1 Ebu hena e tuḡure viga ꞌahoganiꞌa adureonoꞌo ovaoga horoniro. Aniꞌa idu vo hune vavaꞌeꞌeteꞌe kiḡa zu auri adiriḡa boro ꞌevoꞌano oboniro. 2 Aniꞌa isona horeḡa eꞌe obone tiro. Isona horeḡa aꞌe Diabolo ga Satani, ebu ibite hune radiu onainuteꞌe moheḡa. Tuḡure viganiꞌa isona horeḡa eꞌe auri adiriḡa boro hina susadu muri 1,000 zamaḡano obone tiro. 3 Aneꞌa idu vo huneo isona horeḡa eꞌe mae feunadu ibihetaḡa hararo ebu vaze ꞌahoganiꞌa mene vavaꞌoga veize ibihetaḡa ꞌuiro. Aꞌe isona horeḡa eꞌeꞌa habaꞌahabaꞌa azaḡa mene soꞌozifine raꞌohe, onamo muri 1,000 ḡonaga. Eꞌe enogano ani mae bunadu mada tahiḡa radiꞌuma.

4 Ebu hena e kini ehoro iḡuꞌano ehoreꞌeteꞌe azaḡa horoziro. Zeꞌe kotazeꞌeteꞌe inaraḡa Badiꞌaꞌa ziniroteꞌe azaḡa. Ebu e vaze vine nu horoziro. Zeꞌe Iesu moneo rae fureniro zu Badiꞌa ḡoere rae fureniro ꞌahine, vadinize variꞌe modiroteꞌe azaḡa. Zeꞌe butu agireḡa zu ane iraḡa teige haḡairoteꞌe iraḡa mazao mene kuraro, ebu zeherezeo zu ꞌevoreze rafaḡano butu agireḡa tahi mene meiro. Zeꞌe ḡabodadu Keriso teite muri 1,000 zamaḡano ḡau niduꞌa zuhiꞌaziro. 5 (Rune azaḡa nuꞌe mene ḡabodiro onamo muri 1,000 ḡonaga meiro.) Aꞌe Badiꞌaꞌa rune azaḡa bare ḡaboziroteꞌe madaḡa ibiꞌa. 6 Badiꞌaꞌa rune azaḡa bare ḡaboziroteꞌe madaḡa ibiꞌaḡano bare ḡabodiroteꞌe azaḡaꞌe zaḡoḡa zu matuꞌe rudauꞌohe. Rune aheuḡaniꞌa ze zuhiꞌaziteꞌe inaraḡaꞌe oꞌoꞌa. Zeꞌe Badiꞌa zu Keriso veize gaueꞌeteꞌe dibuꞌoḡa azaḡano reꞌuma ebu Keriso teite muri 1,000 zuhiꞌaziꞌuma.

7 Muri 1,000 enogano Sataniꞌe ane ḡuꞌa neḡanonoꞌo mae buniꞌuma. 8 Aniꞌa buanadu raha niduꞌa zamaḡano avoavo radiuꞌeteꞌe habaꞌahabaꞌa azaḡa soꞌozoga veize onamiꞌuma. Eꞌe habaꞌahabaꞌa nizeꞌe Goga zu Magoga. Sataniꞌe uti veize ze nuꞌoziꞌuma ebu zeḡe niduꞌaꞌe davara niꞌuriḡa teige ḡeharaꞌuma. 9 Zeꞌe raha naenae niduꞌa oname hauḡadu Badiꞌa mone azaḡa radone habaꞌa zu Badiꞌa zamarone neḡa boro merau ꞌuiro. Rehano ire rogaꞌa adureonoꞌo ovadu ze hufi haoziro. 10 Ze soꞌoziroteꞌe Diaboloḡa zuni sulifu hina hufi haoneꞌeteꞌe ire roga duꞌuraḡano mae feuniro. Ire rogaḡa duꞌuraḡa aꞌe butu agireḡa zu ḡuriro peroveta vazeḡaniꞌa radiuꞌeteꞌe habaꞌa. Deꞌea ze ohere zu madai gigiꞌa boro meꞌuma onamo tuḡutuḡu.

11 Ebu hena e kini ehoro iḡuꞌa ꞌuruḡa ḡihiꞌaḡa ebu eꞌe rana ehoriroteꞌe Badiꞌaḡa horoniro. Ani zamao raha zu adureꞌa dauḡadu iḡurize mene bare horoniro. 12 Ebu e rune azaḡa, nize boro zu nize komeꞌa azaḡa niduꞌa kini ehoro iḡuꞌa eꞌe zamao edauꞌeteꞌe horoziro. Ebu buka nu vavaꞌiro, aꞌe rune azaḡaniꞌa haḡairoteꞌe haḡaiḡa niduꞌa mirihiroteꞌe bukaḡa. Ebu buka ꞌahoga zuni vavaꞌiro, aꞌe ḡaboziteꞌe azaḡa nize mirihiroteꞌe bukaḡa. Rune azaḡaꞌe buka nu eꞌe zamaḡano mirihiroteꞌe teige, ze haḡairoteꞌe haḡaiḡa idunaḡano kotaziro. 13 Davarao rudaroteꞌe azaḡa zuni kini ehoro iḡuꞌa zamao edaro. Ebu rudanadu rune azaḡa habao*20:13 Hadesi radiuꞌeteꞌe azaḡa zuni kini ehoro iḡuꞌa zamao edaro. Ebu zeḡe niduꞌa zeꞌa haḡairoteꞌe haḡaiḡa idunaḡano kotaziro. 14 Ebu hena rune azaḡa zu zeḡe radone habaꞌaꞌe ire roga duꞌuraḡano mae feuziro. Ire roga duꞌuraḡaꞌe rune aheuḡa. 15 Iniu ḡaboziteꞌe azaḡa nize mirihiroteꞌe bukaḡano niḡa oꞌoꞌa vazeḡaꞌe ire roga duꞌuraḡano mae feuniro.