46
Jeikobnoŋ kanatuuru-uruta yoŋowo Iijipt keŋgi.
1 Israelnoŋ esuhina iwoiya kuuya kopepereeŋ meŋ waama keno. Kema Beerseba gomanoŋ keuma nama kanoŋ maŋa Aisakwaa Poŋ Anutuyaajoŋ siimoloŋ ooro.
2 Ii ooŋ gomantiiŋa ero jaaya meleeno uŋa iima iikanoŋ Anutunoŋ Israel qaa ijoŋ qata “Jeikob, Jeikob!” qaro
“Nii koi,” jeŋ meleeno.
3 Meleeno kokaeŋ ijoro: “Nii Anutu, goo maŋgaa beŋsakoŋa. Gii Iijipt kememambaajoŋ toroko mende moba. Niinoŋ iikanoŋ kotuegoŋ gombe kanagesoga tuuŋlelembe somata koloowuya. 4 Niinoŋ giwo Iijipt kememaŋa ano kaaŋagadeeŋ gbiliuruga iikanoŋa uŋuambe mombo eleema koi kawuya. Giinoŋ komuna Joosef iyaŋaa borianoŋ mono goo jaa juga kuno kamaawaa.”
5 Kawaa gematanoŋ Jeikobnoŋ Beerseba gomaŋ mesaowoŋa jero Israelwaa meraurutanoŋ maŋgia ano embameraurugia ii kojojooŋ oŋoŋgi hoos karenoŋ ugi. Faarao kiŋnoŋ hoos kare iikanoŋ uŋuama kawutiwaajoŋ jeŋ tegoŋ anota meŋ keŋgi. 6 *Apo 7.15 Esuhinagia ano miri orogia kuuya Keinan balonoŋ laligoŋ buŋa qeŋ meŋ laligogiti, ii kaaŋiadeeŋ motooŋ meŋ keŋgi. Jeikob ano gbiliuruta kuuya yoŋonoŋ kaeŋ Iijipt keŋgi. 7 Gbiliuruta kuuya, esameraaŋuruta eja ano emba ii kuuya uŋuama Iijipt keŋgi.
8 Israel qata moŋ Jeikob ano iwaa gbiliuruta Iijipt keŋgiti, iyoŋoo qagia ii kokaeŋ:
Jeikobwaa meria mutuya Ruuben.
9 Ruubembaa merauruta qagia
Hanok, Palu, Hezron ano Karmi.
10 Simeombaa merauruta qagia
Jemuel, Jamin, Ohad, Jakin, Zohar ano Saul. Saulwaa nemuŋa ii Keinan emba moŋ.
11 Liwaiwaa merauruta qagia
Gerson, Kohat ano Merari.
12 Juudawaa merauruta qagia
Er, Onan, Sela, Perez ano Zera. (Er ano Oonan yoronoŋ Keinan balonoŋ komuri.)
Perezwaa merawoita ii
Hezron ano Eer.
13 Aiskarwaa merauruta qagia
Tola, Puwa, Jasub ano Simron.
14 Zebulumbaa merauruta qagia
Sered, Elon ano Jalel.
15 Jeikobwaa merauruta embia Leanoŋ Mesopotemia (Padan Aram) balonoŋ oŋonoti, iyoŋoo qagia kiaŋ. Boragara Daina ii kaaŋagadeeŋ mero. Jeikob ano Lea yoroo esameraaŋurugara ii kaeŋ weeŋgoŋ mindirigi 33 kolooro.
16 Gadwaa merauruta qagia
Zefon, Hagi, Suni, Ezbon, Eeri, Arodi ano Areli.
17 Aserwaa merauruta qagia
Imna, Iswa, Iswi ano Beria.
Naaŋgiaa qata Sera.
Beriawaa merawoita qagara ii
Heber ano Malkiel.
18 Labanoŋ emba qata Zilpa borata Leawaa weleŋ embaga laligowaawaajoŋ muroti, iinoŋ Jeikobwaa merauruta kaeŋ oŋono. Jeikob ano Zilpa yoroo esameraaŋurugara ii kaeŋ weeŋgoŋ mindirigi 16 kolooro.
19 Jeikobwaa embia Reizelwaa merawoita ii Joosef ano Benjamin. 20 *Jen 41.50-52 Joosefwaa merawoita Iijipt kantrinoŋ kolooriti, ii qagara Manase ano Efraim. Nemuŋgaraa qata Asenat ii Heliopolis (On) taombaa jigo gawoŋ galeŋ qata Potifera iwaa borataga.
