7
Isaraela Azaḡa 144,000 Imoriro
1 Eꞌe enogano e tuḡure viga ḡazaḡaniꞌa raha genaḡa ḡazaḡano edauꞌenoga horoziro. Ze zavaraꞌa raha rana ga davara rana ga ireni ꞌahoga rana mene zaidanoga veize, zavara ḡazaḡa obonadu ꞌue radiro. 2 Ebu e tuḡure viga ꞌahoganiꞌa madaꞌa iteꞌeteꞌe moneonoꞌo ite feureꞌenoga horoniro. Aniꞌe ḡabode radiuꞌeteꞌe Badiꞌaḡa mazaonoꞌo imoro meiro. Ani haba zu davara sausauneꞌeteꞌe gigiꞌaḡa meiroteꞌe tuḡureḡa viga ḡazaḡa mazao agoḡa boro hina ꞌahige huau ziro, 3 “Haba ga davara ga ire ago sausaunoꞌi, onamo emeꞌa emeḡe Badiꞌa tuḡure azaḡa zehereze rana imoroziꞌuma.” 4 Ebu e iniu imoroziroteꞌe azaḡa niduꞌaꞌe nugu rae igiro. Aꞌe Isaraela azaḡa urabo niduꞌaonoꞌo vaze niduꞌa 144,000. 5 Urabo tibatibaonoꞌo imoroziroteꞌe azaḡa nabaḡaꞌe ꞌahi eꞌe:
Iuda uraboonoꞌo 12,000,
Rubena uraboonoꞌo 12,000,
Gado uraboonoꞌo 12,000,
6 Asere uraboonoꞌo 12,000,
Nafatali uraboonoꞌo 12,000,
Manase uraboonoꞌo 12,000,
7 Simeona uraboonoꞌo 12,000,
Levi uraboonoꞌo 12,000,
Isakara uraboonoꞌo 12,000,
8 Zebuluno uraboonoꞌo 12,000,
Iosefa uraboonoꞌo 12,000,
Beniamini uraboonoꞌo 12,000.
Dabua ꞌUruḡa Vidaroteꞌe Azaḡa Ḡuḡuvaḡa
9 Eꞌe enogano e vaze ḡuḡuvaḡa horoziro. Zeꞌe ufeta ḡehaḡa radu vazeni ꞌahoganiꞌa ze meꞌodogaꞌe mene idararo. Zeꞌe haba niduꞌaonoꞌo, urabo niduꞌaonoꞌo, vaze nunu niduꞌaonoꞌo, zu ḡoere nunu azaḡa niduꞌaonoꞌo ariro. Zeꞌe dabua ꞌuruḡa vidaro, zu ꞌevorezeo sigi rouḡa oboniro, ebu kini ehoro iḡuꞌa zamao zu Mamoe Ubuga zamao edau radiro. 10 Ebu zeꞌe ago boro hina ꞌahige huau reiro,
“Kini ehoro iḡuꞌano ehoreꞌeteꞌe vazeḡa, emeḡe Badiꞌa,
zu Mamoe Ubuganiꞌa eme ḡabofeꞌohe!”
11 Tuḡure viga niduꞌa kini ehoro iḡuꞌa zu ekalesia ibitoziꞌeteꞌe azaḡa zu ḡaboga ḡauḡa ḡazaḡa edau varahiro. Ebu ze kini ehoro iḡuꞌa zamao ḡuḡuradu Badiꞌa mazao kuraro. 12 Tuḡure viga niduꞌa ꞌahige rae reiro,
“Amen!
Badiꞌaꞌe ḡihiꞌa hune zu huhuzaḡa, ebu gigiꞌaḡa zu inaraḡaꞌe boro hune.
Eme ani ni mae ḡihinihi,
ani mazao manoḡa tauḡi reihi,
zu ani gubanihi, onamo tuḡutuḡu.
Amen!”
13 Ebu hena ekalesia ibitoziꞌeteꞌe azaḡa boꞌaḡano ꞌahoganiꞌa ꞌahige ḡadihiro, “Dabua ꞌuruḡa vidaroteꞌe azaḡa ꞌahiꞌe iniu? Zeꞌe noumanoꞌo areha?” 14 Ebu e ꞌahige naenaeniro, “Vaze boro, aꞌe ḡae edeḡa.” Ebu aniꞌa ꞌahige ihiro, “ꞌAhi azaḡaꞌe aduga boro zamaḡano zamaze obone giganiroteꞌe azaḡa. Zeꞌe Mamoe Ubuga ruḡa zamaḡano dabuaze vuzuꞌadu dabuazeꞌa ꞌuraro. 15 Eꞌe uꞌano,
zeꞌe Kini Badiꞌa ehoro iḡuꞌa zamao edauꞌohe,
ebu madai zu ohereo ane kuru neḡano ane veize gaueꞌohe.
Ebu kini ehoro iḡuꞌano ehoreꞌeteꞌe Badiꞌaḡaniꞌa taruhazi biriꞌuma.
16 Zeꞌe mene bare viniziꞌuma,
mene bare irine moꞌoziꞌuma.
Madaꞌa ze mene iri gigiziꞌuma,
gigiꞌa bagaḡa ꞌahoganiꞌa ze mene iriꞌuma.
17 Kini ehoro iḡuꞌa nemaḡano radiuꞌeteꞌe Mamoeḡa Ubugaꞌe mamoe taufeꞌeteꞌe vazeḡa teige ze taufiꞌuma,
ebu aniꞌa ze tutuzadu ḡabone ziniꞌeteꞌe iduḡa vuḡa vaḡe onamiꞌuma.
Ebu Badiꞌaꞌa ubumazeonoꞌo nize vuḡa niduꞌa zauhoziniꞌuma.”