2
Iesuꞌa Fureraro
(Mataio 1:18-25)
1 Eꞌe madaḡano Roma habaꞌa kiniḡa niḡa Augusto, aniꞌa ane gau haḡaeꞌeteꞌe azaḡa veize ḡoere ꞌahige tuḡuriro. “Za Roma habaꞌa niduꞌa zamaḡano radiuꞌeteꞌe azaḡa niduꞌa nize moꞌi*sensisi!” 2 Kurenioꞌe Siria habaꞌa gavana vazeḡa raꞌeteꞌe zamaḡano ni maꞌeteꞌe ibiꞌaḡa meiro. 3 Eꞌanoꞌo vaze niduꞌaꞌe nize zouzifine, zeḡe zeḡe haba onamiro.
4 Iosefaꞌe Galilea habaꞌano Nazareta neḡano radiunu. Aniꞌe Davida mariga zu Beterehema neḡaꞌe Davida haba, eꞌanoꞌo ani Iudea habaꞌano Beterehema neḡa onamiro. 5 Iosefaꞌe Maria iraꞌauniro, eꞌanoꞌo aniꞌe Maria teite nize zounoga veize onamiro. Mariaꞌe ahiꞌeta. 6-7 Zeꞌa Beterehema neḡano feurirotene, iꞌudo neḡa zamaḡanoꞌe bazuni habaꞌa oꞌoꞌa. Eꞌanoꞌo zeꞌe boromakau neḡano radiro. Eꞌea radinuteꞌe zamaḡano, ene fureniꞌuma madaḡa meiro. Ebu Mariaꞌe ubuga ibiꞌa fureniro, zu dabua hina ꞌumadu, boromakau ḡubuneꞌeteꞌe siuvaḡa zamaḡano ufi tiro.
Aneruꞌa Mamoe Taufeꞌeteꞌe Azaḡa mazao Fureraro
8 Eꞌe oheꞌano, mamoe taufeꞌeteꞌe azaḡaꞌe Beterehema neḡa uhiḡano haba tauḡiḡano mamoe taufe radiudo. 9 Ebu Zuhiꞌa Boro tuḡure vigaꞌa tabara zeḡe mazao fureraro. Ebu Zuhiꞌa Boro agaḡaniꞌa agazirotene, zeꞌe rihau rudaro.
10 Rehano tuḡure vigaꞌa ziro, raenaꞌa, “Ago rihanoꞌi, rehano abitoꞌi! E hariḡa manoḡa zae ihozoga radu areha. Vaze niduꞌaniꞌa eꞌe igine matuꞌiꞌuma. 11 Izidi zae sauꞌaꞌonoꞌo ḡaboziꞌuma vazeḡa, Keriso Zuhiꞌa Boroꞌe Davida habao fureraneha. 12 Zaꞌe tahiꞌa komeꞌa dabua hina ꞌumadu boromakau ḡubuneꞌeteꞌe siuvaḡa zamaḡano bazunoga horonine, za tahiꞌaḡaꞌe Keriso rae ederiꞌuma.”
13 Aneru eꞌeꞌa ꞌouge reirotene, tabara adureꞌonoꞌo tuḡure viga ḡuḡuvaḡaniꞌa fureranadu ani teite Badiꞌa matuꞌo haro, raenaꞌa,
14 “Hitanaoꞌe Badiꞌa niguneꞌohe! U rahaoꞌe Badiꞌaꞌa matuꞌo ziniꞌeteꞌe azaḡa boꞌaḡano uniho manofeꞌohe!”
15 Aneru niduꞌaꞌa ḡoere hauḡirotene muhizadu adure itiro. Ebu mamoe taufeꞌeteꞌe azaḡaꞌe zeḡeꞌa bare neneḡaniro, raenaꞌa, “Aro, Zuhiꞌa Boroꞌa edemafeꞌateꞌe ḡauḡaniꞌa hudanateꞌe ḡianoga veize Beterehema neḡa onamihi!”
16 ꞌOugadu ze ḡarihe Beterehema neḡa onamiro. Ebu Maria zu Iosefa vaḡadu tahiꞌa komeꞌa boromakau ḡubuneꞌeteꞌe siuvaḡa zamaḡano bazeꞌenoga horoniro. 17 Ebu ze tahiꞌa komeꞌa moneo tuḡure vigaꞌa ḡoeriroteꞌe ḡoeꞌa ihoziro. 18 Vaze niduꞌaꞌe mamoe taufeꞌeteꞌe azaḡaniꞌa reiroteꞌe ḡoeꞌa igirotene zaguzagau ḡouriro. 19 Rehano Maria ani ꞌouge fureraroteꞌe haḡaiḡa niduꞌa mae zamao ofadu zamare radiu tauḡinu. 20 Mamoe taufeꞌeteꞌe azaḡaꞌe tuḡure vigaꞌa ziroteꞌe ḡoeꞌa niduꞌa fureraroteꞌe horoniro zu igiro. Eꞌanoꞌo ze Badiꞌa niguneꞌenaꞌa, bare mamoeze ꞌuꞌa onamiro.
