1 Iesuꞌa ane tahiꞌatahiꞌa teite Ierusalema hanitadu Oliva maḡano Benefage neḡano feuriro. Ebu tahiꞌaḡa ꞌaheu tuḡuzeꞌenaꞌa, ziro, 2 raenaꞌa, “Zama mone neḡa onamoꞌi. Eꞌe neḡa diuḡine, doniki ꞌahoga ꞌute touga ubuḡeta horoziꞌuma. Horozoꞌidene, fuhiꞌadu eḡe vaḡe odohe aroꞌi. 3 Iniu vazeꞌa ḡoere nu zoiꞌdene, 'Zuhiꞌa Boroꞌa urateꞌohe,' rae noꞌi. ꞌOugine ani zogone tuḡuziꞌuma.”

4 Aꞌe peroveta vazeḡaniꞌa Badiꞌa ḡoere reirotaꞌaꞌe hudaro, raenaꞌa,

6 Ebu tahiꞌaḡa ꞌaheuꞌa onamadu Iesuꞌa nagini ziroteꞌe haḡairo. 7 Ze doniki ubuḡeta odohe ane vaḡe onamadu dabuaze doniki ubuga ḡarunio zahariro, ebu Iesu ani rana tiriro. 8 Vaze ḡehaḡaniꞌa zeḡe dabua ibio hirau tiro, u vaze nuꞌe ire ezaga variꞌe madu ibi rana hiraro. 9 Iesu zamao onamiroteꞌe azaḡa zu ḡaruna hegotiroteꞌe azaḡaniꞌa huaro, raenaꞌa,

10 Ebu Iesuꞌa Ierusalema diuḡirotene, ne azaḡa niduꞌa haraeꞌenaꞌa ḡadimutitiro, raenaꞌa, “ꞌAdi iniu?” 11 Ebu vaze ḡuḡuvaḡaniꞌa naenaezinaꞌa, “ꞌAdiꞌe Iesu, peroveta vazeḡa. Galilea habaꞌa Nazareta neḡa vazeḡa.”

12 Ebu Iesuꞌa kuru neḡa habaꞌano diuḡiro. Diuḡadu dibuꞌo veize ḡahunone hoiteꞌeteꞌe zu seroneꞌeteꞌe azaḡa uhize ḡururuziro. Moni senise ziniꞌeteꞌe‡Kuru neḡa takesi veize azaḡa fata zu Tubugo niniḡa seroneꞌeteꞌe azaḡa ehoro habaꞌa mae ḡihuniro. 13 Ebu ani zinaꞌa, “Buka Zaḡoḡa zamaḡano ꞌahige mirihiro, raenaꞌa, 'Badiꞌa neꞌe vazeꞌa kurauꞌeteꞌe neḡa reꞌuma.' Rehano zaꞌa kuru neḡaꞌe ḡonore azaḡa habaꞌa teige haḡaeꞌohe!”

14 Ubuma kuru azaḡa ebu oda sauꞌa azaḡaniꞌa ani vaḡe kuru neḡa aradu aniꞌa faiziro. 15 Ebu dibuꞌo vazeḡa ḡihiꞌagihiꞌaḡa zu Mose goro ḡoeꞌa ihozeꞌeteꞌe azaḡaniꞌa ani haḡai gigiꞌa haḡairoteꞌe horoniro. Ebu tahiꞌa komeꞌakomeꞌa kuru neḡa habaꞌano huauꞌenaꞌa, “Davida mariḡa nigunoꞌi,” rae reiroteꞌe igiro. ꞌOugadu ze maḡune rudaro. 16 Ebu Iesu ḡadiniro, raenaꞌa, “Ḡa tahiꞌa komeꞌakomeꞌaniꞌa nagini raꞌetaꞌaꞌe igiꞌohe? Ze gararoꞌi!” Aniꞌa naenaezinaꞌa, “E igiꞌohe. Rehano zaꞌe Buka Zaḡoḡa mene hune meꞌodirohe? Aꞌe raenaꞌa, 'Badiꞌaꞌa tahiꞌa komeꞌakomeꞌa zu ḡuraḡaḡuraḡaniꞌa ani nigunoga ihoziro.'21:16 Salamo 8:2” 17 Eꞌe enogano ani ze muhizadu Betani neḡa onamiro ebu ohere eꞌea baziro.

