2
Kraistwaa so oŋoaŋgia meŋ kamaaŋ ama aoŋ laligowu.
1 Oŋo Kraistwo qokotaaŋ nanjutiwaajoŋ mono uugia naŋgoŋ aowombaajoŋ qambaŋmambaŋ mokoloowu. Uujopagia iikanoŋ mono uluŋkoleŋ ama aoŋkebu. Uŋa Toroyawo ususugoŋ nama waegia meŋ kiaŋkomuŋ aoŋkebu. 2 Kaeŋ anjutiwaajoŋ mono momo motooŋgo otaaŋ ororoŋ jopagoŋ aoŋ luaenoŋ laligowu. Mono uusiiŋgia ano momo areŋgia motooŋgo ambombaajoŋ somoŋgowu. Qaa kaeŋ somoŋgoŋ uumotooŋgo aŋgi hoŋa kolooro moma niinoŋ oŋoojoŋ honoŋa qaa aisooŋ laligomaŋa.
3 Ilawoila oŋoaŋgiaajoŋadeeŋ horowombaa siiŋanoŋ mono mende nemuŋ koma oŋomba. Oŋoaŋgiaa qabuŋagianoŋ somariiwaatiwaajoŋ mono selegia mende meŋ ubuto, uugia meŋ kamaaŋ ama tosaaŋa yoŋoojoŋ mogi umakeba. 4 Oŋo motomotooŋ mono oŋoaŋgiaa uugiagadeeŋ qeaŋgowaatiwaajoŋ mende romoŋgowuto, tosaaŋa yoŋoo uugianoŋ qeaŋgowaatiwaajoŋ kaaŋagadeeŋ kaparaŋ koma romoŋgoŋ yagowu. 5 Kraist Jiisasnoŋ balonoŋ laligoro aro momo eŋ muroti, iikayadeeŋ mono oŋoonoŋ ero ii otaaŋ laligowu.
6 Anutuwaa kaitani kaaŋa eŋ muro laligoroto, kileŋ Anutu kaaŋa laligorotiwaajoŋ mende mondoŋ awelegoŋ laligoro.
7 Kaeŋ qaagoto, aŋo afaaŋgoŋ Anutuwaa asamararaŋa mesaoŋ kamaaŋ meleema eja tani kolooŋ weleŋqeqewaa kaitania meŋ laligoro.
Mono baloŋ eja ananaa tani kolooŋ laligoro.
8 Kaeŋ laligoŋ uuta meŋ kamaaŋ aoŋ Maŋaa qaa jeta kambaŋ so teŋ koma laligoro. Kaeŋ laligoro gamu qeŋ muŋ “Maripoonoŋ qewoŋa,” jegito, kambaŋ iikanoŋ kaaŋagadeeŋ teŋ kondabororo.
9 Kaeŋ teŋ koma laligorotiwaajoŋ ama Anutunoŋ wano eukanoŋ uma raro qabuŋa muroti, iikanoŋ qa tosaaŋa kuuya uŋuuguŋ akadamuyawo kolooja.
10 *Ais 45.23Anutunoŋ qabuŋa uuta ii kokaembaajoŋ muro:
Ejemba korebore anana mono qa iikawaajoŋ ama kambaŋ moŋnoŋ simiŋ kuma mepeseeŋ muboŋa. Tosianoŋ Siwe gomanoŋ eukanoŋ laligoju. Tosianoŋ namonoŋ koi laligojoŋ. Tosianoŋ komuŋ koomu mirinoŋ me senjoŋ mirinoŋ laligoju. Anana mono korebore kululuuŋ usugoŋ simiŋ kuma muboŋa.
11 Kuuya anana simiŋ kuma muŋ je buu susugia so Maŋ Anutu asuganoŋ goda qewombaajoŋ qata jokolooŋ kokaeŋ jewoŋa,
“Jiisas Kraistnoŋ mono Poŋnana kolooja.” Kiaŋ.
Jiisaswaa asasaga ii ejemba batugianoŋ qendeema laligowu.