21 Mada 8 meiroteꞌe zamaḡano, tahiꞌa ꞌadiꞌe ahiꞌa ogaḡa rana iḡuri haḡairo, ebu viꞌa moganiꞌa niḡa Iesu rae turahiro. Aꞌe viꞌa ize ene mene tougano tuḡure vigaꞌa reiroteꞌe niḡa.
Iesu Ierusalema Habaꞌa Zamahu Itiro
22 Mariaꞌa Iesu fureniroteꞌe enoḡano, mada 40 ꞌai vitaro. Eꞌanoꞌo Mose goro ḡoeꞌa idunaḡano, Iosefa zu Mariaꞌe ahirize deheneꞌeteꞌe madaḡa meirotene, tahiꞌa komeꞌa Zuhiꞌa Boro zamao ohonifine, Ierusalema habaꞌa zamahu itiro. 23 Mazaḡa Zuhiꞌa Boro goro ḡoeꞌaꞌe raenaꞌa, 'Ene ohozeḡa ibiꞌaꞌe niduꞌa Badiꞌa veize radu zaḡozaḡoniꞌuma ebu Zuhiꞌa Boro haꞌuma,' 24 ebu Zuhiꞌa Boro goro ḡoeꞌaꞌe bare raenaꞌa, 'Badiꞌa dibuꞌo hafine, viꞌa zu mogaꞌe Tubugo niniḡa ꞌaheu ga nini komeḡa ꞌaheu Badiꞌa haꞌuma.' Eꞌanoꞌo ze tahiꞌa komeꞌa zamahanadu Ierusalema habaꞌa itiro.
Simeonaꞌa Iesu moneo Ḡoeriro
25 Eꞌe madaḡano Ierusalema habaꞌano ohoze ꞌahoga niḡa Simeonaꞌa radiunu. Aniꞌe haḡaiḡa duduḡa zu Badiꞌa ḡoere hegoteꞌeteꞌe vazeḡa. Aniꞌe Isaraela azaḡa ḡaboziꞌuma vazeḡa Keriso guhine onainu, ebu Vine Zaḡoḡaꞌe ani mazao radiunu. 26 Vine Zaḡoḡaniꞌa Simeona ibite ꞌahige ihoniro, raenaꞌa, “Ḡaꞌe mene rudaꞌuma onamo Keriso horoniꞌuma.”
27 Ebu Simeonaꞌe Vine Zaḡoḡaniꞌa ibito hanadu kuru neḡa diuḡiro. Eꞌe madaḡano Mose goro ḡoeꞌa idunaḡano haḡaoga veize Iesuꞌe viꞌa moganiꞌa zamahu diuḡiro. 28 Ebu Simeonaꞌa Iesu mae ohanadu Badiꞌa matuꞌo haro, raenaꞌa,
29-30 “Zuhiꞌa Boro, ḡaꞌa ibite ihiro, raenaꞌa, 'Simeona, ḡa izema rudanoḡano vaze sauꞌaꞌonoꞌo ḡaboziteꞌe vazeḡa, Keriso horoniꞌuma.'
E izidi ubumahe hina ani horoneha! Eꞌanoꞌo eḡe, ḡae tuḡure vazeḡaꞌe zama roḡeḡaheta rune moneo tuḡuhe onamoꞌi!
31 Zuhiꞌa Boro, ḡaꞌe vaze niduꞌa zamao Keriso ruhibiro.
32 Agaḡa teiḡe, aniꞌe Iuda mene azaḡa Badiꞌa ihoziꞌuma. Zu ani uꞌano, ḡae tahiꞌa Isaraela azaḡa nize rae ḡihiziꞌuma.”
33 Iesu viꞌa mogaꞌe Simeonaꞌa Iesu moneo reiroteꞌe ḡoeꞌa igirotene zaguzagaro. 34 Ebu Simeonaꞌa ze veize kuraro, zu viꞌa Maria niro, raenaꞌa, “Tahiꞌa ꞌadiꞌe Badiꞌaꞌa ohotiro. Isaraela azaḡa nuꞌe ani mene mae ḡihinine, zeꞌe ḡabone ibiḡanonoꞌo buaꞌuma. U vaze nuꞌe ani mae ḡihinine, zeꞌe ḡabone ibiḡano edaꞌuma. Ebu vazeꞌa ani mazaonoꞌo Badiꞌaꞌa gaueꞌeteꞌe horoniꞌuma, rehano vazevazeꞌa ani ꞌuꞌuꞌiꞌuma. 35 Ebu hena, vaze zamaroneze sauꞌa niduꞌa fureraꞌuma. Ebu zama moneoꞌe tahiꞌa ꞌahi uꞌano, benisiꞌa ḡouneꞌeteꞌe teige, zamaḡoꞌe adudaꞌuma.”
