Heberu
Heberu Ekalesia Azaḡa veize Mirihiroteꞌe Soꞌaḡa
Ihore Ḡoeꞌa
Soꞌa ꞌahiꞌe Heberu ekalesia azaḡa veize mirihiro. Iniuꞌa soꞌa ꞌahi mirihirotaꞌaꞌe eme aḡuꞌa. Soꞌa ꞌahi zamaḡano ḡoere boroꞌe ꞌahiguḡa: Iesuꞌe Badiꞌa Ubuga radiu tuḡutuḡu, ebu peroveta azaḡa zu tuḡure viga niduꞌa vitize ufeta ḡihiꞌa hune. Iuda dibuꞌo azaḡaniꞌa vaze haḡaize sauꞌa uꞌano Mose goro ḡoeꞌa idunaḡano dibuꞌo taruhaḡa zamaḡano mani ru hina dibuꞌiro. Rehano Iesuꞌe emeḡe haḡai sauꞌa uꞌano ani ru hina ane bare dibuꞌiro ebu Mose goro ḡoeꞌa hegoteꞌeteꞌe kuruḡa ibiḡa ꞌuiro. Eꞌanoꞌo aniꞌe dibuꞌo vazeḡa ḡihiꞌaḡa radiu tuḡutuḡu radu ani uꞌano, eme mene rihauꞌenaꞌa Badiꞌa vaḡe onamogaꞌe idaḡa. Ibite madaḡano Badiꞌa mazao firo ꞌahine, aduga zamaḡano zamaze obone giganeꞌenaꞌa edau gigaroteꞌe azaḡaꞌe ḡehaḡa bagaḡa. Izidi ekalesia azaḡa zuni ze hegoteꞌenaꞌa, fieꞌeteꞌe mene modiꞌuma zu ufeta edau gigaraꞌuma.
1
Badiꞌaꞌa Ubugaonoꞌo Ḡoreziro
1 Ibite huneo Badiꞌaꞌe ḡae ḡehaḡa ibi nunuo peroveta azaḡaonoꞌo vouḡafe ḡorezido. 2 Rehano mada ḡonaga ꞌadi zamaḡanoꞌe Ubugaonoꞌo ḡorefiro. Badiꞌaꞌe ḡauḡa niduꞌa Ubuganiꞌa meꞌuma radu ani ohoniro. Ubuga ohotadu Ubuganiꞌa adure zu raha ḡauḡa niduꞌa haḡairo. 3 Ubuga horonadu Badiꞌaꞌe ḡihiꞌa hune rae edereꞌohe. Ubugaꞌe Badiꞌa teite tiba radu Ubugaonoꞌo Badiꞌaꞌe nagiga rae ihofeꞌohe. Ubugaꞌe ane ḡoere gigiꞌaḡa hina ḡau niduꞌaꞌe manoḡa reifine bedaeꞌohe. Aniꞌa haḡai sauꞌa dehene hauḡiroteꞌe enogano, adureo Gigiꞌa Hune Badiꞌaḡa edaꞌe moneo ehoriro. 4 Aniꞌe tuḡure viga niduꞌa vitizadu ḡihiꞌa huneo reiro. Badiꞌaꞌa tuḡure viga niduꞌa nize ufeta vitizoga niḡa haro.
Ubugaꞌe Tuḡure Viga Vitizoga
5 Badiꞌaꞌa tuḡure vigani ꞌahoga mazao zuni ꞌahige mene reiro,
“Ḡaꞌe eḡe ubude,
e izidi ḡa fureꞌeha.”✡1:5 Salamo 2:7
Ebu ꞌahige zuni mene reiro,
“Eꞌe ane moga reꞌuma,
ebu aniꞌe eḡe ubude reꞌuma.”✡1:5 2Samuela 7:14
6 Ebu Badiꞌaꞌa Ubuga ibiꞌa rahao tuḡuniꞌuma rae reirotene, ꞌahige rae reiro,
“Badiꞌa tuḡure viga niduꞌaꞌe ane mazao kuranoꞌi.”✡1:6 Goro 32:43
7 Ebu tuḡure viga moneo Badiꞌaꞌa ꞌahige rae raꞌohe,
“Badiꞌaꞌa tuḡure viga
zavarao*1:7 vine ḡihuzeꞌohe,
ebu ane tuḡure viga ire roga duhuḡano ḡihuzeꞌohe.”✡1:7 Salamo 104:4
8 U Badiꞌaꞌa Ubuga mazao ꞌahige rae raꞌohe,
“O, Badiꞌa! Ḡa kini ehoroḡano zuhiꞌaziꞌuma onamo tuḡutuḡu,
ebu ḡaꞌa ibi duduḡano ḡae mone azaḡa zuhiꞌaziꞌuma.
9 Ḡaꞌe haḡai duduḡa zamariro,
u haḡai sauꞌaꞌe heꞌeheꞌeniro.
Eꞌanoꞌo eḡe, ḡae Badiꞌaꞌa matuꞌoḡane ruḡadadu
ḡaꞌe ḡae teite radiuꞌeteꞌe azaḡa vitize ohoꞌiro.”✡1:8-9 Salamo 45:6-7
10 Ebu Buka Zaḡoḡano Ubuga moneo ꞌahige rae raꞌohe,
“Zuhiꞌa Boro, ḡaꞌa ḡadaheḡano raha haḡairo,
ebu ꞌevoꞌo hina adure haḡairo.
11 Eꞌe niduꞌaꞌe roꞌore ḡouriꞌuma, u ḡaꞌe radiu tuḡutuḡu.
Eꞌe niduꞌaꞌe dabua teige amahiraꞌuma,
12 ebu ḡaeꞌa dabua amahiḡa teige ḡue vaḡiniꞌuma.
Ebu dabua amahiḡa mae vaḡinadu ꞌahoga vidauꞌeteꞌe teige eꞌe niduꞌaꞌe nufiꞌuma.
U ḡaꞌe mene nufiꞌuma,
ebu ḡaboneḡoꞌe ḡonaga oꞌoꞌa reꞌuma.”✡1:10-12 Salamo 102:25-27
13 Rehano Badiꞌaꞌe tuḡure vigani ꞌahoga mazao zuni ꞌahige mene niro,
“Eḡe edaꞌe moneo ehoroꞌi,
onamo eḡeꞌa agireḡo madu odaḡo ꞌuꞌuḡano raharahaziꞌuma.”✡1:13 Salamo 110:1
14 Tuḡure viga niduꞌaꞌe Badiꞌa veize gaueꞌeteꞌe viga. Ze Badiꞌaꞌa ḡaboziteꞌe azaḡa veize gauifine, Badiꞌaꞌa tuḡuziro!