10
Kerisoꞌe Mada Niduꞌa veize Aneꞌa Bare Ḡae Tiba Daꞌo Ane Dibuꞌiro
1 Mose goro ḡoeꞌaꞌe vesuꞌu ariteꞌe ḡauḡa manoḡa iraḡa mae fare tauḡiroteꞌe ḡauḡa. Aꞌe mene huga. Eꞌanoꞌo eꞌe goro ḡoeꞌano muri niduꞌa barebare iraḡa tiba dibuꞌoḡa hina dibuꞌohauꞌetaꞌaꞌe, Badiꞌa vaḡe areꞌeteꞌe azaḡa veꞌoḡa niduꞌa mae vaḡinoga mene idaḡa. 2 Mose goro ḡoeꞌaniꞌa vaze veꞌoḡa niduꞌa mae vaḡinoga idarafone, Badiꞌa mazao kurauꞌeteꞌe azaḡaꞌe mada niduꞌa veize ḡae tiba daꞌo dehezifo, ebu haḡaize sauꞌa uꞌano zamazeꞌa mene bare adudafo. ꞌOugifone, dibuꞌo azaḡaniꞌa dibuꞌohauꞌetaꞌaꞌe hauḡifo. 3 Rehano muri niduꞌa dibuꞌohauꞌeteꞌe uꞌano vazeꞌa haḡaize sauꞌa barebare zamareꞌohe, 4 mazaḡa boromakau ohozeḡa ru ga gouti ruꞌa haḡaize sauꞌa mae vaḡinogaꞌe mene idaḡa. 5 Eꞌanoꞌo Kerisoꞌa raha ꞌadao ovairotene, Badiꞌa mazao ꞌahige rae reiro,
“Dibuꞌo zu ḡahunoneꞌe ḡa mene uratiro,
rehano ḡaꞌe eḡe veize ahirihe ruhibiro.
6 Ḡaꞌe hufi haoneꞌeteꞌe dibuꞌoneḡa zu haḡai sauꞌa rae modoga veize hauꞌeteꞌe dibuꞌoḡa uꞌano mene matuꞌiro.
7 ꞌOugadu e ꞌahige rae reiro, 'O Badiꞌa, e ꞌahi eꞌe.
Buka Zaḡoḡano eḡe moneo mirihiroteꞌe teige,
ḡae ura haḡaoga veize ariro.ꞌ”✡10:5-7 Salamo 40:6-8
8 Ibite geno Kerisoꞌa Badiꞌa mazao ꞌahige rae reiro, “Ḡaꞌe dibuꞌo zu ḡahunone, hufi haoneꞌeteꞌe dibuꞌoḡa, zu haḡai sauꞌa uꞌano hauꞌeteꞌe dibuꞌoḡa mene uratiro zu ꞌuguḡa uꞌano mene matuꞌiro.” Eꞌeguḡaꞌe Mose goro ḡoeꞌa idunaḡano hauꞌeteꞌe dibuꞌoḡa. 9 Eꞌe enogano ani ꞌahige rae reiro, “E ꞌahi eꞌe. Eꞌe ḡae ura haḡaoga veize ariro.” Eꞌanoꞌo Kerisoꞌe dibuꞌo aheuḡa ohonoga veize dibuꞌo ibiꞌa mae vaḡiniro. 10 Badiꞌa ura idunaḡano, Iesu Kerisoꞌa mada niduꞌa veize ḡae tiba daꞌo ahiꞌa dibuꞌoharoteꞌe uꞌano, emeꞌe zaḡoḡa rae reiro.
