1 Muri 14 enogano e Banabasi teite Tito zamahanadu Ierusalema bare itiro. 2 Badiꞌaꞌa, “Itoꞌi,” rae ehadu eꞌa itiro. Itadu e Iuda mene azaḡa mazao hari manoḡa harameꞌeteꞌe moneo ekalesia azaḡa meꞌodoziniro. Ekalesia azaḡa ibitoziꞌeteꞌe azaḡa teiteꞌe avo nuꞌoranadu meꞌodoziniro. Mazaḡa ibite eḡeꞌa gaue arirotaꞌaꞌe zu izidi gaueꞌetaꞌaꞌe huga oꞌoꞌano rouga e mene uratiro. 3 Tito zuni eḡe teite eꞌea radiro. Aniꞌe Giriki vazeḡa rehano, ekalesia ibitoziꞌeteꞌe azaḡaniꞌa ani ahiꞌa rana iḡuri haḡaoga mene teꞌoteꞌoniro. 4 Mazaḡa ḡuriro ekalesia azaḡa nuꞌa emeḡe ekalesia zamaḡano sifu diuḡi ariro. Ebu ze emeḡeꞌa Keriso Iesu teite tiburanadu Mose goro ḡoeꞌanonoꞌo bohafe bufiroteꞌe rihinoga uratiro, ebu emeḡe tutufadu Mose goro ḡoeꞌa hegoteꞌeteꞌe tuḡure azaḡano rouga uratiro. 5 Rehano zaeꞌa hari manoḡa moneo ḡoere huga iḡaiḡa obone giganoga veize, eme zeḡe ḡoere tahiḡa zu mene mae ḡihiniro.

6 Ekalesia ibitoziꞌeteꞌe azaḡaꞌe nize boro rehano, e ze mene zamareꞌohe, mazaḡa Badiꞌaꞌa vaze enone daꞌo ḡianadu zeꞌe manoḡa ga sauꞌa rae mene raꞌohe. Zeꞌa e Iuda mene azaḡa mazao harameꞌeteꞌe hariḡa manoḡa moneo ḡoereni ꞌahoga mene ihiro. 7 U zeꞌe Badiꞌaꞌa Iuda azaḡa*2:7 ahiri rana iḡuri haḡairoteꞌe azaḡa mazao hari manoḡa harameꞌeteꞌe gauḡa Petero haroteꞌe teige, Iuda mene azaḡa†2:7 ahiri rana iḡuri mene haḡairoteꞌe azaḡa mazao harameꞌeteꞌe gauḡa eḡe inirotaꞌaꞌe ederiro. 8 Badiꞌaꞌa ane inaraḡa Petero hanadu Iuda azaḡa veize apostolo gauḡa haroteꞌe teige, Badiꞌaꞌa inaraḡa eḡe enadu Iuda mene azaḡa veize apostolo gauḡa iniro. 9 Iakobo, Petero zu Ioaneꞌe ekalesia boꞌaḡano ne gadoḡa heuḡa. Ze Badiꞌaꞌa eḡe mazao manoḡa fureniroteꞌe ederirotene, eḡe zu Banabasi teite unihifine obotitiro. Ebu emeꞌe Iuda mene azaḡa vaḡe onamiꞌuma, u zeꞌe Iuda azaḡa vaḡe onamiꞌuma rae ḡoere idaniro. 10 Ze emeꞌa zahara azaḡa zamaradu danazoga veize daꞌo umifiro. Aꞌe eḡeꞌa zuni hube hune haḡae inare ariroteꞌe gauḡa.

