḡaniꞌa Badiꞌa mazao manoḡa tauḡi radu anoga veize Badiꞌaꞌa haḡadu rifiro. 4 Mazaḡa Badiꞌaꞌa haḡairoteꞌe ḡauḡa niduꞌaꞌe manoḡa. Eme ani mazao manoḡa tauḡi radu eꞌe aune, ḡauni ꞌahoga mene hezahohaꞌuma. 5 Mazaḡa Badiꞌa ḡoere ebu emeꞌa ogomu veize manoḡa tauḡi rae kurauꞌeteꞌe uꞌano, ogomu nidu'aꞌe zaḡoḡa.

6 Ḡa eḡe ḡoere ꞌadi nego nabudi faine ihozoꞌi. ꞌOugine, ḡaꞌa mae ḡihineꞌeteꞌe ḡoeꞌa huga zu hegoteꞌeteꞌe ihoreḡa huga hina ufeta ḡuhuradu Keriso Iesu veize gaueꞌeteꞌe vazeḡa manoḡa reꞌuma. 7 Badiꞌa rae sausauneꞌeteꞌe ḡuriro hariḡa zu vouḡaze irihine hezahohanoꞌi. Rehano Badiꞌa gubaneꞌenaꞌa radoga veize ḡa ḡae bare taufoꞌi. 8 Ahiri faine taufine, manoḡa nu meꞌuma. Rehano Badiꞌa gubaneꞌenaꞌa radiune, ḡau niduꞌa ibiḡano manoḡa hidiꞌuma. Manoḡa aꞌe izidi madaḡano zu zama moneo Badiꞌaꞌa rifiꞌuma rae ḡoitoriroteꞌe ḡaboneḡa. 9 Ḡoere aꞌe huga, zu vaze niduꞌa mae ḡihiniteꞌe ḡoeꞌa. 10 Eme Badiꞌaꞌa ḡoitoriroteꞌe ḡaboneḡa hidifine, ḡihau gaue inareꞌohe, mazaḡa emeꞌe ḡabode radiuꞌeteꞌe Badiꞌaḡaniꞌa eꞌe rifiꞌuma rae mae ḡihineꞌohe. Aniꞌe vaze niduꞌa ḡabozeꞌeteꞌe zu ani mazao fieꞌeteꞌe azaḡa ufeta hune ḡabozeꞌeteꞌe Badiꞌaḡa.

11 Za ihore ꞌadi riḡa zoꞌi ebu ihozoꞌi. 12 Ḡaꞌe tahiꞌa iziga radu vaze ꞌahoganiꞌa ḡa ovoe ḡiaoga gararoꞌi. Rehano ḡaꞌe fieꞌeteꞌe vazeḡa radu faine ḡoeroꞌi, faine haḡaoꞌi, vaze zamare borofoꞌi, Iesu mazao hube hune fioꞌi ebu zama deheḡa hina Badiꞌa ubumao haḡai duduḡa haḡaoꞌi. ꞌOugine, fieꞌeteꞌe azaḡaniꞌa ḡa tuhutuhuꞌiꞌuma. 13 Vaze ubumao Buka Zaḡoḡa meꞌodoga, haramoga zu ihozoga veize inaroꞌi, onamo eḡeꞌa amiꞌuma. 14 Ekalesia ibitoziꞌeteꞌe azaḡaniꞌa ibite ꞌevoreze ḡae rana teadu Badiꞌa ḡoere rae furenirotene, ḡa Badiꞌa mazaonoꞌo ḡahunone hidiro. Ḡahunone aꞌe ago reꞌoreꞌonoꞌi. 15 ꞌAhiguḡa niduꞌa ḡaeꞌa zamaḡo niduꞌa hina inare haḡadu ḡaꞌa ufeta ḡuhureꞌetaꞌaꞌe vaze niduꞌa ihozoꞌi. 16 Ḡaboneḡo zu ihoreḡo faine ḡianoꞌi. E ḡateꞌe ꞌaune haḡaoꞌi. ꞌOugine, Badiꞌaꞌa mene ḡae daꞌo, rehano ḡae ihore igiꞌeteꞌe azaḡa zuni ḡaboziꞌuma.