1 Eꞌanoꞌo emeꞌe Keriso moneo ihore ufiḡaufiḡa roꞌanadu bororu idararoteꞌe azaḡaniꞌa meiteꞌe ihoreḡa edere onamihi. Emeꞌe ihore ufiḡaufiḡa eꞌe barebare ederihi rae mene inariꞌuma. Ihore ufiḡaufiḡa aꞌe rune haḡaiḡanonoꞌo ḡihureꞌeteꞌe zu Badiꞌa mazao fieꞌeteꞌe moneo ihoreḡa, 2 ebu babatiso zu ahiri vuzuꞌeꞌeteꞌe goroḡa nu*6:2 Badiꞌa zamao ahiri deheneꞌeteꞌe goroḡa nu. Iuda azaḡa haḡai. moneo ihoreḡa, ebu ꞌevore vaze rana tiꞌeteꞌe zu runeonoꞌo bare ḡaboditeꞌe moneo ihoreḡa, zu Badiꞌa kotao meiteꞌe naeḡa radiu tuḡutuḡu moneo ihoreḡa raꞌohe. 3 ꞌUguḡaꞌe mene barebare ederihi rae reꞌuma, rehano ufeta riḡa ihoreḡa ederihi rae reꞌuma. Badiꞌaꞌa uratine, ꞌouge ederogaꞌe idaraꞌuma.

4 Vaze nuꞌe ibite Badiꞌa agaḡano radiro, ebu Badiꞌa mazaonoꞌo meiroteꞌe ḡahunoneḡaꞌe ufeta manoḡa rae ederiro, ebu ekalesia azaḡa teite Vine Zaḡoḡa madu Vine Zaḡoḡa gau haḡairo, 5 ebu Badiꞌa ḡoere manoḡa ederiro, zu vesuꞌu ariteꞌe madaḡano fureratiteꞌe gigiꞌaḡa ederiro. 6 Rehano ꞌuguḡa azaḡaniꞌa uitadu Badiꞌa mazaonoꞌo faraune, zamaze bare ḡihunoga veize ze tutuze arogaꞌe mene idaḡa. Mazaḡa ze Badiꞌa Ubuga bare satauroneadu hunio ani mae mazagaroneꞌeteꞌe heuḡa.

7 Iruguꞌa rahao ḡae ḡehaḡa ruꞌauꞌetene, rahaꞌe abutanadu hihi azaḡa veize ogomu manoḡaniꞌa hudauꞌohe. ꞌOugeꞌetene, raha aꞌe Badiꞌa manohuga hideꞌohe. 8 Rehano rahaꞌa renone zu meigameiga ḡuhuneꞌetene, raha aꞌe huga oꞌoꞌa radu radiu tuḡutuḡu adugaḡa hideꞌohe ebu ḡonaganoꞌe hufi haoniꞌuma.

9 Emeḡe zamarone azaḡa, emeꞌa ꞌouge raꞌe rehano, emeꞌe hube hune edeḡa, ḡau ufeta manoḡa huneꞌe zaeꞌa meiro. Aꞌe ḡabone hideꞌeteꞌe ibiḡano zae tutuzeꞌeteꞌe ḡauḡa. 10 Badiꞌaꞌe iḡaiḡa duduḡano haḡaeꞌe ꞌahine, zaeꞌa haḡairoteꞌe haḡaiḡa mene aḡutu modiꞌuma. Zaeꞌa Badiꞌa mone azaḡa danaziro zu izidi zuni danazeꞌohe. Eꞌe ibiḡano zaeꞌa Badiꞌa zamare borofeꞌeteꞌe ane mazao fureneꞌohe. Eꞌe moneo aniꞌa mene aḡutu modiꞌuma. 11 Eme urateꞌohe, zae tibatiba ꞌouge vaze danazeꞌenaꞌa Badiꞌa veize gaue inareꞌeteꞌe furene onamo mada ḡonaga meꞌuma. ꞌOugine, zaeꞌa mae ḡihineꞌenaꞌa guhineꞌeteꞌe manohugaḡaniꞌa zama moneo hube hune hudaꞌuma. 12 Eme zaꞌe tubuḡa rouga mene urateꞌohe, rehano Badiꞌa mazao fieꞌenaꞌa zu zamaze obone giganeꞌenaꞌa, Badiꞌaꞌa ḡoitoriroteꞌe ḡauḡa maꞌeteꞌe azaḡa tuhutuhuzoga urateꞌohe.

13 Badiꞌaꞌa Aberahamo mazao ḡoitorirotene, aniꞌa ane niḡano ḡoitore ḡoeꞌa eꞌe rinede tiro, mazaḡa Badiꞌa ufeta vitine ḡihiꞌaḡa vazeḡani ꞌahogaꞌe oꞌoꞌa. 14 Aniꞌa Aberahamo ꞌahige rae niro, “E hube hune manohuga ḡaniꞌuma zu marigo ḡehaḡa ḡaniꞌuma.”✡6:14 Ḡadaheḡa 22:17 15 ꞌOugadu Aberahamoꞌe zamaḡa obone giganeꞌenaꞌa guhiniroteꞌe enogano Badiꞌaꞌa ḡoitoriroteꞌe ḡauḡa hidiro.

16 Vazeꞌa ḡoere rinede tiꞌetene, ani ufeta vitine ḡihiꞌa vazeḡa niḡano ḡoere rinede tiꞌohe. ꞌOugine, eꞌe ḡoeꞌaꞌe aniꞌa hube hune hegotiꞌuma rae raꞌeteꞌe ḡoeꞌa radu taꞌirotitoga niduꞌa ꞌueꞌohe. 17 Badiꞌaꞌa toganirotaꞌaꞌe mene hune nufeꞌohe. Eꞌe moneo, aniꞌa ane ḡoitore ḡoeꞌa meiteꞌe azaḡa deheru ihozoga uratiro. Eꞌanoꞌo aniꞌa ḡoitorirotene, ane ḡoere rinede teadu hube hune hegotiꞌuma rae ohoziro. 18 Badiꞌaꞌe emeḡe mazao ḡoitoriro zu ani ḡoere rinede tiro. Ḡoere aheu aꞌe mene hune nufeꞌohe, mazaḡa Badiꞌaꞌe mene hune ḡurireꞌohe. Aniꞌa ꞌouge haḡadu ane ḡoere aheu hina eme inarafi rufeꞌohe. Emeꞌe zama moneo meiteꞌe manohugaḡa mae ḡihineꞌenaꞌa guhinifine, raha ḡaboneḡanonoꞌo feraro. 19 Emeꞌa mae ḡihineꞌenaꞌa guhineꞌeteꞌe manohugaḡaꞌe, vine moneo ḡasi miniḡa heuḡa. Aꞌe emeḡe vine obone giganeꞌohe zu bireꞌohe. Emeꞌa eꞌe mae ḡihineꞌenaꞌa guhineꞌetene, adureo kuru habaꞌa diuḡeꞌohe. Aꞌe, kuru taruhaḡa zamaḡano dabuaḡa ḡarunao Haba Zaḡoḡa Huneo diuḡeꞌeteꞌe heuḡa. 20 Iesuꞌe emeḡe veize emeḡe vitife eꞌea diuḡiro. Aniꞌe Melekizedekaꞌa dibuꞌo vazeḡano reiroteꞌe ibiḡa idunaḡano, dibuꞌo vazeḡa ḡihiꞌaḡa tuḡutuḡu reiro.