1 Kambaŋ batuya kanoŋ Ismael kanagesowaa komahooro eja yoŋonoŋ Joosef wama Iijipt kantrinoŋ keuma sewaŋa mewutiwaajoŋ aŋgi. Aŋgi Iijipt eja moŋ qata Potifar, Faarao kimbaa jawiŋa moŋ ano laaligoyaa sikiriti yoŋoo kawali galeŋgiaga laligoroti, iinoŋ ii sewaŋa mero weleŋqeqeya omaya kolooro.

2 *Apo 7.9 Kaeŋ ama laligoro Poŋnoŋ Joosefwo nano iwoi kuuya ama meŋ laligoroti, iikanoŋ toomoriaŋ mokolooro. Iinoŋ toya Iijipt eja iwaa mirinoŋ laligoro. 3 Kaeŋ laligoro Poŋnoŋ Joosefwo nama kondooŋ muro iwoi kuuya borianoŋ meŋ laligoroti, iikanoŋ toomoriaŋawo kolooro. Kaeŋ kolooro toyanoŋ ii iiro. 4 Toyanoŋ ii iiro awaa sokono iwaa jaanoŋ iima-aiŋ mokolooro ijoro aŋaa laaligoyaa galeŋa kolooro. Potifarnoŋ Joosef kuuŋ muro miriaa iwoi kuuya galeŋ kono esuhina buŋaya kuuya iwaa boronoŋ ano kalaŋ koma laligoro. 5 Miriaa iwoiya ano esuhina buŋaya ii kuuya Joosefnoŋ galeŋ kombaatiwaajoŋ borianoŋ ano laligoroti, Poŋnoŋ kambaŋ iikanoŋadeeŋ kanaiŋ Iijipt eja iwaanoŋ miri iwoiya ii Joosefwaajoŋ ama kotuegoŋ laligoro. Potifarwaa mirianoŋ ano gawoŋanoŋ ilawoilaya kuuya eroti, ii kotumotue qaganoŋ ero. 6 Kaeŋ ero Potifarnoŋ ilawoilaya eŋ muroti, ii kuuya Joosefwaa borianoŋ andaboroŋ nama aŋo ii me woi iikawaa majakakaya moŋ mende moro. Iinoŋ nene nemambaajoŋ kaaŋgadeeŋ motoqoto mende moma siiseweweya qaa laligoro. Joosefwaa selia onjonbonjoŋ somariiro kaitanianoŋ iima-aiŋaiŋawo ero laligoro.

7 Kaeŋ laligoro kambaŋ tosia tegoro Potifarwaa embianoŋ Joosef iima iimanaaŋa moma kokaeŋ ijoro: “Gii mono kana niwo ewo.”

8 Kaeŋ ijoroto, iinoŋ ii togoŋ toyaa embia kokaeŋ ijoro: “Qaago! Moba, tona aŋo mirianoŋ ilawoila ejiwaa majakakaya mende momakejato, esuhina buŋaya kuuya ii mono niinoŋ galeŋ koma laligomambaajoŋ noo boronanoŋ andabororota eja.

9 Kaeŋ ero miri kokawaa uutanoŋ ii ano nii noroo ku-usunaranoŋ mono ororoŋ eja. Giinoŋ iwaa embia koloojaŋiwaajoŋ gii aŋgoŋ koma nonoto, iwoi tosia moŋ ii noojoŋ mende aŋgoŋ kono. Kawaajoŋ nii nomaembaajoŋ ama nanamemeŋ bologa totooŋ kaaŋa ii ama iikanoŋ Anutu qotogoŋ siŋgisoŋgo ambenaga? Awawi totooŋ” 10 Kaeŋ ijoro moma qaa kaaŋa ii weemboria so Joosef ijoŋ laligoroto, iinoŋ kileŋ ii qotogoŋ kema iwaa duŋ eenoŋ kema iwo ewotiwaajoŋ mende wambelaaro. Kaeŋ iwo motooŋ laligowotiwaajoŋ kaaŋagadeeŋ togoro.

