3
Iesuꞌe Mose Vitinoga
1 Eꞌanoꞌo, nego nabudi, zaꞌe Badiꞌa mone azaḡa zu emeḡe teite Badiꞌaꞌa hufiroteꞌe azaḡa. Zae zamaroneꞌe Iesu mazao toꞌi. Eme Iesuꞌe Badiꞌa apostolo vazeḡa zu dibuꞌo vazeḡa ḡihiꞌaḡa rae fureneꞌohe. 2 Moseꞌa Badiꞌa ne azaḡa niduꞌa veize zamaḡa niduꞌa hina gaue huniro. Ani teige, Iesu zuni ane mae ohoniroteꞌe Badiꞌaḡa veize zamaḡa niduꞌa hina gaue huniro. 3 Ne ogoruꞌeteꞌe vazeḡa niꞌe ne eꞌe vitine ufeta ḡihiꞌa hune. Eꞌe teige, Iesu niꞌe Mose ni vitine ufeta ḡihiꞌa hune rae raꞌetaꞌaꞌe duduḡa. 4 Ne tibatibaꞌe vaze ꞌahogaꞌahoganiꞌa ogoruꞌohe, rehano Badiꞌaꞌe ḡau niduꞌa ogoraro. 5 Moseꞌe Badiꞌaꞌa vesuꞌu ḡoreziteꞌe ḡauḡa rae furenifine Badiꞌa tuḡure vazeḡa radu Badiꞌa ne azaḡa niduꞌa veize zamaḡa niduꞌa hina gaue huniro. 6 U Kerisoꞌe Badiꞌa Ubuga radu Badiꞌa ne azaḡa veize zamaḡa niduꞌa hina gaue huniro. Eme Badiꞌaꞌa ḡoitoriroteꞌe manohugaḡa mae ḡihineꞌenaꞌa ꞌaune guhinine zu eꞌe moneo mene rihauꞌenaꞌa nigunine, emeꞌe Badiꞌa ne azaḡa rae raꞌohe.
Mene Fieꞌeteꞌe Azaḡa Riḡa Iraduguziro
7 Eꞌanoꞌo Vine Zaḡoḡaniꞌa ꞌahige raꞌohe,
“Zaꞌe izidi Badiꞌa ago egoꞌidene,
8 vouḡaze teige zamaze ago rinedoꞌi.
Zae vouḡazeꞌa haba bohaꞌano Badiꞌa, eḡe tuhuhe nuriroteꞌe madaḡano
e agirohiro.
9 Vouḡazeꞌe eḡeꞌa muri 40 zamaḡano nagini haḡairoteꞌe horoniro rehano,
eꞌea eḡe tuhuhe nuriro.
10 Eꞌanoꞌo eḡeꞌa zeḡe mazao maḡuniro,
ebu ꞌahige rae reiro, 'Zeḡe zamaꞌe iḡaiḡa ibi veꞌoḡano onameꞌohe,
zu ze eḡe ibi mene ederiro.'
11 Eꞌanoꞌo eḡeꞌa maḡunadu ḡoere ꞌadi rinede tiro,
'Eḡeꞌa zeḡe veize ahiri ohoniteꞌe habaꞌa ruhibiro rehano,
zeꞌe mene hune diuḡiꞌuma.'”✡3:11 Salamo 95:7-11
12 Nego nabudi, zae boꞌaḡano vazeni ꞌahoga zuni zamaḡa sauꞌa hina fieꞌenaꞌa ḡabode radiuꞌeteꞌe Badiꞌaḡa mazaonoꞌo mene farau vaḡinifine tohutohoꞌi. 13 Rehano Izidi rae huneꞌeteꞌe madaḡa niduꞌa zamaḡano, za zaeꞌa bare inaratitoꞌi. ꞌOugine, haḡai sauꞌaniꞌa zae boꞌaḡano vazeni ꞌahoga zamaḡa mene soꞌonadu zamaḡa mene rinediꞌuma. 14 Emeꞌa ḡadaheḡano Keriso mazao fie gigararo. ꞌOuge fie gigaruꞌeteꞌe obone gigane onamo ḡonaga meine, Keriso teite manohuga dainiꞌuma. 15 Buka Zaḡoḡano ꞌahige rae reiro,
“Izidi zaꞌe Badiꞌa ago egoꞌidene,
vouḡazeꞌa ani mazaonoꞌo ḡihuradu agirohaudoteꞌe teige,
zamaze ago rinedoꞌi.”✡3:15 Salamo 95:7-8
16 Badiꞌa ago igiro rehano, ani agiroharoteꞌe azaḡaꞌe iniu? Aꞌe Moseꞌa Izipi habaꞌanonoꞌo tutuze vaḡiziroteꞌe azaḡa niduꞌa! 17 Badiꞌaꞌa muri 40 zamaḡano iniu mazao maḡuniro? Aꞌe haḡai sauꞌa haḡairo ꞌahine, rudanadu ahirizeꞌa haba bohaꞌano higau bauriroteꞌe azaḡa! 18 Badiꞌaꞌa iniu mazao ahiri ohoneꞌeteꞌe habaꞌa aniꞌa ruhibirotaꞌaꞌe mene hune diuḡiꞌuma rae ḡoere rinede tiro? Aꞌe Badiꞌa ḡoere mene egoharoteꞌe azaḡa! 19 Eꞌanoꞌo emeꞌe edeḡa, ze Badiꞌa mazao mene firoteꞌe uꞌano, ahiri ohoniteꞌe habaꞌa diuḡoga mene idararo.