9
Badiꞌaꞌa Isaraela Azaḡa Ohotiro
1 Eꞌe Keriso mone vazeḡa, eꞌanoꞌo ḡoere huga ḡoereꞌohe. Vine Zaḡoḡaniꞌa zamahe zuhiꞌaniꞌeteꞌe uꞌano, e mene ḡurireꞌohe. Aꞌe hube rae zamaheꞌa rae fureneꞌohe. 2 E zamahe borofe areꞌohe zu eḡe zamao aduga boroꞌe mene ḡonabeꞌohe. 3 Eḡe ḡoere ḡumu azaḡa, Iuda nego nabudi veize reine, e radiu tuḡutuḡu adugaḡa hidadu Keriso mazaonoꞌo mae vaḡihine zuni idaḡa. 4 Zeꞌe Isaraela azaḡa. Zeꞌe Badiꞌaꞌa ohotadu ane ubugaubugano reiro, zu zeḡe mazao ane ni ḡihiꞌaḡa fureniro, ebu ane ḡoitore ḡoeꞌa zu Mose goro ḡoeꞌa ziniro, zu ze ani mazao kurauꞌohe, zu aniꞌa zeḡe teite ḡoitoriro. 5 Vouḡazeꞌe urabo zuhiꞌa boroboro,*9:5 Aberahamo, Isako zu Iakobo zu ahiri moneo Kerisoꞌa†9:5 Mesia zeḡe mazaonoꞌo fureraro. Kerisoꞌe ḡau niduꞌa vitizoga zu emeꞌa radiu tuḡutuḡu niguneꞌeteꞌe Badiꞌaḡa. Amen.
6 Rehano e Badiꞌa ḡoitore ḡoeꞌaꞌe foure reiro rae mene raꞌohe. Mazaḡa Isaraela mariga boꞌaḡano mene niduꞌaꞌe Isaraela azaḡa huga, 7 ebu Aberahamo mariga boꞌaḡano mene niduꞌaꞌe Aberahamo ubugaubuga. Badiꞌaꞌa Aberahamo niro, “Isako mazaonoꞌo fureraroteꞌe azaḡa daꞌo ḡae marigo rae huziꞌuma.”✡9:7 Ḡadaheḡa 21:12 8 Eꞌe hugaꞌe, ahirionoꞌo fureraroteꞌe ubugaubugaꞌe Badiꞌa ubugaubuga mene raꞌohe, rehano Badiꞌa ḡoitore ḡoeꞌanonoꞌo fureraroteꞌe ubugaubuga daꞌo Aberahamo mariga huga rae raꞌohe. 9 Badiꞌa ḡoitore ḡoeꞌaꞌe ꞌahi eꞌe, “Zazore muriḡano ꞌahi madaḡano‡9:9 ohotiroteꞌe madaḡano eḡeꞌa barine, Saraꞌa ubuga ꞌahoga fureniꞌuma.”✡9:9 Ḡadaheḡa 18:10
10 Mene eꞌe daꞌo, emeḡe vouḡa Isako, vaze tibaonoꞌo Rebekaꞌe ꞌahiꞌeta ubuga atoꞌa reiro. 11-12 Ubugaubuganiꞌa ꞌizema fureranogano zu ꞌizema manoḡa ga sauꞌa haḡaogano, Badiꞌaꞌa Rebeka ꞌahige rae niro, “Ḡae ubugo ibiꞌaniꞌa ubugo veḡa veize gauꞌiꞌuma.”✡9:11-12 Ḡadaheḡa 25:23 Badiꞌaꞌa ꞌouge neadu ani nagi ura haḡaoga veize irina toganiroteꞌe idunaḡano ubuga ꞌahoga ohotiroteꞌe ihoziro. Ebu Vazeꞌa gau manoḡa ꞌahoga haḡairoteꞌeanoꞌo Badiꞌaꞌa ani mene ohoteꞌohe, rehano vaze huzeꞌeteꞌe Badiꞌaḡa urao vaze ohoteꞌeteꞌe ihoziro. 13 Buka Zaḡoḡano ꞌahige rae mirihiro, “E Iakoboꞌe zamariro, u Esauꞌe heꞌeheꞌeniro.”✡9:13 Malaki 1:2-3
14 Tena eme nagini reꞌuma? Badiꞌaꞌe vaze mazao inaheꞌehe? Mene hune! 15 Badiꞌaꞌa Mose ꞌahige rae niro,
“Eḡeꞌa iniu vetuḡanihi rae raꞌeteꞌe vazeḡaꞌe eḡeꞌa vetuḡaniꞌuma,