11 Kaeŋ togoŋ laligoro weemboria moŋnoŋ miriwaa weleŋqeqeuruta yoŋoonoŋga moŋnoŋ miri uutanoŋ mende laligoro Joosefnoŋ gawoŋa jejeta memambaajoŋ miri uutanoŋ uro. 12 Uro emba iikanoŋ Joosefwaa malekuyanoŋ qelanjiŋ meŋ kokaeŋ ijoro: “Gii mono kana niwo ewo.” Kaeŋ ijoroto, Joosefnoŋ malekuya ii iwaa borianoŋ mesaoŋ oloŋ koma qiqigoŋ kema sombenoŋ seleeŋgeŋ kamaaro. 13 Malekuya iwaa borianoŋ mesaoŋ oloŋ koma sombenoŋ kamaaroti, emba iikanoŋ ii iiro.

14 Ii iima miriwaa weleŋqeqeuruta oŋoono kagi ii kokaeŋ iŋijoro: “Mobu, lonanoŋ Hibruu eja ii wama mirinananoŋ karoti, iinoŋ mono goŋgiso goŋgegee ama nonoma laligoja. Iinoŋ niwo ewojoŋ noonoŋ koujato, niinoŋ qama gigilaajeŋ. 15 Qama gigilaawe moma malekuya noo wosonanoŋ mesaoŋ oloŋ koma qiqigoŋ kema seleeŋgeŋ kemeja.”

16 Kaeŋ iŋijoŋ Joosefwaanoŋ maleku kosianoŋ ano ero Joosefwaa toyanoŋ eleema kawaatiwaajoŋ mamboma raro karo. 17 Karo sundu ii kaaŋagadeeŋ ijoro: “Hibruu weleŋqeqe eja ii wana ananaa mirinoŋ karoti, iinoŋ mono niwo goŋaaŋgole amambaajoŋ noonoŋ koujaa. 18 Koujaato, niinoŋ qa gigilaawe malekuya noo wosonanoŋ mesaoŋ oloŋ koma qiqigoŋ kema seleeŋgeŋ kemejaa.”

19 Kaeŋ ijoro Joosefwaa toya ii embianoŋ sundu kaeŋ jero moro kokaeŋ ijoro: “Goo weleŋqeqeganoŋ mono kaeŋ ama nonja.” Kaeŋ ijoro iriŋa soono uuta gere jero. 20 Uuta gere jero jeŋ kotoro Joosef meŋ Faarao kimbaa kapuare mirinoŋ eja galeŋ koma oŋoma laligogiti, mono kapuare miri iikanoŋ ooŋgi kemeŋ eŋ laligoro. 21 *Apo 7.9 Joosefnoŋ kapuare miri iikanoŋ laligoroto, Poŋnoŋ Joosefwo nama kotuegoŋ kiaŋkoomu muŋ laligoro kapuare miriwaa galeŋ waŋanoŋ ii iima iwaajoŋ iima-aiŋaiŋ moro. 22 Iima-aiŋaiŋ morotiwaajoŋ eja kuuya kapuare mirinoŋ ragiti, ii Joosefnoŋ galeŋ koma oŋombaatiwaajoŋ iwaa boronoŋ oŋoono. Iwoi kuuya kanoŋ ama meŋ laligogiti, ii Joosefnoŋ jeŋ kotoŋ oŋonotiwaa so otaaŋ ama meŋ laligogi.

23 Poŋnoŋ Joosefwo nama kotuegoŋ muŋ kondooro iwoi kuuya ama meŋ laligoroti, ii toomoriaŋawo asugiŋ ero. Kawaajoŋ kapuare miriwaa galeŋ waŋanoŋ Joosef iwoi kuuya nomaeŋ galeŋ koma jeŋ kotoŋ oŋoma laligoroti, iikawaa majakakaya moŋ mende totooŋ moma laligoro. Kiaŋ.