1 Ebu hena e butu agireḡa ꞌahoganiꞌa davaraonoꞌo bua areꞌeteꞌe horoniro. Ani araḡa niduꞌaꞌe gaubanana zu vadiga niduꞌaꞌe fuꞌo aheu fare. Araḡa tibatiba ranaꞌe kini vadini adiriḡa ridiro, zu vadini tibatiba ranaꞌe Badiꞌa rae sausauneꞌeteꞌe niḡa eꞌe. 2 Eꞌa horoniroteꞌe butu agireḡaꞌe butu agireḡa ꞌahoga, aꞌe leopadi heuḡa. Rehano ani odaꞌe bea oda heuḡa zu ani hebeꞌe laioni hebe heuḡa. Isona horeḡa eꞌeꞌa butu agireḡa mazao ane inara, ane kini ehoro iḡuꞌa zu gigiꞌaḡa ufeta boro haro. 3 Butu agireḡa vadini niduꞌa boꞌaḡano vadini tibaꞌe idiri boro madu horonogaꞌe nariga rudaro. Rehano idiriḡa aꞌe manoradu raha azaḡa niduꞌaꞌe zaguzagaro ebu butu agireḡa eꞌe hegotiro. 4 Vazevazeꞌa isona horeḡa eꞌe mazao kuraro, mazaḡa aniꞌa ane gigiꞌa butu agireḡa haro. Zeꞌe butu agireḡa eꞌe mazao zuni kuraro ebu ꞌahige rae reiro, “Butu agireḡa ꞌaha teigeꞌeteꞌe vazeḡa inaraḡaꞌe oꞌoꞌa! Iniuꞌa ani utitohaꞌuma?”

5 Badiꞌaꞌa butu agireḡaꞌe aneꞌa bare nigunoga zu Badiꞌa rae sausaunogaꞌe idaḡa rae reiro, ebu bato 42 zamaḡano ani vaze sausauzeꞌeteꞌe inaraḡa haro. 6 Ani hebeꞌa vavaꞌadu Badiꞌa rae sausauniro. Ebu Badiꞌa ni zu Badiꞌa radone habaꞌa ebu adureo radiuꞌeteꞌe azaḡa rae sausauziro. 7 Badiꞌaꞌa aniꞌe Badiꞌa mone azaḡa utitozenoga zu raharahazogaꞌe idaḡa rae reiro. Ebu urabo niduꞌa, vaze nunu niduꞌa, ḡoere nunu azaḡa niduꞌa, zu habaꞌahabaꞌa azaḡa niduꞌa zuhiꞌaziꞌeteꞌe inaraḡa haro. 8 Vazeꞌa maroteꞌe Mamoeḡa Ubuganiꞌa buka ꞌahogano ḡaboziteꞌe azaḡa nize mirihiro. Nizeꞌe Badiꞌaꞌa ꞌizema ḡau niduꞌa haḡaoganonoꞌo mirihiro. Raha azaḡa boꞌaḡano eꞌe bukaḡano Mamoe Ubuganiꞌa iniu nize mene mirihiroteꞌe azaḡa niduꞌaꞌe butu agireḡa eꞌe mazao kuraꞌuma.

9 Iniu teḡaḡeta vazeḡaꞌe ꞌahi egoꞌi:

11 Ebu hena e butu agireḡa ꞌahoganiꞌa rahaonoꞌo bua areꞌeteꞌe horoniro. Ani mamoe ubuga heuḡa araḡa aheu, rehano isona horeḡa teige ḡoeriro. 12 Aniꞌa butu agireḡa ibiꞌa inaraḡa niduꞌa hina butu agireḡa ibiꞌa veize gauiro. Ebu aniꞌa raha zu rahao radiuꞌeteꞌe azaḡaꞌe butu agireḡa ibiꞌa mazao kuranoga veize tutuziro. Butu agireḡa ibiꞌaꞌe ibite idiri boro madu nariga rudaro rehano, bare manoriro. 13 Butu agireḡa aheuḡaniꞌa haḡai nu badeḡa ḡihiꞌaḡa haḡairo. Vaze niduꞌa murireꞌeteꞌe zamaḡano, aniꞌa adureonoꞌo rahao ire roga tuḡune buniro. 14 Aniꞌe butu agireḡa ibiꞌa mazaonoꞌo meiroteꞌe inaraḡa hina butu agireḡa ibiꞌa veize haḡai nu badeḡa haḡairo. Aniꞌe eꞌe haḡaiḡa nu badeḡa hina rahao radiuꞌeteꞌe azaḡa soꞌosoꞌoziro. Aniꞌa zeḡe mazao ꞌahige rae reiro, “Butu agireḡa ibiꞌa veize ane iraḡa teige haḡairoteꞌe iraḡa ꞌahoga haḡaoꞌi.” Butu agireḡa ibiꞌaꞌe ibite benisionoꞌo idiri boro meiro rehano, bare ḡabodiro. 15 Butu agireḡa aheuḡaꞌe butu agireḡa ibiꞌa mazaonoꞌo meiroteꞌe inaraḡa hina, butu agireḡa ibiꞌa iraḡa teige haḡairoteꞌe iraḡa ꞌahoga zamaḡano irineḡa haro. ꞌOugadu eꞌe iraḡaniꞌa ḡoeroga idararo, ebu aniꞌa ani mazao mene kurauꞌeteꞌe azaḡa zemoga zuni idararo. 16 Ebu butu agireḡa aheuḡaniꞌa vaze niduꞌa ibitozeadu zeḡe edaꞌe ꞌevoꞌa rafaḡano ga zehereze rana tahi ꞌahoga mae tiro. Nize komeꞌa zu nize boro, maꞌora zu zahara, tuḡure azaḡa zu mene tuḡure azaḡa niduꞌa tahi eꞌe mae tiro. 17 Iniu tahi eꞌe mene meiroteꞌe vazeḡaꞌe ḡau ꞌahoga hoitoga ga seronogaꞌe mene idararo. Tahi aꞌe butu agireḡa ibiꞌa ni ga niḡa nabaḡa.*13:17 Giriki ḡoeꞌa tibatibaꞌe nabaḡeta. Ni nabaꞌe ni ḡoeꞌa tibatiba niduꞌa meꞌodiroteꞌe nabaḡa.

18 Nabaḡa eꞌe huga faine ederifine zamarone huhuzaḡa moꞌi. Iniu faine zamareꞌeteꞌe vazeḡaꞌe butu agireḡa ibiꞌa ni nabaḡa meꞌode nuroꞌi. Nabaḡa aꞌe vaze ꞌahoga niḡa ihozeꞌohe. Niḡa nabaḡaꞌe 666.