Iesu Keriso Hari Manoḡa Marekoꞌa Mirihiro
1
Ioane bapatizoꞌa haramiro
(Mataio 3:1-12, Luka 3:1-18, Ioane 1:19-28)
1 Badiꞌa Ubuga, Iesu Keriso hari manoḡa*niꞌe ꞌahige fureraro. 2 Peroveta vazeḡa* niḡa Isaia*ꞌa, buka zaḡoḡa* zamaḡano tinaꞌa, ꞌahige reiro.
'Ḡianoꞌi! Badiꞌaꞌa ḡae zamao hari odohe dureꞌeteꞌe vazeḡa ꞌahoga ibite tuḡuniꞌuma, ḡae veize ibi fainifine. 3 Haba bohaꞌanonoꞌo, rae huauꞌohe. “Zuhiꞌa Boro* ibi faine haḡae toꞌi! Ane ibi mae dudunoꞌi!” '
4 Ebu hari odohe dureꞌeteꞌe vazeḡa, niḡa Ioane Babatisoꞌa haba bohaꞌa onairo. Ani harameꞌenaꞌa, ꞌahige reiro. 'Sauꞌanonoꞌo ḡihuradu bapatizo moꞌi! Zae sauꞌa Badiꞌaꞌa mae vaḡinifine.' 5 Iudea* habaꞌa azaḡa niduꞌa zuni Ierusalema ne azaḡa niduꞌa, Ioane vaḡe onamiro, hariḡa egoga veize. Ebu ane ane sauꞌa rae furenadu, Ioridana vuḡano bapatizo meiro.
6 Ioane, ani dabuaꞌe kamelo iguḡa, kibaiḡaꞌe boromakau ogaḡa, ogomuḡaꞌe fihore ebu ꞌavore godaḡa. 7 Ani harameꞌenaꞌa, ꞌahige reiro. 'Vaze ꞌahoga, eḡe ḡarunio onaiꞌuma vazeḡa, ani gigiꞌaꞌe ḡihiꞌa, u e gigiꞌaꞌe zuhuꞌa. Ane teite mene idaḡa. E ani oda babaḡano ḡuḡuraduni, ani oda ḡauḡa miniḡa fuhiꞌohanoga zuni mene idaḡa. 8 Eꞌe vu hina bapatizozeha. U aniꞌe Vine Zaḡoḡa* hina bapatizoziꞌuma.'
Ioaneꞌa Iesu bapatizoniro
(Mataio 3:13-17, Luka 3:21-22)
9 Eꞌe madaḡano, Galilea habaꞌano ne niḡa Nazareta, eꞌanoꞌo Iesuꞌa onairo. Ebuni Ioridana vuḡano, Ioaneꞌa Iesu bapatizoniro. 10 Iesuꞌa vuonoꞌo gaba tireꞌenogano, adureꞌa ꞌaꞌaduꞌeteꞌe zogone horoniro. Ebu Vine Zaḡoḡa tubugo niniḡa teige horoniro. Ani Iesu vaḡe ovairo. 11 Ebu adureonoꞌo ago ꞌahoga igiro. ꞌAhige reiro, 'Ḡaꞌe eḡe ubude, eḡe zamarone. E ḡa mazao matuꞌu boro.'
Sataniꞌa Iesu soꞌoniro
(Mataio 4:1-11, Luka 4:1-13)
12 Ebuni Vine Zaḡoḡaniꞌa Iesu, haba bohaꞌa tuḡune onamiro. 13 Mada ḡae ḡazaḡa gaubanana (40) deꞌea radiro. Satani*ꞌa soꞌonido. Agire ḡauḡa zuni deꞌea radiro. Rehano tuḡure viga* nuꞌa ovaadu dananiro.
Iesuꞌa Galilea habaꞌano ane gau mazaḡa fureniro.
