2Tesalonika
Tesalonika Ekalesia veize Pauloꞌa Mirihiroteꞌe Soꞌaḡa Aheuḡa
Ihore Ḡoeꞌa
Soꞌa ꞌahiꞌe Pauloꞌa Korinto zamaḡano Tesalonika ekalesia veize mirihiro. Tesalonikaꞌe Makedonia habaꞌano ne boro ꞌahoga. Pauloꞌa ibite soꞌa ꞌahoga tuḡuriro ebu soꞌa ꞌahiꞌe aheuḡa. Tesalonika ekalesia azaḡaniꞌa Iesuꞌa bare ariteꞌe moneo veꞌone ederiro. Vaze nuꞌa Iesuꞌe amahi ariro rae ḡoeriro. Eꞌanoꞌo Pauloꞌa Iesuꞌe ꞌize mene ariroteꞌe zu aniꞌa bare ariteꞌe madaḡaꞌe Badiꞌa daꞌo edeḡa rae ihoziro. Ebu ekalesia azaḡaꞌe izidionoꞌo onamo Iesuꞌa bare ariteꞌe madaḡano fie gigaruꞌenaꞌa zu haḡai manoḡa haḡaeꞌenaꞌa zu zamaze obone giganeꞌenaꞌa, faine gaue radiꞌuma rae inaraziro.
1
1 Eḡe, Paulo zu Silasi ebu Timoteoꞌa Badiꞌa emeḡe Mama zu Zuhiꞌa Boro Iesu Keriso mone azaḡa, Tesalonika ekalesia veize soꞌa ꞌahi miriheꞌohe. 2 Badiꞌa emeḡe Mama zu Zuhiꞌa Boro Iesu Kerisoꞌa manoḡa zu zama roḡeḡa ziniꞌenoꞌi.
Badiꞌa mazao Manoḡa Tauḡi Raꞌohe
3 Nego nabudi, eme zae uꞌano iḡaiḡa Badiꞌa mazao manoḡa tauḡi reꞌuma. Eme ꞌouge haḡaeꞌetaꞌaꞌe duduḡa. Mazaḡa zaꞌa fieꞌeteꞌeꞌa bororu onameꞌohe, ebu zae niduꞌa zamarotiteꞌetaꞌaꞌe zuni bororuꞌohe. 4 Eꞌanoꞌo habaꞌahabaꞌano Badiꞌa mone ekalesiaḡa nunu mazao za niguzeꞌohe. Mazaḡa zaꞌe vazeꞌa aduga ziniꞌeteꞌe zu agiroziꞌeteꞌe zamaḡano zuni zamaze obone giganeꞌohe ebu fie gigaruꞌohe.
Kerisoꞌa Onaiteꞌe madaḡano Kotaziꞌuma
5 ꞌAhiguḡa niduꞌa Badiꞌa kotaꞌe duduḡa rae ihozeꞌohe. Badiꞌaꞌa zaꞌe aniꞌa zuhiꞌaziꞌeteꞌe azaḡano rouga veize ohoziro. Eꞌe uꞌano, zaeꞌa aduga zuni hideꞌohe. 6 Badiꞌaꞌe iniuꞌa vaze aduga ziniꞌeteꞌe azaḡa naenaeziꞌuma. Aniꞌa za aduga ziniꞌeteꞌe azaḡa aduga hina naenaeziꞌohe. 7 Ebu za, aduga hideꞌeteꞌe azaḡaꞌe Badiꞌaꞌa ahiri ohoneꞌeteꞌe madaḡa ziniꞌuma ebu emeḡe zuni rifiꞌuma. Aꞌe Zuhiꞌa Boro Iesuꞌa ane tuḡure viga inaraḡa ḡehaḡa teite adureonoꞌo ire roga duhuḡa zamaḡano ovaiteꞌe madaḡano fureraꞌuma. 8 Eꞌe madaḡano Iesuꞌa Badiꞌa aḡuꞌa azaḡa zu emeḡe Zuhiꞌa Boro Iesu hariḡa manoḡa mene egohauꞌeteꞌe azaḡa aduga ziniꞌuma. 9 Zeꞌe aduga hidadu rudaꞌuma, onamo tuḡutuḡu. Ebu zeꞌe Zuhiꞌa Boro mazaonoꞌo zu ane inaraḡa boro bagaḡaonoꞌo mae vaḡiziꞌuma. 10 Eꞌe madaḡano Zuhiꞌa Boroꞌa arine, ane mone azaḡaniꞌa ane ni mae ḡihiniꞌuma ebu fieꞌeteꞌe azaḡa niduꞌa ane niguniꞌuma. Mazaḡa zaꞌe emeꞌa rae fureniroteꞌe hariḡa mae ḡihiniro.
11 Eꞌe uꞌano, emeꞌa zae veize iḡaiḡa kurauꞌohe. Aꞌe emeḡe Badiꞌaꞌa zae huzadu zaeꞌa ane urao radifine raꞌohe. Ebu aniꞌa inaraḡa zenadu zaeꞌa haḡai manoḡa niduꞌa haḡaihi rae raꞌeteꞌe zamaroneḡa meifine, zu zaeꞌa fieꞌenaꞌa haḡai niduꞌa haḡaifine kurauꞌohe. 12 ꞌOugine, emeḡe Badiꞌa zu Zuhiꞌa Boro Iesu Kerisoꞌa manoḡa furenozenadu zaeꞌa emeḡe Zuhiꞌa Boro Iesu niḡa mae ḡihiniꞌuma zu aniꞌa zae ni zuni mae ḡihiniꞌuma.