4
Adure Kuruḡa
1 Eꞌe enogano eḡeꞌa horonirotene, adureo ibiheta ꞌahoga vavaꞌogaꞌe eꞌe. Ebu ibite eḡeꞌa igiroteꞌe agoḡa, bigoro agoḡa teigiroteꞌeꞌa ꞌahige rae reiro, “ꞋAhi eroi. ꞌAhi enogano naginiꞌa fureru huniteꞌe eḡeꞌa ihoꞌiꞌuma.” 2 Vine Zaḡoḡaniꞌa ḡarihe fase eḡe ragatiro ebu e adureo kini ehoro iḡuꞌa ꞌahoga horoniro. Eꞌe rana vaze ꞌahoganiꞌa ehore radiro. 3 Eꞌe rana ehore radiuꞌeteꞌe vazeḡa iraḡaꞌe agaḡa ꞌuruḡa zu kanaḡaniꞌa agararo. Agaḡa aꞌe hadi ꞌuruḡa naeḡa boro niḡa iasipa zu hadi kanaḡa naeḡa boro niḡa sadio heuḡa. Ebu kini ehoro iḡuꞌaꞌe mezoneꞌa hadi ḡabodoraḡa naeḡa boro niḡa samaragi teige varahuniro. 4 Ebu kini ehoro iḡuꞌa aꞌe kini ehoro iḡuꞌa ꞌahoga niduꞌa 24ꞌa varahe huniro, ebu ekalesia ibitoziꞌeteꞌe azaḡa 24ꞌa eꞌe ehoro iḡuꞌano ehore radiro. Zeꞌe dabua ꞌuruḡa haḡairo zu vadinizeo golo hina haḡairoteꞌe kini vadini adiriḡa ridiro. 5 Kini ehoro iḡuꞌa eꞌeanoꞌo agaru vazahe ovairo ebu viriꞌa fuꞌuradu gudaro. Kini ehoro iḡuꞌa eꞌe zamao ihure mozareḡa fuꞌo aheu fareꞌa duhuru agaru radiro. Ihure aꞌe Badiꞌa viga fuꞌo aheu fare. 6 Kini ehoro iḡuꞌa eꞌe zamaoꞌe galasi hina haḡairoteꞌe davaraḡa heuḡa eꞌe. Aꞌe naeḡa boro hadiḡa niḡa kirisita teige deheḡa bagaḡa.
Kini ehoro iḡuꞌa eꞌe varahoga ḡonaga ḡazaḡano ḡaboga ḡauḡa ḡazaḡaꞌe eꞌe. Zeꞌe zama zu ḡaruni moneo ubuma daꞌodaꞌoroga. 7 Ḡaboga ḡauḡa ibiꞌaꞌe laioni heuḡa, aheuḡaꞌe boromakau ubuga ohozeḡa heuḡa, uḡiduḡaꞌe vaze iraḡa heuḡa, ebu ḡazaḡaꞌe rafiuꞌeteꞌe ugabadaḡa heuḡa. 8 Ḡaboga ḡauḡa ḡazaḡa tibatibaꞌe isaze fuꞌo tiba farezeta. Isaze zamaḡa zu enoga niduꞌaꞌe ubuma daꞌodaꞌoroga. Madai zu ohere ze ꞌahige ḡoeroga mene hune riꞌiꞌohe,
“Zaḡoḡa, zaḡoḡa, zaḡoḡa!
Zuhiꞌa Boro Badiꞌa Gigiꞌa hune!
Ibite radiro, izidi radiuꞌohe, zu vesuꞌu ariteꞌe Badiꞌaḡa.”
9 Badiꞌaꞌe radiu tuḡutuḡu, zu kini ehoro iḡuꞌano ehore radiuꞌohe. Ḡaboga ḡauḡaniꞌa ani ni mae ḡihineꞌohe, zu gubaneꞌohe, zu ani mazao manoḡa tauḡi rae raꞌohe. 10 Ze ꞌouge haḡaeꞌetene, ekalesia ibitoziꞌeteꞌe azaḡa 24ꞌa kini ehoro iḡuꞌano ehoreꞌeteꞌe zu radiu tuḡutuḡeꞌeteꞌe vazeḡa zamao ḡuḡuradu kurauꞌohe. Ebu ze vadinize rana ridiroteꞌe kini vadini adiriḡa mae vaḡinadu kini ehoro iḡuꞌa eꞌe zamao mae tiꞌohe, ebu ꞌahige rae raꞌohe,
11 “Emeḡe Zuhiꞌa Boro Badiꞌa!
Vazeꞌa niḡo mae ḡihinoga, gubaꞌoga zu gigiꞌaḡo nigunogaꞌe duduḡa hune,
mazaḡa ḡaeꞌa ḡau niduꞌa haḡairo.
Ḡae urao zeꞌe ꞌize radiuꞌohe zu ḡabone meiro.”