(Mataio 4:12-17, Luka 4:14-15, Ioane 4:43-45)
14 Ioane ḡuꞌano ohoniroteꞌe ḡarugano,*Aꞌe zuhiꞌa Herodaꞌa moḡaḡa bare meiroteꞌe uꞌano, Ioaneꞌa 'Ḡa haḡai sauꞌa haḡaeha' reiro. Eꞌe uꞌano zuhiꞌa Herodaꞌa maḡunadu, ḡuꞌano ohoniro. Iesu ani Galilea onamiro. Ebu Badiꞌa hari manoḡa harame ragaviro. 15 'Badiꞌaꞌa reiroteꞌe madaḡa ꞌai feureha. Badiꞌaꞌa gigiꞌa iziga hina ibito ziniꞌeteꞌe* madaḡa ꞌai haniteha. Haḡai sauꞌa sauꞌa modoꞌi ebu Badiꞌa hari manoḡa mae ḡihinoꞌi!'
Iesuꞌa vaze ḡazaḡa huziro, ane ḡaruna hegotoga veize
(Mataio 4:18-22)
16 Galilea duꞌuraḡa boro* genaḡano, Iesuꞌa onameꞌenogano, vaze aheuꞌa reꞌeva feuniroteꞌe horoziro, Simona ebu negoḡa Aniderea teite. Zeḡe gauꞌe ḡozone mauꞌeteꞌe. 17 Ebu Iesuꞌa ziro, raenaꞌa, “Eḡe ḡaruna hegotoꞌi! Vaze reꞌevaziꞌeteꞌe vazeḡa rouga veize ihoziꞌuma.” 18 Ze ai zogone reꞌeva modadu ane hegote onamiro.
19 Tahiḡa faḡa onamiro. Eꞌe zamaḡano, vaze aheu negoḡeita horoziro, Iakobo ebu Ioane, Zebedeo ubuga. Zeꞌe zeḡe ḡasi ranao reꞌeva faine radiro. 20 Horozirotene, huziro. Ebu zeḡe moze Zebedeoꞌe ḡasi rana mode onairo. Aneꞌa meiroteꞌe azaḡa teite muhize onairo. Ebu Iesu ḡarunio hegote onamiro.
Iesuꞌa, vine sauꞌaniꞌa ragano reiroteꞌe vazeḡa fainiro
(Luka 4:31-37)
21 Iesu ebu ane ḡarunio hegotiroteꞌe azaḡa, ne niḡa Kaperanaumao feuriro. Bana Madaḡa* madaḡano ani Iuda kuru neḡa diuḡiro, ebu ihoziro. 22 Vaze vazeꞌa ani ihozoga igirotene, zamaze zaguzagaro. Mazaḡa Mose goro ḡoeꞌa* ihozeꞌeteꞌe azaḡa* teige mene haramiro, rehano Badiꞌa ḡoere gigiꞌa hina ihoziro.
23 Eꞌe zamaḡano, vine sauꞌa*ꞌa ragano reiroteꞌe vazeḡa ꞌahoganiꞌa, Iuda kuru neḡa diuḡiro, ebu ꞌahige hounaꞌe ḡoeriro. 24 'Iesu, Nazareta ne vazeḡa! Eme vaḡe nagini uꞌano onaeha? Ḡa emeḡe uḡufoga radu, onaa ga? E edeḡa ḡa iniu. Ḡaꞌe Badiꞌa gigiꞌa vazeḡa!' 25 Iesuꞌa vine sauꞌa taꞌiroharo. 'Ago ḡoeroꞌi! Vaze ꞌadi mazaonoꞌo buanoꞌi!' 26 Ebu vine sauꞌaniꞌa, buanoga rae, ketoketeꞌenaꞌa, ḡihau ḡaniḡanaro. Ebu vine sauꞌa ai buaro.
27 Vaze niduꞌa horonadu, zamaze niduꞌa zaguzagaro. Zeꞌe zeḡeꞌa bare ḡadititiro. 'ꞌAdi nagini? Nagini iziga ihofeꞌohe? Vaze ꞌadiꞌe gigiꞌeta. Vine sauꞌa zuni ziꞌetene, egadu, egohuꞌohe.' 28 Eꞌebanoꞌo, Iesu hariḡa, Galilea habaꞌano ḡarihe bororaro. Ebu haba niduꞌa igi hauḡiro.