11 Dibuꞌo azaḡa niduꞌaꞌe mada niduꞌa Badiꞌa veize gaueꞌohe. Eꞌe madaḡano ze barebare iraḡa tiba dibuꞌoḡa hina dibuꞌohauꞌohe. Rehano dibuꞌo ꞌuguḡaniꞌa haḡai sauꞌa mene mae vaḡineꞌohe. 12 Rehano Kerisoꞌe haḡai sauꞌa rae modifine mada niduꞌa veize dibuꞌo tiba hina dibuꞌoharo. Ebu aniꞌe Badiꞌa edaꞌe moneo ehoriro. 13 Eꞌe madaḡanonoꞌo ani guhiuꞌohe, onamo Badiꞌaꞌa agireḡa edeze ḡahiziteꞌe madaḡa meꞌuma. 14 Haḡaize sauꞌanonoꞌo Zaḡoḡano reiroteꞌe azaḡaꞌe Kerisoꞌa mada niduꞌa veize dibuꞌo tibuhuga hina dibuꞌohanadu veꞌoḡani ꞌahoga oꞌoꞌa azaḡano ohoziro.
15 Vine Zaḡoḡa zuni eꞌe moneo emeḡe mazao rae fureneꞌohe. Ibite geno aniꞌa ꞌahige raꞌohe,
16 “Zuhiꞌa Boro Badiꞌaꞌa ꞌahige raꞌohe,
'Ḡoitore ḡoeꞌa amahiḡa madaḡa enogano,
eḡeꞌa zeḡe veize ohoniteꞌe ḡoitore ḡoeꞌaꞌe ꞌadi eꞌe.
E zamazeo eḡe goro ḡoeꞌa tiꞌuma,
ebu zamaronezeo mirihiꞌuma.'”✡10:16 Ieremia 31:33
17 Ebu bare raenaꞌa,
“Eꞌe haḡaize sauꞌa zu goro ḡoeꞌa variꞌeꞌeteꞌe haḡaiḡa
mene bare zamariꞌuma.”✡10:17 Ieremia 31:34
18 Haḡaize ꞌuguḡaꞌe Badiꞌaꞌa aḡutu modadu haḡaize sauꞌa uꞌano dibuꞌohanoga mene bare urateꞌohe.
Badiꞌa mazao Fieꞌenaꞌa, Edau Gigaraꞌuma
19 Eꞌanoꞌo, nego nabudi, emeꞌe Iesu ru uꞌano, mene rihauꞌenaꞌa Haba Zaḡoḡa Huneo diuḡeꞌohe. 20 Iesuꞌa Haba Zaḡoḡa Hune ꞌueꞌeteꞌe dabuaḡa bohanadu ḡabone rifiteꞌe ibiḡa iziga vavaꞌiro. Eꞌe dabuaḡaꞌe Iesu ahiri. 21 Ebu Badiꞌa ne azaḡa zuhiꞌaziꞌeteꞌe dibuꞌoḡa vazeḡa boro huneꞌe emeḡe teite radiuꞌohe. 22 Eꞌanoꞌo eme fie huneꞌenaꞌa, zama niduꞌa hina Badiꞌa vaḡe onamihi. Iesu ru hina zamafe itine vanadu emeḡe haḡai sauꞌa uꞌano zamafeꞌa aduduꞌeteꞌeanoꞌo vaḡiniro, zu vu deheḡa hina ahirife vuzuꞌe hauḡiro. 23 Badiꞌaꞌe aneꞌa ḡoitoriroteꞌe ḡoeꞌa hube hune haḡaeꞌohe. Eꞌanoꞌo eme Badiꞌa ḡoitore ḡoeꞌa mae ḡihineꞌenaꞌa guhineꞌeteꞌe rae furenihi, zu edau gigaranadu eꞌe ḡoeꞌa obone giganihi. 24 Ebu vaze zamare borofeꞌeteꞌe zu haḡai manoḡa haḡaeꞌeteꞌe moneo nougenouge inaratitoga zamare vaḡihi. 25 Vaze nuꞌa kuranoga veize tiburu nuꞌoruꞌeteꞌe ꞌuiro. Emeꞌe zeḡe haḡai mene hegotadu tiburu nuꞌoruꞌeteꞌe mene modihi. Ebu eme emeḡeꞌa bare inaratitihi. Eme Zuhiꞌa Boro Madaꞌa areꞌeteꞌe horoneꞌe ꞌahine, emeḡe niduꞌa ꞌouge ufeta haḡaihi.