18 Irarirotene oherebau uzeuze Iesuꞌa Ierusalema bare onamiroteꞌe zamaḡano ani vininiro. 19 Ebu figi ireḡa ibi ḡenaḡano horonadu huga vaḡe onamiro. Rehano ire huga oꞌoꞌa zu rouḡa daꞌo horoniro. Aniꞌa ire eꞌe niro, raenaꞌa, “Ḡa mene bare hudaꞌuma!” Ebu ire eꞌeꞌa zogone roraro.

20 Ane tahiꞌaḡaniꞌa eꞌe horonirotene, ze zaguzaganadu ḡadiniro, raenaꞌa, “Nougenouge figi ireḡaniꞌa ḡarihe roraneha?” 21 Iesuꞌa naenaezinaꞌa, “E hube hune ziꞌohe, za Badiꞌa mazao fiine zu mene ꞌadaꞌadine, eꞌa figi ire mazao haḡaꞌateꞌe zaeꞌa zuni haḡaiꞌuma. Ebu maḡa ninaꞌa, 'Ḡihitadu davara zamaḡano buanoꞌi,' rae reine, aniꞌe zae ḡoere igiꞌuma. 22 Zaꞌa fieꞌenaꞌa, nagini kuruo umineꞌeteꞌe ḡauḡaꞌe hidiꞌuma.”

23 Eꞌe ḡarugano, Iesuꞌa kuru neḡa diuḡadu vaze ihozirotene, dibuꞌo vazeḡa ḡihiꞌaḡaḡihiꞌaḡa zu vaze boroboroꞌa ani vaḡe onairo. Ebu ze Iesu ḡadiniro, raena, “Ḡa noꞌe gigiꞌaḡa hina ꞌahiguḡa haḡaeꞌohe? Iniuꞌa ꞌahi gigiꞌaḡa ḡaniro?” 24 Iesuꞌa naenaeziro, raenaꞌa, “Eḡe zuni ḡadimu ꞌahoga zinihi. Zaꞌa naenaehine, e zuni noꞌe gigiꞌaḡa hina ꞌahi ḡauḡa haḡaeꞌeteꞌe ihoziꞌuma. 25 Ioaneꞌa bapatizo haḡainutaꞌaꞌe Badiꞌa mazaonoꞌo ga vaze mazaonoꞌo?” Ze zeḡeꞌa bare ḡoaniro, raenaꞌa, “Badiꞌa mazaonoꞌo reine, 'Za nougadu Ioane ḡoere mene mae ḡihinido?' rae ifiꞌuma. 26 Rehano vazeꞌonoꞌo reine, vaze ḡuḡuvaḡaniꞌa eme mazao maḡuniꞌuma rihoneꞌohe, mazaḡa zeḡe niduꞌa Ioaneꞌe hube hune peroveta vazeḡa rae mae ḡihineꞌohe.” 27 Eꞌanoꞌo ze naenaeninaꞌa, “Eme aḡuꞌa.” Ebu Iesuꞌa zinaꞌa, “Eḡe zuni noꞌe gigiꞌa hina ꞌahiguḡa haḡaeteꞌe mene ihoziꞌuma.”

28 Ebu Iesuꞌa dibuꞌo azaḡa ḡihiꞌaḡaḡihiꞌaḡa zu vaze boroboro mazao hari idaidaḡa ꞌahoga ziro, raenaꞌa, “Za hari idaidaḡa ꞌahi abitadu huga zamaroꞌi. Vaze ꞌahoganiꞌa ubuga ꞌaheu teite radiunu. Ani ene ibiꞌa vaḡe onamadu niro, raenaꞌa, 'Ubude, ḡa izidi vaini mebaḡano gaui onamoꞌi.' 29 Ebu ubuganiꞌa naenaeninaꞌa, 'E mene onamiꞌuma.' Rehano ani vesuꞌu zamaḡa ḡihunadu onamiro. 30 Ebu moganiꞌa ubuga veḡa vaḡe onamadu ene ibiꞌa niroteꞌe ḡoeꞌa niro. Ene veḡaniꞌa naenaeninaꞌa, ꞌOꞌe, onamiꞌuma.' Rehano ani mene onamiro. 31 Zaꞌa zamareꞌetene, ubuga ꞌaheu boꞌaḡano iniuꞌa moga ura haḡairo?” Zeꞌa naenaeninaꞌa, “Ene ibiꞌa.”

