8
Ḡoitore Iziga hina Ohoniroteꞌe Dibuꞌo Vazeḡa Ḡihiꞌaḡa
1 Emeꞌa raꞌeteꞌe ḡoeꞌa boroꞌe ꞌahi eꞌe: Emeḡe mazao dibuꞌo vazeḡa ḡihiꞌaḡa ꞌuguḡaꞌe radiuꞌohe. Aniꞌe adureo Gigiꞌa Hune Kiniḡa ehoro habaꞌa edaꞌeḡano ehoriro. 2 Aniꞌe haba zaḡoḡano Badiꞌa veize gaueꞌohe. Haba zaḡoḡa aꞌe dibuꞌo taruhaḡa huga. Aꞌe vazeꞌa mene ohoniro, rehano Zuhiꞌa Boroꞌa ohoniro.
3 Dibuꞌo azaḡa ḡihiꞌaḡa niduꞌaꞌe dibuꞌo zu ḡahunone Badiꞌa hanoga veize ohozeꞌohe. Eꞌanoꞌo emeḡe dibuꞌo vazeḡa ḡihiꞌaḡa zuni dibuꞌo ꞌahoga madu Badiꞌa hau huniꞌuma rae reiro. 4 Aniꞌe rahao radifone, dibuꞌo vazeḡano mene reifo, mazaḡa rahaoꞌe Mose goro ḡoeꞌa idunaḡano ḡahunone hauꞌeteꞌe azaḡaꞌe radiuꞌohe. 5 Dibuꞌo azaḡaꞌe haba zaḡoḡano Badiꞌa mazao kurauꞌohe. Ze kurauꞌeteꞌe ibiḡaꞌe adureo radiuꞌeteꞌe ḡauḡa iraḡa mae fareꞌeteꞌe heuḡa. Eꞌe uꞌano, Moseꞌa dibuꞌo taruhaḡa ogoratihi reirotene Badiꞌaꞌa ihore ḡoeꞌa riḡa ꞌahige rae niro, “Eḡeꞌa maḡano ihoꞌiroteꞌe iraḡa idunaḡano faifairu zamareꞌenaꞌa, ḡau niduꞌa haḡaoꞌi.”✡8:5 Vaḡiniro 25:40 6 Rehano Iesuꞌa meiroteꞌe gauḡaꞌe dibuꞌo azaḡa gau ufeta roꞌane ḡihiꞌaḡa. Iesuꞌe Badiꞌa zu ane vaze nemaḡano edanadu ḡoitore iziga reiro. Ḡoitore izigaꞌe amahiḡa ufeta vitine manoḡa, mazaḡa Badiꞌaꞌa ibite tiroteꞌe ḡoeꞌa rana ḡoitore ḡoeꞌa ufeta manoḡa ohoniro.
7 Ḡoitore ḡoeꞌa ibiꞌaꞌe veꞌoḡa oꞌoꞌa reifone, ḡoitore ḡoeꞌa aheuḡaꞌe eꞌe iḡuꞌa mene meifo. 8 Rehano Badiꞌaꞌa ane mone azaḡa mazao veꞌoḡa horoniro ebu ꞌahige rae reiro,
“Zuhiꞌa Boroꞌa raenaꞌa,
'Mada ꞌahoganiꞌa ariꞌuma.
Eꞌe madaḡano eḡeꞌa Isaraela azaḡa zu Iuda azaḡa teite
ḡoitore iziga ohoniꞌuma.
9 Ḡoitore izigaꞌe eḡeꞌa Izipi habaꞌanonoꞌo
vouḡazeꞌe ꞌevorehe hina abizadu tutuze vaḡizirotene,
vouḡaze teite ohoniroteꞌe ḡoitoreḡa ḡoeꞌa mene heuḡa.
Ze eḡe ḡoitore ḡoeꞌa zamaze niduꞌa hina mene hegotiro ꞌahine,
e zeḡe mazaonoꞌo ḡihuriro.'
10 Zuhiꞌa Boroꞌa bare ꞌahige raꞌohe,
'Goro ḡoeꞌa amahiḡa madaḡa enogano
eḡeꞌa Isaraela azaḡa teite ohoniteꞌe ḡoitoreḡa izigaꞌe ꞌahi eꞌe:
Eꞌe zeḡe zamaroneo eḡe goro ḡoeꞌa tiꞌuma,
ebu zamazeo mirihiꞌuma.
Eꞌe zeḡe Badiꞌa reꞌuma,
ebu zeꞌe eḡe vaze reꞌuma.
11 Vaze ꞌahoganiꞌa nabuga ga negoḡa mazao
Zuhiꞌa Boro ederoꞌi rae mene ihoniꞌuma,
mazaḡa zeḡe niduꞌa zuhuꞌanonoꞌo onamo boro ḡonaga,
eḡe ederiꞌuma.
12 Eꞌe zeḡe haḡai sauꞌa aḡutu modiꞌuma,
zu zeḡe haḡai sauꞌa mene bare zamariꞌuma.'”✡8:8-12 Ieremia 31:31-34
13 Badiꞌaꞌa “ḡoitore iziga,” moneo ḡoeradu ḡoitore ḡoeꞌa ibiꞌaꞌe amahiḡa rae reiro. Amahiḡa ḡauḡa zu mahiruꞌeteꞌe ḡauḡaꞌe ḡarihe hauḡiꞌuma.