ebu eḡeꞌa iniu fase rae reihi raꞌeteꞌe vazeḡaꞌe ani mazao fase rae reꞌuma.”✡9:15 Vaḡiniro 33:19
16 Eꞌanoꞌo Badiꞌaꞌa vaze ohoteꞌetaꞌaꞌe mene vaze ura ga mene vazeꞌa inare gaueꞌeteꞌe idunaḡano, rehano Badiꞌaꞌa vaze vetuḡaziꞌeteꞌe uꞌano raꞌohe. 17 Buka Zaḡoḡano Badiꞌaꞌa Izipi kiniḡa§9:17 Farao ꞌahige rae niro, “Eḡeꞌa ḡaꞌe kinio ohoꞌirotaꞌaꞌe ḡae uꞌano eḡe inara ihozifine ebu eḡe ni raha niduꞌa zamaḡano furenifine raꞌohe.”✡9:17 Vaḡiniro 9:16 18 Eꞌanoꞌo iniu Badiꞌaꞌa vetuḡazihi rae raꞌeteꞌe azaḡaꞌe aniꞌa vetuḡaziꞌohe, u iniu mae teḡa riḡano ohozihi raꞌeteꞌe azaḡaꞌe teḡa riḡa azaḡano ohozeꞌohe.
Badiꞌa Maḡunu zu Vetuḡaḡa
19 Tena zae boꞌaḡano ꞌahoganiꞌa ꞌahige ihiꞌuma, “Badiꞌaꞌa ꞌougine, ani nougadu vazeꞌe veꞌoḡa rae rozeꞌohe? Iniuꞌa Badiꞌa ura agirohanogaꞌe idaḡa?” 20 O eḡe vaze, ḡa iniu radu Badiꞌa ḡoere baroneꞌohe? “Raha ḡoḡoreḡa ꞌahoganiꞌa ane haḡairoteꞌe vazeḡa mazao, 'Ḡa nougadu e ꞌahige haḡairo,' rae reꞌumahe?”✡9:20 Isaia 29:16, 45:9 21 Ḡoḡore haḡaeꞌeteꞌe vazeḡaniꞌa raha usuḡa tibaonoꞌo usuḡa nu madu, ani urao mada boroboro veize ḡoḡore haḡaoga zu mada niduꞌa veize ḡoḡore haḡaogaꞌe mene idaḡahe?
22 Badiꞌa zuni ḡoḡore haḡaeꞌeteꞌe vazeḡa teige ane urao haḡairo. Aniꞌa ane zama ḡugiꞌa ihozoga zu ane inara furenadu vazeꞌa ederoga uratiro. Rehano aniꞌa zamaḡa ḡugiꞌano ruiziteꞌe azaḡa mazao zamaḡa obone giganadu zamaḡa ḡugiꞌa obone tiro. 23 Ebu Badiꞌaꞌa vaze nu ruhibadu nize ḡihiꞌa hune rae rouga veize vetuḡaziro, ebu ze mazao aniꞌe ufeta ḡihiꞌaḡa hune rae ihozihi rae reiro. Aniꞌa ꞌouge haḡairoteꞌe moneo emeꞌa nagini reꞌuma? 24 Badiꞌaꞌa emeḡe vetuḡafiro zu ohotiro. Mene Iuda azaḡa boꞌaḡano daꞌo, rehano Iuda mene azaḡa boꞌaḡano zuni emeḡe ohofiro. 25 Badiꞌaꞌa Hosea Bukaḡano ꞌahige raꞌohe,
“Iniu eḡe none azaḡa mene reiroteꞌe azaḡaꞌe eḡeꞌa eḡe none azaḡa rae huziꞌuma,
ebu eḡeꞌa mene zamariroteꞌe azaḡaꞌe eḡeꞌa eḡe zamarone azaḡa rae huziꞌuma.”✡9:25 Hosea 2:23
26 Ebu,
“Badiꞌaꞌa raenaꞌa, 'Zaꞌe mene eḡe none azaḡa,' rae ziroteꞌe habaꞌa, eꞌe habaꞌa huneo
zeꞌe ḡabode radiuꞌeteꞌe Badiꞌaḡa ubugaubuga rae huziꞌuma.”✡9:26 Hosea 1:10
27 Isaiaꞌa Isaraela azaḡa moneo ꞌahige ḡihau huau ḡoeriro,
“Isaraela azaḡaꞌe davara genaḡa niꞌuriḡa teige ḡehaḡa bagaḡa rehano,
ḡabode radiuꞌeteꞌe azaḡa nu daꞌo ḡaboziꞌuma.
