2Timoteo
Timoteo veize Pauloꞌa Mirihiroteꞌe Soꞌaḡa Aheuḡa
Ihore Ḡoeꞌa
Soꞌa ꞌahiꞌe Pauloꞌa Roma zamaḡano ḡuꞌa neḡano Timoteo veize mirihiro. Timoteoꞌe Paulo teite harame ragaviro zu Paulo dananiro. Timoteoꞌe Efeso ekalesia ibitozinu ebu Pauloꞌa ibite ani veize soꞌa ꞌahoga tuḡuriro. Soꞌa ꞌahiꞌe Timoteo veize mirihiroteꞌe soꞌaḡa aheuḡa. Pauloꞌa ane rune madaḡaꞌe hanitiroteꞌe ederadu ane ubuga teigiroteꞌe tahiꞌaḡa iziga, Timoteo mazao ḡonagano iraduguniro. Aniꞌe Timoteoꞌa Keriso ḡoere huga ekalesia ꞌaune ihozifine ḡoreniro. Aduga zamaḡano Keriso mazao fieꞌenaꞌa, zamaḡa obone giganoga veize zu ḡoere huga oboneꞌenaꞌa, edau gigaranoga veize inaraniro. Ebu Timoteoꞌe Efeso ekalesia ibitoziꞌeteꞌe vazeḡa radu faine gauiteꞌe moneo iraduguniro.
1
1 Eḡe, Pauloꞌa soꞌa ꞌadi miriheꞌohe. Eꞌe Badiꞌaꞌa uratadu Keriso Iesu apostolo vazeḡano reiro. Badiꞌaꞌa Keriso Iesu uꞌano vaze ḡaboziꞌuma rae ḡoitoriroteꞌe ḡoeꞌa eḡeꞌa haramifine eḡe ohotiro. 2 Soꞌa ꞌadiꞌe eḡe zamarone ubude Timoteo veize miriheꞌohe.
Badiꞌa emeḡe Mama zu emeḡe Zuhiꞌa Boro Keriso Iesuꞌa ḡae mazao manoḡa, vetuḡa zu zama roḡeḡa ḡaneꞌenoꞌi.
Badiꞌa mazao Manoḡa Tauḡi reiro zu Timoteo Inaraniro
3 Eḡe vouḡa teige, e zamarone duduḡano zu deheḡano Badiꞌa veize gaueꞌohe. Ebu e ohere zu madai kurauꞌetene, iḡaiḡa ḡa zamareꞌenaꞌa Badiꞌa mazao manoḡa tauḡi raꞌohe. 4 E ḡaꞌa ibite niaroteꞌe zamareꞌenaꞌa ḡiaꞌihi raꞌohe, mazaḡa e ḡa horoꞌine matuꞌe rudaꞌuma. 5 E ḡaeꞌa zamaḡo niduꞌa hina Iesu mazao fieꞌeteꞌe bare zamareꞌohe. Aḡiḡu roḡaeḡa Loisi zu viꞌu Eunikeꞌa ibite firo, ebu ḡae zuni zeḡe hegotadu izidi hube hune Iesu mazao fieꞌeteꞌe e edere huneꞌohe. 6 Eꞌe uꞌano, ḡa ꞌahi bare zamaroga veize ḡaꞌohe. Eḡeꞌa ḡae rana ꞌevorehe tiroteꞌe madaḡano Badiꞌaꞌa ḡaniroteꞌe ḡahunoneḡa ago daunoꞌi ebu eꞌe hina ꞌaune inare gauoꞌi. 7 Badiꞌaꞌa rifiroteꞌe Vigaꞌe mene riho zamaroneḡa, rehano ane gigiꞌa, vaze zamare borofeꞌeteꞌe, ebu emeꞌa bare haḡai sauꞌa hezahohauꞌeteꞌe zamaroneḡa.
8 Eꞌanoꞌo ḡaꞌa emeḡe Zuhiꞌa Boro moneo rae fureranoga ago mazagaroꞌoꞌi, ebu ani uꞌano e ḡuꞌa neḡano radiuꞌeteꞌe moneo ago mazagaroꞌoꞌi. Rehano Badiꞌa inaraḡa hina Iesu hari manoḡa haramifine, ḡae zuni eḡe teite aduga moꞌi. 9 Badiꞌaꞌa eme ḡabofiro zu emeꞌa zaḡozaḡe radifine hufiro. Aniꞌa ꞌouge haḡairotaꞌaꞌe mene emeḡeꞌa haḡairoteꞌe haḡaiḡa uꞌano, rehano ane urao emeḡe mazao manoḡa fureniro. Manoḡa aꞌe ꞌizema mada ḡadaheḡano Keriso Iesu mazaonoꞌo Badiꞌaꞌa rifiro. 10 Ebu emeḡe ḡabofeꞌeteꞌe vazeḡa, Keriso Iesuꞌa rahao fureranadu manoḡa eꞌeꞌa fureraro. Kerisoꞌa rune inaraḡa ruiniro, zu ane hari manoḡa hina mene ruhuratiteꞌe ḡaboneḡa tuḡutuḡu deheru ihofiro. 11 E hari manoḡa ꞌahi haramifine, Iesuꞌa eꞌe haramo vazeḡano zu apostolo vazeḡano zu ihore vazeḡano ohohiro. 12 Eꞌe uꞌano, e izidi ꞌahige aduga hideꞌohe, rehano e mene mazagaroheꞌohe. Mazaḡa e edeḡa hune, eḡeꞌa mae ḡihineꞌeteꞌe vazeḡaꞌe iniu, zu eꞌa ḡabonehe haroteꞌe uꞌano*1:12 aniꞌa inirotaꞌaꞌe aniꞌa ḡabonehe faine taufiꞌuma, onamo mada ḡonaga.
13 Ḡa eḡe mazaonoꞌo ihore huga igiro. Ihore aꞌe ḡa Keriso Iesu teite tiburanadu ani mazao fieꞌenaꞌa zu vaze zamare borofeꞌenaꞌa, hegote huniteꞌe ihoreḡa rae zamaroꞌi. 14 Emeḡe teite tiburu radiuꞌeteꞌe Vine Zaḡoḡaniꞌa ḡa danaꞌeꞌe ꞌahine, Badiꞌaꞌa ḡaniroteꞌe ihoreḡa huga faine hegotoꞌi.
15 Ḡa edeḡa, Asia habaꞌano ekalesia azaḡa niduꞌa eḡe muhihe iḡuniro. Zeḡe boꞌaḡano Fugelo ebu Heremogene zuni eḡe muhihe iḡuniro. 16 E Zuhiꞌa Boroꞌa Onesiforo ane neo tiburu radiuꞌeteꞌe azaḡa vetuḡazoga veize kurauꞌohe. Mazaḡa aniꞌa ḡae ḡehaḡa inarahiro ebu e ḡuꞌa neḡano radiuꞌeteꞌe moneo ani mene mazagaroniro. 17 Ani Roma arirotene, ragave eḡe vaḡihi rae ufeta inaradu ḡiahiro. 18 E Zuhiꞌa Boroꞌa bariteꞌe madaḡano Onesiforo vetuḡanoga veize kurauꞌohe. Ḡaꞌe aniꞌa Efeso zamaḡano e ufeta danahirotaꞌaꞌe hube hune edereꞌohe.