Jombaanoŋ Tere 2
Jonoŋ Tereya ano 2 kolooro.
Jeŋ-asa-asari
Buŋa Tere kokawaa toya iinoŋ iyaŋaa qata “Jotamemeya moŋ,” qaro. Iinoŋ tere ii “Wombo emba ano iwaa meraborauruta,” yoŋoojoŋ ano. Qaa aasaŋgoya ii uumeleeŋ kanageso mombaa sareqaaya. Merabora ii kanageso ano wombo emba ii yoŋoo galeŋgiaga. Buŋa Terewaa qaa toroga kokanoŋ jopagoŋ aowombaajoŋ uu kuuŋ nonomakeja ano boi takapolakaya yoŋonoŋ ejemba kuma oŋoŋgi qaagianoŋ seiwabotiwaa galeŋ meme qaaga kolooja.
Buk kokawaa bakaya waŋa 4 ii kokaeŋ:
Qaa mutuya 1-3
Uujopa ii iwoi waŋa 4-6
Qaa doogoyanoŋ seiwabotiwaa galeŋ meme qaa 7-11
Terewaa qaa kota waŋa 12-13
1
1 Oo emba soro, Anutunoŋ meweeŋgoŋ gono uumeleeŋ kanagesouruga galeŋ koma oŋoma nanjaŋ. Niinoŋ oŋo qaa hoŋaa so uu wombonanoŋ jopagoŋ oŋomakejeŋ. Neenodeeŋ qaagoto, ejemba qaa hoŋa moma kotojuti, kuuya iyoŋonoŋ mono kaaŋagadeeŋ oŋo jopagoŋ oŋoma laligoju. Niinoŋ jotamemeya koloojeŋ ano giwo qaa amiŋ mobojoŋ kaŋ tere oojeŋ. 2 Qaa hoŋanoŋ uunananoŋ nama ananawo tetegoya qaa eŋ ubaa. Niinoŋ Buŋa qaa iikawaajoŋ ama jopagoŋ oŋonjeŋ.
3 Anana qaa hoŋa otaaŋ uunoŋ jopagoŋ aoŋ laligojoŋi eeŋ, Maŋ Anutu ano Meria Jiisas Kraist yoronoŋ mono kiaŋkomuŋ ano kaleŋmoriaŋ nononi luaenoŋ laligowoŋa.
Uujopa ano qaa hoŋa ii motooŋ otaawu.
4 Maŋnoŋ uujopawaa jeŋkooto qaaya nononoti, iikawaa sogadeeŋgoo kanagesouruga tosianoŋ qaa hoŋaa so nanamemeŋgia ama meŋ laligoju. Niinoŋ siligia kaaŋa iibe korisoro somata nomakeja. Kiaŋ.
5 *Jon 13.34; 15.12, 17Oo wombo alana emba somata, kambaŋ kokaamba jeŋkooto qaa ooŋ gonjeŋi, ii qaa dologa qaago. Qaa kanakanaiyanoŋga kanaiŋ moma kouniŋi, niinoŋ qaa ii mombo ooŋ kokaeŋ jeŋ kotoŋ gonjeŋ: Anana mono uunananoŋ jopagoŋ aoŋ laligowoŋa. 6 Jopagoŋ aoŋ laligowombaa qaaya jejeŋi, iikawaa hoŋa ii kokaeŋ: Anana mono Anutuwaa jojopaŋ qaa kuuya teŋ koma nanamemenana ama meŋ laligowoŋa. Kuuya oŋonoŋ jojopaŋ qaa kanakanaiyanoŋga moma laligoŋ kougiti, ii kokaeŋ: Oŋo mono uugianoŋ jopagoŋ aoŋ laligowu.
7 Aŋgomokoloŋ ejembanoŋ Jiisas Kraistwaajoŋ kokaeŋ jeŋ asugiŋkeju: “Hamoqeqe Toyanoŋ baloŋ eja sele busuwo asugimambaajoŋ amamaaro.” Kaeŋ jeŋ asugiŋ tiliqili aŋgi eŋkaloloŋ kolooŋkeja. Aŋgomokoloŋ ejemba kaaŋa ii Kraistwaa kitia nama tuarenjeŋ ama muŋkeju. Ejemba kaaŋa mamaganoŋ mono baloŋa baloŋa liligoŋ laŋ kema kaŋ laligoju. 8 Nononoŋ uuwaa gawoŋ meniŋ hoŋa uugianoŋ kolooroti, iikanoŋ sooŋ jaŋgoŋ qaombabotiwaajoŋ mojeŋ. Kawaajoŋ aŋgomokoloŋ ejembanoŋ eŋkaloloŋ ama oŋombubotiwaajoŋ mono galeŋgia meŋ aoŋ laligowu. Kaeŋ laligogi uugiaa hoŋanoŋ mende sooro Poŋnoŋ tawagia kuuya oŋondaborowaa.
9 Kraistnoŋ qaa kuma nononoti, moŋnoŋ ii mende qokotaajato, ii uuguŋ qaa toroqero melokanjiŋ jeŋkeji, iinoŋ Anutuya qaa eeŋ laligoja. Daeŋ yoŋonoŋ Kraistwaa Buŋa qaanoŋ qokotaajuti, iyoŋonoŋ mono Maŋ ano Mera yorowo kotiiŋ laligoju. 10 Moŋnoŋ Buŋa qaa jumuŋa ii mende meŋ oŋoonoŋ kaji, oŋo mono iwaa joloŋa mende jeŋ mirigianoŋ mende horogi uba. 11 Moŋnoŋ iwaa joloŋa jewaati, iinoŋ mono kileŋaa biŋawo hororo qaganoŋ uro ororoŋ bosimbaota. Kiaŋ.
Qaa tetegoya
12 Niinoŋ oŋoojoŋ qaa seiseiya oomambaajoŋ siiŋ mojento, ii papia seŋanoŋ iŋknoŋ oomambaajoŋ mende moma mesaojeŋ. Oŋoonoŋ kusu kaŋ jaasewaŋ qeŋ qaa amiŋ mobombaajoŋ mamboma jejeromoŋromoŋ anjeŋ. Aitoŋgowoŋati, kambaŋ iikanoŋ ainjoloŋ rama amiŋ moma korisoronana asugidaboroŋ uunana saa qero laligowombaajoŋ mojeŋ.
13 Anutunoŋ emba alaga galeŋ gawombaajoŋ meweeŋgoroti, emba soro iwaa kanagesourutanoŋ yeizozogia aŋgi goonoŋ kaja. Kiaŋ.