Anaꞌa Iesu moneo Ḡoeriro
36 Peroveta roḡaeḡa ꞌahoga niḡa Ana, ani zuni Ierusalema habaꞌano radiunu. Aniꞌe Fanuela aboḡa ebu Asera mariga roḡaeḡa. Aniꞌe roḡae vouḡaḡa. Ani hahuradu muri 7 enoḡano iꞌaniꞌa rudaro. 37 Ebu ḡozoba radiu onamo izidi muriḡa 84 ꞌai meiro. Aniꞌe iḡaiḡa kuru neḡa onaminu ebu madai zu ohere zaḡozaḡeꞌenaꞌa, Badiꞌa mazao kuraunu.
38 Simeonaꞌe Maria zu Iosefa teite ḡoeriroteꞌe zamaḡano, Anaꞌa zeḡe vaḡe onadu Badiꞌa matuꞌo haro. Ebu tahiꞌa eꞌe moneo vaze ziro, raenaꞌa, “Vaze niduꞌaꞌe Ierusalema agire azaḡa ꞌevoreonoꞌo mae buziteꞌe vazeḡa faḡa hune guhine onaeꞌohe. Tahiꞌa ꞌahiꞌe zeḡeꞌa guhineꞌeteꞌe vazeḡa!”
39 Iosefa zu Mariaꞌe Badiꞌa goro goeꞌa idunaḡano Ierusalema habaꞌano gau niduꞌa hauḡirotene, ze Galilea habaꞌano onamadu Nazareta neḡa bare feuriro. 40 Tahiꞌa komeꞌa Iesu ꞌai bororaro zu inariro. Ebu ani vaze huhuzaḡa reiro, zu Badiꞌa manoḡaꞌe ane mazao radiunu.
Iesuꞌa Kuru Neḡano Ḡoeriro
41 Muri niduꞌa Iḡine Modeꞌeteꞌe Muiḡa madaḡano Iesu viꞌa mogaꞌe Ierusalema habaꞌa itido. 42 Iesu ani muri 12 meirotene, iḡaiḡa haḡaidoteꞌe teiḡe, eꞌe Muiḡa augifine zeḡeꞌa Ierusalema habaꞌa itiro.
43 Ebu Mui hauḡadu Iesu viꞌa mogaꞌe neze onamiro. Rehano ze Iesuꞌe Ierusalema habaꞌano muhinirotaꞌe aḡuꞌa. 44 Iosefa zu Maria zeꞌe ꞌahige zamariro, 'Iesuꞌe vaze ḡunuḡano onameꞌohe.' Ze ibio onameꞌenaꞌa mada tiba vitinirotuꞌu, nabudize zu zeḡe teite onamiroteꞌe azaḡa boꞌaḡano Iesu vaḡiro. 45 Ebu ani mene horonirotene, ze bare ani vaḡeꞌenaꞌa Ierusalema habaꞌa itiro.
46 Ebu mada uḡiduḡa zamaḡano, kuru neḡano Iesu horoniro. Aniꞌe Mose goro ḡoeꞌa ihozeꞌeteꞌe azaḡa teite ehore radiunu, ebu zeḡe ḡoere iginu, zu ḡadimu nu haḡainu. 47 Vaze niduꞌaꞌe Iesu edeḡa zu aneꞌa naenaeziroteꞌe ḡoeꞌa igirotene zaguzagaro.
48 Viꞌa moganiꞌa horonandu ze zuni zaguzagaro. Viꞌaniꞌa Iesu niro, raenaꞌa, “Ubude! Nougadu ꞌougeha? Eme zamafe aduduꞌenaꞌa ḡae vaḡeha!” 49 Ebu Iesuꞌa naenaeniro, raenaꞌa, “Za nougadu e vaḡeha? ꞌAhiꞌe eḡe mama ne, eꞌanoꞌo e radeha. Za aꞌe mene ederahehe?” 50 Rehano viꞌa mogaꞌe aniꞌa nagini reirotaꞌaꞌe mene ederiro.
51 Eꞌe enoḡano Iesu ani zeḡe teite Nazareta neḡa ovoiro, ebu zeḡe tuḡure igiro. Viꞌaꞌe Iesu mazao fureraroteꞌe ḡauḡa niduꞌa ane zamao zamare radiunu. 52 Iesu ani zamaroneḡaniꞌa faine bororaunu zu ahiꞌaniꞌa farau bororu itinu. Ebu Badiꞌa zu vazeꞌa ane mazao matuꞌinu.