26 Emeꞌa ḡoere huga moneo edeḡa meiroteꞌe enogano emeḡe urao haḡai sauꞌa haḡae onamine, eꞌe haḡaiḡa sauꞌa rae moditeꞌe dibuꞌoḡa ꞌahogaꞌe oꞌoꞌa hune. 27 Ebu Badiꞌa kotaꞌa ḡiḡarofiꞌuma zu ire roga boroꞌa Badiꞌa agire azaḡa iriꞌuma. 28 Iniuꞌa Mose goro ḡoeꞌa hezahoharotene, vaze aheu ga uḡiduꞌa ani haḡai veꞌoḡa rae furenadu ani mene vetuḡaniꞌenaꞌa mau runiro. 29 ꞌOugadu Badiꞌa Ubuga dauge edeneꞌeteꞌe vazeḡaꞌe aduga ufeta boro bagaḡa hiditeꞌe moneo zamariꞌuma. Badiꞌaꞌa ḡoitore ḡoeꞌa teadu Iesuꞌa ruḡa hina vaze eꞌe haḡaiḡa sauꞌanonoꞌo zaḡoḡano mae ohoniro. Rehano vaze aꞌe Iesu ruꞌe mene zaḡoḡa rae ovoe ḡianeꞌohe ebu manoḡa fureneꞌeteꞌe Vineḡa Zaḡoḡa rae sausauneꞌohe. 30 Eme Badiꞌaꞌa ꞌahige rae reirotaꞌaꞌe edeḡa, “Haḡai sauꞌa naeḡaꞌe eḡeꞌa baronohaꞌuma,”✡10:30 Goro 32:35 ebu bare raenaꞌa, “Zuhiꞌa Boroꞌa ane mone azaḡa kotaziꞌuma.”✡10:30 Goro 32:36 31 Ḡabode radiuꞌeteꞌe Badiꞌaḡaniꞌa ꞌevoꞌa gigiꞌaḡa hina aduga zinine, aꞌe ḡiḡaroḡa.
32 Ibite madaḡano zaꞌe Badiꞌa mazaonoꞌo agaḡa meiro. Eꞌe enogano aduga boro hidirotene, zamaze obone giganiro. Ibite madaḡa eꞌe bare zamaroꞌi. 33 Mada nuꞌe vazeꞌa hunio zae rae sausauzido zu aduga zinido. Mada nuꞌe zaeꞌa ꞌuguḡa adugaḡa hidiroteꞌe azaḡa mone edaudo. 34 Zaꞌe ḡuꞌa neḡano radiuꞌeteꞌe azaḡa vetuḡazi namizido. Ebu vazeꞌa zae toheze meizirotene zuni matuꞌuzeta mae ḡihizido, mazaḡa za ederiro, radiu tuḡutuḡu toheḡa ufeta manoḡa zaeꞌa meiro.
35 Eꞌanoꞌo zaeꞌa zamazeo hube hune mae ḡihineꞌeteꞌe ḡauḡa ago mae modoꞌi. ꞌOugine, Badiꞌaꞌa eꞌe naeḡa boro bagaḡa ziniꞌuma. 36 Zaꞌe zamaze obone giganiꞌuma. ꞌOugine, za Badiꞌa ura haḡae hauḡadu Badiꞌaꞌa ḡoitorirotaꞌaꞌe hidiꞌuma. 37 Buka Zaḡoḡano ꞌahige raꞌohe,
“Mada mene faḡano ariteꞌe vazeḡaniꞌa ariꞌuma,
ebu aniꞌe mene sasiꞌuma.
38 Eḡeꞌa duduḡa rae reiroteꞌe vazeḡaꞌe
fieꞌeteꞌe uꞌano radiꞌuma.
U aniꞌa eḡe mazaonoꞌo ie barine,
e ani mazao mene matuꞌiꞌuma.”✡10:37-38 Habaku 2:3-4
39 Emeꞌe ie baradu mene roꞌore ḡouriteꞌe azaḡa, rehano fieꞌeteꞌe uꞌano ḡabone hiditeꞌe azaḡa.