28 Zuhiꞌa Boroꞌe aneꞌa reiroteꞌe ḡoeꞌa rahao ḡarihe hube hune haḡae ḡonabiꞌuma.”✡9:28 Isaia 10:22-23
29 Ebu Isaiaꞌa ibite ꞌahige rae reiro,
“Zuhiꞌa Boro Gigiꞌaḡaniꞌa
emeḡe mariga nu mene mae tiro reifone,
emeꞌe Sodoma teigifo,
zu emeꞌe Gomora teigifo.”✡9:29 Isaia 1:9
Isaraela Azaḡaniꞌa Mene Firo
30 Tena eme nagini reꞌuma? Iuda mene azaḡaniꞌa Badiꞌa ubumao duduḡa reiteꞌe ibiḡa mene vaḡiro, rehano Badiꞌaꞌa zeꞌe ane ubumao duduḡa rae reiro. Zeꞌa Keriso mazao fieꞌeteꞌe uꞌano, zeꞌe Badiꞌa ubumao duduḡa reiro. 31 U Isaraela azaḡaꞌe Mose goro ḡoeꞌa hegotadu Badiꞌa ubumao duduḡa reiteꞌe ibiḡa vaḡiro, rehano mene horoniro. 32 Nougadu ꞌougiro? Mazaḡa zeḡeꞌa fieꞌeteꞌe uꞌano Badiꞌa ubumao duduḡa reiteꞌe ibiḡa mene vaḡiro, rehano Mose goro ḡoeꞌa hegotadu Badiꞌa ubumao duduḡa reiteꞌe ibiḡa vaḡiro. Zeꞌe hadi feꞌoḡa rana tutuhu uitiro. 33 Buka Zaḡoḡano ꞌahige rae mirihiro,
“Ḡianoꞌi, vazeꞌa tutuhu uitoga veize eḡeꞌa hadi ꞌahoga Zioni*9:33 Hugaꞌe Ierusalema ga Iuda azaḡa. zamaḡano tiꞌohe,
ebu ze uitoga veize vatava ꞌahoga tiꞌohe.
Rehano ani mazao fieꞌeteꞌe vazeḡaꞌe mene mazagaroniꞌuma.”✡9:33 Isaia 8:14, 28:16
*9:5 9:5 Aberahamo, Isako zu Iakobo
†9:5 9:5 Mesia
✡9:7 9:7 Ḡadaheḡa 21:12
‡9:9 9:9 ohotiroteꞌe madaḡano
✡9:9 9:9 Ḡadaheḡa 18:10
✡9:11-12 9:11-12 Ḡadaheḡa 25:23
✡9:13 9:13 Malaki 1:2-3
✡9:15 9:15 Vaḡiniro 33:19
§9:17 9:17 Farao
✡9:17 9:17 Vaḡiniro 9:16
✡9:20 9:20 Isaia 29:16, 45:9
✡9:25 9:25 Hosea 2:23
✡9:26 9:26 Hosea 1:10
✡9:28 9:28 Isaia 10:22-23
✡9:29 9:29 Isaia 1:9
*9:33 9:33 Hugaꞌe Ierusalema ga Iuda azaḡa.
✡9:33 9:33 Isaia 8:14, 28:16