Iesuꞌa Petero emoḡa roḡaeḡa fainiro
(Mataio 8:14-17, Luka 4:38-41)
29 Eꞌebuꞌu, Iesu ani Iuda kuru neḡanonoꞌo buau onamiro. Simona ebu Aniderea duḡuru ne diuḡiro. Iakobo ebu Ioane zu zeḡe teite diuḡiro. 30 Simona emoḡa roḡaeḡaꞌe uginiro ꞌahine, baze radiro. Ahiꞌaꞌe gigiꞌa bagaḡa. Iesuꞌa feurirotene, ihoniro. 31 Iesuꞌa ane vaḡe onamadu evoꞌano meiro, ebu mae ohonirotene, ahiꞌa gigiꞌani ai dauḡiro. Ebu aniꞌa iḡunadu Iesu veize ogomu ḡorohe haro.
Iesuꞌa vaze ḡehaḡa faiziro
32 Ḡorava moneo, madaꞌa ovoeꞌeteꞌe zamaḡano, ugi azaḡa ebu vine sauꞌaniꞌa ranao reiroteꞌe azaḡa, ane vaḡe tutuze onairo. 33 Ebu ne azaḡa niduꞌaꞌeꞌe ane ibihetao muririro. 34 Ugi nunu azaḡa ḡehaḡa aniꞌa faiziro. Ebu vine sauꞌa sauꞌa ḡehaḡa hegoze buziro. Aniꞌa, vine sauꞌa sauꞌaꞌa ḡoeroga ꞌuiro, mazaḡa zeḡe edeḡa ani iniu.
Galilea habaꞌano Iesuꞌa haramiro
(Mataio 4:23-25, Luka 4:42-44)
35 Irara moneo, mada ize mene agaranogano, Iesuꞌa iḡunadu, haba bohaꞌa ꞌahoga onamiro, ebu eꞌa kuraro. 36 Ebu Simona nabugeta Iesu vaḡe vaḡe onamiro. 37 Horonirotene, ꞌahige rae niro. 'Vaze niduꞌa ḡa vaḡeꞌohe.' 38 Ebu aniꞌa zinaꞌa, 'Eme ne uhiḡa uhiḡa onamihi, eꞌea zuni haramoga. Mazaḡa eꞌe deꞌe uꞌano onairo.' 39 Ebu ani, Galilea habaꞌano neḡa neḡa niduꞌa onamadu, Iuda kuru neḡa zamaḡano haramiro, ebu vine sauꞌa sauꞌa hegoze buziro.
Lefera Vazeḡa Fainiro
(Mataio 8:1-4, Luka 5:12-16)
40 Lefera vazeḡa ꞌahoganiꞌa ani vaḡe onairo, ebu ane zamao obena hina tuḡadu niro, raenaꞌa, “Zuhiꞌa Boro, ḡa uratoꞌidene faihoꞌi!” 41 Iesuꞌa vetuḡaniro, eꞌanoꞌo ꞌevoꞌa einadu vaze eꞌe oboniro, ebu raenaꞌa, “E urateꞌohe. Ḡae manoroꞌi!” ꞌOugadu lefara eꞌeꞌa zogone dauḡiro.†Zeḡe goroꞌe, lefera vazeḡaꞌe toraga radu, mene oboneete. ebu niro. 'E urateꞌohe. Ḡa ai manoroꞌi!' 42 Ebu ani leferaꞌa tabara dauḡiro, ebu ani ꞌai manoriro. 43 Ebu zogone tuḡuneꞌenaqa, ḡoere riḡa hina niro, 44 naenaꞌa, “Naginiꞌa ḡae mazao fureranataꞌaꞌe vaze ꞌahoga ago noꞌi! Rehano dibuꞌo vazeḡa vaḡe onamadu ahiriḡo ihonoꞌi‡ Aꞌe, aniꞌa ahiri udahadu manoreha reifine! Ebu leferaonoꞌo manoreha rouga veize, Moseꞌa reiroteꞌe dibuꞌoḡa Badiꞌa hanoꞌi! ꞌOugine vazeꞌa ḡa ꞌai manore huneha rae ederiꞌuma.”
45 Rehano vaze eꞌeꞌa onamadu, hari eꞌe, vaze vaze mazao rae ḡehaniro. Eꞌe uꞌano, Iesuꞌe ne hunio diuḡoga mene idararo. Eꞌanoꞌo haba bohaꞌano radiro. Ebu vaze vazeꞌa, haba ꞌahoga ꞌahoganonoꞌo, ane vaḡe onaido.