1 *Job 1.6; 2.1 Ejemba namo qaganoŋ laligogi jaŋgogianoŋ kanaiŋ somariiro boraurugia ii kaaŋagadeeŋ koloogi. 2 Koloogi kambaŋ kanoŋ Anutuwaa merauruta yoŋonoŋ ejemba yoŋoo boraurugia iŋisosoroogi. Iŋisosoroogitiwaa so ii oŋoŋgi embaurugia koloogi. 3 Kaeŋ koloogi kambaŋ iikanoŋ Poŋnoŋ qaa kokaeŋ jero: “Namo ejembanoŋ jaa selewo kambaŋ tetegoya qaa laligoŋ ubuto, yoŋonoŋ mono komuwu. Areŋgia kaeŋ ama oŋonjeŋ. Kambaŋ kokaamba kanaiŋ laaligogia mono yambu 120 jaŋgo ii mende uuguŋ laligoŋ ubuya.” 4 *Jaŋ 13.33 Anutuwaa merauruta yoŋonoŋ baloŋ ejemba yoŋoo boraurugia oŋoŋgi embaurugia kolooŋ merabora oŋoŋgiti, kambaŋ iikanoŋ ano kanageŋ kaaŋagadeeŋ eja damubiribirigiawo kolooŋ somariiŋ namonoŋ laligogi. Monowaa monoyanoŋga beŋurugia qabuŋawo laligogiti, iyoŋonoŋ mono ii koloogi.

5 *Mat 24.37; Luuk 17.26; 1 Piito 3.20 Baloŋ ejemba yoŋoo kileŋagia ii somata qatawo kolooro uugiaa momo areŋgia kuuya ii kambaŋ so bologagadeeŋ suulaŋ (pororo) ama laligogiti, ii Poŋnoŋ iiro. 6 Ii iima ejemba mokolooŋ oŋono namonoŋ laligogiti, iikawaajoŋ Anutunoŋ moma boliŋ wosobirinoŋ uuta saa qero siimbobolo moma laligoro. 7 Kaeŋ moma laligoŋ qaa kokaeŋ jero: “Ejemba mokolooŋ oŋombeti, niinoŋ mono ii balonoŋa uŋuŋ tiwilaaŋ oŋomaŋa. Ejemba, miriwaa oroya, iwoi bagianoŋ koma kondondoŋgoŋkejuti ano kanakeewambaa kooŋa mokolooŋ oŋombetiwaajoŋ moma boliŋ aoŋ ii mono uŋuŋ tiwilaaŋ oŋomaŋa.” 8 Kaeŋ jeroto, eja Nooa iinoŋ Pombaa jaanoŋ kiaŋkoomuya mokolooŋ laligoro. 9-10 *2 Piito 2.5 Nooawaa gbiliuruta yoŋoo sundugia ii kokaeŋ: Merauruta karooŋ qagia Seem, Haam ano Jaafet koloogi. Nooanoŋ ejemba batugianoŋ eja solaŋa koposowaa qaaya qaa laligoŋ uuta Anutuwo somoŋgoŋ kema kaŋ laligoro. 11 Nooanoŋ kaeŋ laligoroto, ejemba tosaaŋa kuuya ii Anutuwaa jaanoŋ dogoŋ bolidaborogi. Kawaajoŋ ejemba pororo uŋuŋ tiwilaaŋ oŋoŋgi, iikanoŋ baloŋ kuuya sokoma ero. 12 Ejemba kuuya namonoŋ kema kaŋ laaligogia meŋ bolidaborogi gomaŋ baloŋ kuuya yoŋoo nanamemeŋgia ii dogoŋ aŋgonjorayawo kolooro Anutunoŋ namonoŋ uuŋ tanigia kaaŋa ii iiro.

13 Kaeŋ iima Anutunoŋ Nooa qaa kokaeŋ ijoro: “Ejemba yoŋoojoŋ ama uŋuŋ tiwitiwilaaŋ aoao ii namo kuuya sokoma eja. Kawaajoŋ niinoŋ ejemba kuuya meŋ komuŋ oŋomambaajoŋ qaana somoŋgowe. Moba, niinoŋ apunoŋ baloŋ meleembe kemero iwoi kuuya isiŋosoŋgiawo ii komudaborowuya. 14 Kawaajoŋ gii mono geeŋgo reeŋ gere koma kanoŋ waŋgoga mewa. Iikawaa uuta kotona uuta melamelaa koloowa. Waŋgowaa uuta ano selia ii qandonoŋ kuuŋ mokotaadaborowa. 15 Waŋgo ii kokaaŋa mewa: korigaya 133 miita (450 fiit), aaregeŋa 22 miita (75 fiit) ano koŋaya 13 miita (45 fiit) kaeŋ mewa. 16 Waareŋa mejugoŋ sopa ano waareŋ batugaranoŋ liligoŋ jeŋgenaŋ tintiŋa 44 sentimiita (18 ins) ii kotoŋ mesaowa. Waŋgowaa uuta mosona uuta qaga, batuya ano dusiita karooŋ koloowu. Waŋgo naguya ii nemuŋaageŋ amba. 17 Moba! Niinoŋ mono jewe gboulu somatanoŋ kouma baloŋ kuuya qeŋ tururo ejemba ano iwoi laaligowaa aasoŋgiawo kuuya sombiŋ baatanoŋ laligojuti, iyoŋonoŋ mono apu nemotoŋ komuwu. Kaeŋ komugi namowaa iwoiya kuuya ii mono qaondaborowuya.

18 Kaeŋ asugiwaato, niinoŋ giwo soomoŋgo areŋ kokaeŋ anjeŋ: Gii mono waŋgonoŋ uba. Gii, embaga ano mera eŋarouruga oŋonoŋ mono motooŋ waŋgonoŋ ubu. 19 Uma laligogi iwoi laaligogiawo kuuya ii qaondaborowubotiwaajoŋ yoŋoonoŋa woi woi ejia ano embia ii sogianoŋ uŋuana giwo motooŋ waŋgonoŋ ubu. 20 Kooŋ tanigia kania kania, miriwaa oroya tanigia kania kania ano namowaa mokoleŋ, lolooŋ iwoi tanigia kania kania kuuya yoŋoonoŋga woi woi ii mono komuwubotiwaajoŋ otana goonoŋ kagi waŋgonoŋ ubu. 21 Kaaŋagadeeŋ oŋoaŋgia ano kooŋ, oro iwoi kuuya yoŋonoŋ newutiwaa so mono nembanene kania kania mokolooŋ korama meŋ kululuuŋ waŋgonoŋ ana kalaŋ koŋkoŋa ewaa.” 22 *Hib 11.7 Anutunoŋ Nooa kaeŋ ambaatiwaajoŋ jeŋ kotoŋ muroti, iikawaa so mono teŋ koma ii kuuya ama medabororo.