15
Tuḡure Vigaviganiꞌa Ḡonaga Adugaḡa Boro Odohe Ariro
1 Ebu hena e adureo zaguzagatiteꞌe haḡaiḡa nu badeḡa ḡihiꞌaḡa ꞌahoga horoniro. Tuḡure viga fuꞌo aheu fareꞌa aduga boro fuꞌo aheu fare meiro. Aꞌe aduga boro ḡonaga, mazaḡa eꞌe adugaḡaniꞌa hauḡine Badiꞌa zama ḡugiḡaniꞌa ḡonabiꞌuma.
2 Ebu e galasi hina haḡairoteꞌe davaraḡa ire roga teite tiburanoga teigiroteꞌe horoniro. Zuni vaze nuꞌa galasi davaraḡa genaḡano edauꞌeteꞌe horoziro. Zeꞌe butu agireḡa zu ane iraḡa teige haḡairoteꞌe iraḡa zu ane ni nabaḡa raharahaziroteꞌe azaḡa. Zeꞌe Badiꞌaꞌa ziniroteꞌe gabiḡa obone edau radiro. 3 Ebu ze Badiꞌa tuḡure vazeḡa Mose bada zu Mamoe Ubuga bada badahiro,
“Zuhiꞌa Boro Badiꞌa Gigiꞌaḡa,
haḡaiḡoꞌe ḡihiꞌaḡa,
zu vazeꞌa horonadu zaguzagauꞌohe.
Ḡaꞌe habaꞌahabaꞌa azaḡa niduꞌa Kini,
ibiḡoꞌe duduḡa zu huga.
4 Zuhiꞌa Boro, iniuꞌa ḡa mene rihoꞌiꞌuma?
Zu iniuꞌa niḡo mene mae ḡihiniꞌuma?
Ḡae tibuhugaꞌe zaḡoḡa.
Habaꞌahabaꞌa azaḡa niduꞌa ḡae vaḡe ariꞌuma,
zu ḡae mazao kuraꞌuma,
mazaḡa ḡae haḡai duduḡaniꞌa fureraro.”
5 Eꞌe enogano e ehamarotene, adureo kuru neḡa vavaꞌiro. Aꞌe Badiꞌaꞌa ane mone azaḡa teite radiroteꞌe dibuꞌoḡa taruhaḡa heuḡa. 6 Aduga boro fuꞌo aheu fare meiroteꞌe tuḡureḡa viga fuꞌo aheu fareꞌa kuru neḡanonoꞌo buau ariro. Zeꞌe dabua deheḡa manoḡa zu vazavazahoga vidaro, ebu golo miniḡa uꞌunizeo abiriro. 7 Ebu hena ḡaboga ḡauḡa ḡazaḡa boꞌaḡano ꞌahoganiꞌa golo hina haḡairoteꞌe siuvaḡa fuꞌo aheu fareꞌe tuḡure viga fuꞌo aheu fare ziniro. Siuva eꞌe zamaḡanoꞌe radiu tuḡutuḡu Badiꞌaḡa zama ḡugiꞌaḡaniꞌa iri'aviro. 8 Ebu Badiꞌa ni ḡihiꞌaḡanonoꞌo zu gigiꞌaḡanonoꞌo ḡisiꞌa buanadu kuru neḡa zamaḡano iriꞌaviro. ꞌOugadu vazeni ꞌahoganiꞌa kuru neḡa zamaḡano diuḡogaꞌe mene idararo, onamo tuḡure viga fuꞌo aheu fareꞌa odoheꞌeteꞌe adugaḡa boro fuꞌo aheu fareꞌa ḡonabiꞌuma.