4
Keinoŋ Aabel qero komuro.
1 Aadamnoŋ embiawo laligoŋ agimiŋ aori Iiwnoŋ (Eewa) koro ama Kein (Kain) mero. Meŋ Kein qawaajoŋ kokaeŋ jero: “Anutunoŋ ilaaŋ nono merana mejeŋa.” 2 Iiwnoŋ kanageŋ Aadambaa meria Aabel, Keimbaa koga mero. Aabelnoŋ laligoŋ somariiŋ lama galeŋgiaga kolooro Keinoŋ komakoomo ejaga kolooŋ laligoro. 3 Kaeŋ laligori kambaŋ moŋnoŋ Keinoŋ gawonoŋa nene tosia meŋ kaŋ Pombaajoŋ siimoloŋ ooŋ muro. 4 *Hib 11.4 Aabelnoŋ kaaŋagadeeŋ lama tuuŋanoŋa mutu kolokolooya moŋ meŋ kaŋ qeŋ kitia kelegawonoŋ Pombaa siimoloŋ ooro. Ooro Poŋnoŋ Aabel aŋa ano iwaanoŋ siimoloŋ iima moro naaŋawo kolooro. 5 ‘Naaŋawo kolooroto, Poŋnoŋ Kein ano iwaanoŋ siimoloŋ ii iima togoro. Kaeŋ kolooro Keimbaa iriŋa soono uuta katitigoro jaasewaŋanoŋ bosoleero. 6 Bosoleero Poŋnoŋ Kein kokaeŋ ijoro. “Iriŋga mono naambaajoŋ soono jaasewaŋganoŋ bosoleeja? 7 Gii iwoi awaa ana meŋ aŋaliŋ gombe saanoŋ jaasewaŋga hak otaambaga me qaago? Iwoi awaa mende ana siŋgisoŋgowaa Toyanoŋ mono uugaa naguyanoŋ nama koumambaajoŋ awelegoŋ embomakeja. Kaeŋ embomakejato, gii mono iikawaa soŋgo ama galeŋ meŋ haamo amba.”
8 *Mat 23.35; Luuk 11.51; 1 Jon 3.12 Poŋnoŋ Kein kaeŋ ijoroto, Keinoŋ kileŋ koga Aabel kokaeŋ ijoro: “Mono kana anorodeeŋ gawonoŋ kembo.” Kaeŋ ijoro gawonoŋ kema Keinoŋ luguŋ koga Aabel qelanjiŋ meŋ qero komuro.
9 Komuro Poŋnoŋ Kein kokaeŋ qisiŋ muro: “Koga Aabel ii dakanoŋ laligoja?” Qisiŋ muro kokaeŋ meleeno: “Nii mende mojeŋ. Nii konaa galeŋa qaago.”
10 *Hib 12.24 Kaeŋ meleeno Poŋnoŋ ijoro: “Gii naa iwoiga anjaŋa? Moba, kogaa sayanoŋ mono namonoŋga asugiŋ qaro mojeŋ. 11 Namo kokawaa qaa oota aantama kogaa saya boroganoŋga meji, niinoŋ mono kokanoŋa konjoma gombe kemba. Joramoraa aŋgonjora ii mono goo qaganoŋ ambe uja. 12 Konjoma gombe komakoomo gawoŋ mena namonoŋ moriaŋaa hoŋa aŋgoŋ koma gono baloŋ so momolagoŋ keqeleŋ ama oloŋ koma laŋ kema kaŋ laligowa.”
13 Kaeŋ jero Keinoŋ Poŋ kokaeŋ ijoro, “Qaanaa iroŋa meleena qananoŋ uji, iikanoŋ mono esuŋna uuguŋ bimooro bosimambaajoŋ amamaamaŋa. 14 Moba, gii kete nii gawoŋqeqe balonoŋa notaana jaasewaŋganoŋa momolagoŋ baloŋ so keqeleŋ ama oloŋ koma laŋ kema kaŋ laligomaŋa. Kawaajoŋ moŋnoŋ nii niima afaaŋgoŋ nuro komumambo.”
15 Kaeŋ ijoroto, Poŋnoŋ kokaeŋ jero moro: “Kaeŋ qaago! Moŋnoŋ Kein qero komuwaati eeŋ, iikawaa iroŋa mono iwaa qaganoŋ uro ambeŋa 7 koloowaa.” Kaeŋ jeŋ moŋnoŋ Kein mokolooŋ qero komuwabotiwaajoŋ selianoŋ aiwese tere moŋ ano. 16 Kaeŋ ano Pombaa jaasewaŋa mesaoŋ kema kema baloŋ qata Lansaŋ ewaewaŋ (Nood) kanoŋ keuma laligoro. Baloŋ ii Eeden weeŋ koukoutanoŋ baageŋ eja. Kiaŋ.
Keimbaa gbiliuruta
17 Keinoŋ embiawo laligoŋ agimiŋ aori koro ama Henok mero. Keinoŋ taoŋ moŋ meŋ meriaa qata Henok qaro. 18 Henokwaa meria qata Irad. Iradwaa meria Mehujael. Mehujaelwaa meria Metusael. Metusaelwaa meria Lamek. Kaeŋ koloogi. 19 Lameknoŋ emba woi orono: Moŋ qata Ada, moŋ qata Zila. 20 Adanoŋ koro ama Jaabal mero. Iinoŋ ejemba opo sel kuuŋgianoŋ eŋ laligoŋ bao bulmakao galeŋ koma oŋoma laligojuti, iyoŋoo beŋisigia kolooro. 21 Jaabalwaa kogaa qata Juubal. Iinoŋ ejemba gita kulele qeŋ awelo uuŋ laligojuti, iyoŋoo beŋisigia kolooro. 22 Zilanoŋ kaaŋagadeeŋ meria qata Tuubal-Kein mero. Iinoŋ somariiŋ gawombaa tulsya ano manjaqeqewaa iwoiya kania kania ii braas ano ainoŋ ooro bolbolgoro qokotaaŋ meŋkero. Tuubal-Keimbaa naaŋa qata Nama.
23 Lameknoŋ kambaŋ moŋnoŋ embawoita ii kokaeŋ irijoro,
“Ada ano Zila embawoina, oro mono geja ama qaana koi mobao:
Moŋnoŋ nii nuŋ qijiriro iikawaa iroŋaajoŋ
mono eja moŋ qewe komuwaa.
Moŋnoŋ nii gbilibuuruŋ nuro sa iikawaa
iroŋaajoŋ mono eja gbaworo moŋ qewe komuwaa.
24 *Mat 18.22 Moŋnoŋ Kein qero iroŋa iwaa qaganoŋ uro ambeŋa 7 koloowaato,
moŋnoŋ Lamek nii nuro iikawaa iroŋa mono iwaa qaganoŋ uro ambeŋa 77 koloowaa.” Kiaŋ.
Seet ano Enos
25 Eja mutuya Aadam iinoŋ mombo embiawo laligoŋ agimiŋ aori meragara moŋ kolooro kokaeŋ jero: “Keinoŋ Aabel qero komurotiwaajoŋ Anutunoŋ Aabelwaa kitianoŋ merana moŋ nonja.” Kawaajoŋ qata Seet (Nonja) qaro. 26 Seetwaa meria kaaŋagadeeŋ kolooro qata Enos qaro. Kiaŋ.
Kambaŋ iikanoŋ ejemba yoŋonoŋ kanaiŋ Pombaa qata qama kooliŋ laligogi. Kiaŋ.