21 Benjamimbaa merauruta qagia
Bela, Beker, Asbel, Geera, Naaman, Eehi, Ros, Mupim, Hupim ano Ard.
22 Jeikobwaa merawoita Reizelnoŋ oronoti, iyoroo qagara kiaŋ. Jeikob ano Reizel yoroo esameraaŋurugara kaeŋ weeŋgoŋ mindirigi korebore 14 kolooro.
23 Dambaa meria qata
Husim.
24 Naftaliwaa merauruta qagia
Jaziel, Guni, Jezer ano Silem.
25 Labanoŋ emba qata Bilha borata Reizelwaa weleŋ embaga laligowaatiwaajoŋ muroti, iinoŋ Jeikobwaa merauruta kaeŋ oŋono. Jeikob ano Bilha yoroo esameraaŋurugara ii kaeŋ weeŋgoŋ mindirigi korebore 7 kolooro.
26 Jeikobwaa esameraaŋuruta dindiŋa tooŋ iwo Iijipt keŋgiti, iyoŋoo jaŋgogia weeŋgoŋ mindirigi korebore kanatuuru 66 koloogi. Meraaŋuruta yoŋoo embagia ii jaŋgo iikanoŋ mende toroqegi. 27 *Apo 7.14 Joosefwaa merawoita Iijipt kantrinoŋ kolooriti, ii woi. Jeikobwaa kanatuuruuruta Iijipt keŋgiti, iyoŋoo jaŋgogia ii kaeŋ weeŋgoŋ mindirigi 70 kolooro. Kiaŋ.
Jeikobnoŋ kanagesouruta yoŋowo Iijipt keugi.
28 Kananoŋ kema laligoŋ Jeikobnoŋ Juuda wala wasiŋ kokaeŋ ijoro: “Gii mono Joosefwaanoŋ kema Goosen balonoŋ kekembaa kaniaajoŋ qisiŋ muba.” Kaeŋ ijoro kema karo Goosen prowinsnoŋ keugi. 29 Joosefnoŋ keugitiwaa buzuya moma jero hoos karenoŋ somoŋgoŋ mozozoŋgogi qaganoŋ uma maŋa Israelwo aitoŋgowowaajoŋ Goosen balonoŋ keno. Kema iima iwaa jaanoŋ keuma boria aroyanoŋ giliro kemero aŋgoŋ muŋ kambaŋ koriga qaqateteya meŋ urusaaŋ qero. 30 Israelnoŋ Joosef kokaeŋ ijoro: “Giinoŋ toroqeŋ jaawo laligojaŋi, ii neeno giijeŋa kambaŋ kokaamba saanoŋ jojoriŋ komumaŋa.”
31 Kaeŋ ijoro Joosefnoŋ daremuŋuruta ano maŋaa kanagesoya kokaeŋ iŋijoro mogi: “Niinoŋ mono Faarao kimbaanoŋ uma qaa kokaeŋ ijomaŋa: ‘Daremuŋuruna ano maŋnaa kanagesoya Keinan balonoŋ laligogiti, iyoŋonoŋ mono noonoŋ kajuya. 32 Daremuŋuruna yoŋonoŋ lama bulmakao galeŋgia kolooŋ ii galeŋ koma oŋoma laligojutiwaa kawombaajoŋ ama lama tuuŋgia, bulmakao tuuŋgia ano esuhina ilawoilagia kuuya ii uŋuama kajuya.’ 33 Kawaajoŋ Faarao kiŋnoŋ oŋoono jaasewaŋanoŋ keugi kokaeŋ qisiŋ oŋombaa: ‘Oŋo naa gawoŋga meŋkeju?’
34 “Kaeŋ qisiŋ oŋono oŋo kokaeŋ meleema mubu: ‘Weleŋqeqeuruga nononoŋ mono au asaurunana wala meŋ laligogitiwaa so meraanananoŋga lama bulmakao galeŋkoŋkoŋ gawoŋa meŋ laligoŋ kouma laligojoŋ.’ Kaeŋ meleema mugi iinoŋ saanoŋ Goosen prowinsnoŋ rara dunduŋgia meagowutiwaajoŋ “Ooŋ!” jero laligowuya. Iijipt ejemba yoŋonoŋ lama bulmakao galeŋ koŋkoŋ ejemba kuuya yoŋoojoŋ mogi arokuukuugiawo kolooŋkeju.” Joosefnoŋ qaaya kaeŋ iŋijoro.