11 Rehano Peteroꞌa Antioka arirotene, aniꞌa veꞌoḡa haḡadu eḡeꞌa ani ubuma ꞌue roniro. 12 Aniꞌe Iakobo mazaonoꞌo Iuda azaḡa nuꞌa ꞌizema arogano Iuda mene azaḡa ekalesiaḡa teite tiburu ogaudo. Rehano zeꞌa feurirotene, aniꞌe Iuda mene azaḡa mazaonoꞌo ꞌie baradu zeḡe teite mene ogau tiburaro, mazaḡa aniꞌe Iuda azaḡa‡2:12 ahiri rana iḡuri haḡairoteꞌe azaḡa rihoziro. 13 Aniꞌa ꞌougirotene, eꞌea radiunuteꞌe Iuda azaḡa zuni ani hegotadu zama guhi azaḡa teige veꞌoriro. Ebu Banabasi zuni zeḡe teite veꞌoriro.

14 E zeḡeꞌa hari manoḡa huga mene ibi duduḡano hegotinuteꞌe horonirotene, zeḡe niduꞌa ubumao Petero niro, “Ḡaꞌe Iuda vazeḡa rehano, Iuda azaḡa goro ḡoeꞌa mene hegoteꞌenaꞌa, Iuda mene azaḡa teige radiuꞌohe. U ḡaꞌe nougadu Iuda mene azaḡaꞌe Iuda azaḡa teige radoꞌi rae raꞌohe?”

15 Emeꞌe fureraroteꞌe madaḡanonoꞌo Iuda azaḡa. Ebu Iuda mene azaḡaꞌe haḡai sauꞌa azaḡa rae huzeꞌohe, u emeꞌe ze mene heuḡa raꞌohe. 16 Rehano eme edeḡa, Mose goro ḡoeꞌa hegotadu Badiꞌa ubumao duduḡa rae mene raꞌohe, rehano Iesu Keriso mazao fiadu Badiꞌa ubumao duduḡa rae raꞌohe. Eꞌanoꞌo emeḡe zuni Keriso Iesu mazao firo. Aꞌe, mene emeꞌa Mose goro ḡoeꞌa hegoteꞌeteꞌe uꞌano, rehano Keriso mazao fieꞌeteꞌe uꞌano, Badiꞌa ubumao duduḡa rae reifine reiro. Mazaḡa iniu Mose goro ḡoeꞌa hegoteꞌeteꞌe uꞌano, Badiꞌa ubumao duduḡa rae raꞌeteꞌe vazeḡaꞌe oꞌoꞌa. 17 Emeꞌa Keriso mazao fiadu Badiꞌa ubumao duduḡa rae rouga veize inareꞌenaꞌa, emeḡe zuni haḡai sauꞌa azaḡa rae raꞌeteꞌe furenine, Kerisoꞌe emeḡeꞌa haḡai sauꞌa haḡaoga veize tutufe veꞌofeꞌeteꞌe vazeḡa raꞌehe? Mene hune! 18 E Mose goro ḡoeꞌa modiro. Eḡeꞌa eꞌe bare meine, e eḡeꞌa bare goro ḡoeꞌa varadeꞌeteꞌe vazeḡa rae reꞌuma. 19 E Mose goro ḡoeꞌa uꞌano rudanadu eꞌe veize mene bare radiuꞌohe. Aꞌe Badiꞌa veize radifine raꞌohe. 20 E Keriso teite satauro rana rudaro. Eꞌanoꞌo e eḡeꞌa bare mene radiuꞌohe, rehano eḡe zamaoꞌe Kerisoꞌa radiuꞌohe. E ahiri hina raha ꞌadao radiuꞌetaꞌaꞌe, eḡe zamare borofadu eḡe veize ḡaboneḡa ahetiroteꞌe Badiꞌaḡa Ubuga mazao fieꞌeteꞌe uꞌano, radiuꞌohe. 21 Eꞌe Badiꞌaꞌa eḡe mazao fureniroteꞌe manoḡaḡa mene hezahohauꞌohe, mazaḡa Mose goro ḡoeꞌa hegotadu Badiꞌa ubumao duduḡa rae reifone, Kerisoꞌe foure rudaro rae reifo.