Ebu Iesuꞌa hari hugaꞌe ihoziro, raenaꞌa, “E hube hune ziꞌohe, takesi azaḡa zu moni veize ahirize seroneꞌeteꞌe azaḡaꞌe Badiꞌaꞌa ibite ibitoziniꞌuma. Zeḡeꞌa zae vitiziꞌuma. 32 Ioane Babatisoꞌe ibi duduḡa ihozoga radu zae vaḡe onairo, rehano za mene mae ḡihiniro. U takesi azaḡa zu moni veize ahirize seroneꞌeteꞌe azaḡaꞌe ani ḡoere mae ḡihiniro. Za zeꞌa haḡairotaꞌaꞌe horoniro rehano, zae sauꞌanonoꞌo mene ḡihuradu ani mene mae ḡihiniro.”

33 Iesuꞌa bare ziro, raenaꞌa, “Hari idaidaḡa ꞌahoga egoꞌi. Vaze ꞌahoganiꞌa vaini mebaḡa ḡoraro, ebu hadi ḡabiriḡa meraro. Aniꞌa vaini vuḡa gigeꞌeteꞌe ḡauḡa haḡairo zu ehamuꞌeteꞌe taruhaḡa hitanao hadi hina haḡairo. Ebu hihi azaḡa nu ꞌevoreo teadu hiriveꞌeteꞌe madaḡano huga nuꞌe aniꞌa meꞌuma rae reiro. Ebu aniꞌe haba ꞌahoga onamadu mada faḡa ragaviro.

34 Hiriveꞌeteꞌe madaḡa hanitirotene, vaini maḡa nu mouga radu ani tuḡureḡa azaḡaꞌe hihi azaḡa eꞌe vaḡe tuḡuze onamiro. 35 Rehano zeꞌa tuḡure azaḡa obone teadu tibaꞌe bouniro, ꞌahogaꞌe maro ebu ꞌahogaꞌe hadi hina mau bohiniro. 36 Hena aniꞌa tuḡureḡa azaḡa ibiꞌa vitine ufeta ḡehaḡa ze vaḡe bare tuḡuziro. Ebu zeꞌa tuḡure azaḡa eꞌe mazao haḡai tiba eꞌe bare haḡairo.

37 Ḡonaḡano, aniꞌa ubuga ze vaḡe tuḡuniro ebu raenaꞌa, 'Zeꞌe eḡe ubude uꞌu ḡubaniꞌuma gaogi.' 38 Rehano hihi azaḡaniꞌa ubuga horonirotene, zeḡeꞌa neneḡaniro, raenaꞌa, 'Aniꞌe vaini mebaḡa ꞌadi meꞌuma vazeḡa. Aro matihi, ebu vaini mebaḡa ꞌadi emeḡeꞌa meꞌuma!' 39 Eꞌanoꞌo zeꞌa ani obone teadu vaini mebaḡanonoꞌo ani uhine bunadu mau runiro.” 40 Ebu Iesuꞌa dibuꞌo azaḡa ḡihiꞌaḡaḡihiꞌaḡa zu vaze boroboro ḡadizeꞌenaꞌa, “ꞌOugadu vaini mebaḡa vazeḡaꞌe hihi azaḡa eꞌe vaḡe onaine, ze mazao nagini haḡaiꞌuma?” 41 Ze naenaeninaꞌa, “Aniꞌa hihi azaḡa eꞌe mau ruziꞌuma. Ebu vaini mebaḡaꞌe hihi azaḡa ꞌahoga nu ziniꞌuma, ebu hiriveꞌeteꞌe madaḡano zeḡeꞌa ani huga nu haꞌuma.”

42 Iesuꞌa ziro, raenaꞌa, “Zaꞌe Buka Zaḡoḡa mene meꞌodirohe? Aꞌe raenaꞌa,

43 Eꞌanoꞌo eḡeꞌa ziꞌohe, Badiꞌaꞌa zae Isaraela azaḡa mene ibitoziniꞌuma ebu Badiꞌaꞌa ane ura haḡaeꞌeteꞌe habaꞌa ꞌahoga azaḡa ibitoziniꞌuma. 44 Iniuꞌa hadi eꞌe rana higaune, ani vahegu tahitahiꞌuma, zu hadi eꞌeꞌa iniu rana higaune, aniꞌe seꞌetiꞌuma.”

45 Dibuꞌo azaḡa ḡihiꞌaḡihiꞌaḡa zu Farisea azaḡaniꞌa Iesu hari idaidaḡa igirotene, Iesuꞌa zeḡe moneo reirotaꞌaꞌe ederiro. 46 Eꞌanoꞌo zeꞌe ani obone tihi reiro. Rehano vaze ḡuḡuvaḡaniꞌa ze mazao maḡuniꞌuma radu rihoziro, mazaḡa ze aniꞌe peroveta vazeḡa rae mae ḡihiniro.