12 Kawaajoŋ wombo alauruna, oŋo mono Kraistwaa sareya otaaŋ iikanoŋ mende sologoŋ kamaawu. Kambaŋ so Anutuwaa qaa teŋ koma letoma laligogiti, iikawaa so siligianoŋ uumeleeŋ ejemba oŋoonoŋ sokonji, ii mono kaparaŋ koma otaaŋ uuwaa gawoŋ meŋ laligowu. Niinoŋ oŋowo laligoweti, kambaŋ iikanoŋ Buŋa qaa awaagadeeŋ koma gbiliŋ zeŋ nama laligogi. Oŋomesaoŋ sigeŋsigeŋ laligojeŋi, kambaŋ kokanoŋ mono kaaŋiadeeŋ Anutuwaa jaanoŋ sombugia moma jeneŋgia ororo pondaŋ gawoŋ ii meŋ sororogoŋ laligowu.
13 Anutu aŋo mono oŋo suulaŋ sololooŋ nemuŋ koma oŋoma iyaŋaa areŋaa so uugia kuuŋkeja. Kaeŋ kanoŋ uusiiŋgia Anutu sokoma mubaatiwaa so kolooro inaaŋ oŋono gawoŋa megi hoŋa kolooŋkeba.
14 Galeŋurugia yoŋowo qaa meŋkamakamaa mende ama laligowu. Jeŋmeesaŋ ano uunoŋ ŋindiŋ-ŋunduru laŋ mende amakebuto, areŋnana kuuya mono uuwoi jeaqea mesaoŋ pondaŋ meŋ laligowu. 15 *Dut 32.5Nanamemeŋgianoŋ mono koposowaa qaaya qaa soraaya kolooŋ ama meŋ laligowu. Ejemba doogoya iriŋqiriŋa kete balonoŋ laligojuti, oŋo mono iyoŋoo batugianoŋ Anutuwaa merabora solaŋa soro laligowu. Seŋgelao sombinoŋ eu asarijuti, oŋo mono kaaŋiadeeŋ balonoŋ sili awaa ama iikanoŋ ejemba asariŋ oŋoma laligowu.
16 Kaeŋ laligoŋ laaligo kotigaa Buŋa qaaya pondaŋ meŋ ejemba oŋombombaajoŋ jojoriŋ laligowu. Kaeŋ laligogi Kraistnoŋ eleema kawaati, kambaŋ iikanoŋ noo kanananoŋ kokaeŋ asugiwaa, “Aaŋgole ejanoŋ kuunoŋ haamo amambaajoŋ esuŋa meŋ kululuuŋ kemakeji, niinoŋ iikawaa so uuwaa gawombaajoŋ sele qeŋ meŋ kotiiŋ laligowe. Ii eeŋ toontooŋ mende meŋ laligoweto, hoŋa kolooro.” Kanana kaeŋ kolooro saanoŋ neenaa selena oŋoojoŋ ama mepeseemaŋa.
17 Niinoŋ laaligona qeleema togoŋ oŋoma Anutuwaanoŋ gawoŋ teŋ koma meŋ laligowe. Kaeŋ laligowe oŋo uugia meleema Anutu moma laarigi iikawaa hoŋa asugiŋkeja. Kawaajoŋ Room gawman yoŋonoŋ qaana jeŋ tegoŋ oro kaaŋa nuŋ siimoloŋ ooŋooŋ kaaŋa ama nombuyaga. Sele busunaa saya kaeŋ maabenagati eeŋ, ii mono apu kaaŋa eeŋ totooŋ mende kemenaga. Oŋoo momalaari gawoŋgiaa hoŋaajoŋ ama ii mono akadamuyawo koloowe sokonaga. Kawaajoŋ nugi komuwenagato, uunanoŋ mono kileŋ aisooŋkejeŋ ano kuuya oŋowo motooŋ aisooŋkeboŋa. 18 Kaaŋiadeeŋ oŋo mono aisoowu ano niwo otokoriaŋ maama aisooŋ laligowoŋa. Kiaŋ.
Timoti wasiwe Filipai oŋoonoŋ kawaa.
19 Poŋ Jiisasnoŋ noojoŋ moro sokombaati eeŋ, mono uulaŋawo Timoti wasimambaajoŋ moma jejeromoŋromoŋ anjeŋ. Oŋoonoŋ kaŋ nomaeŋ laligojuti, ii moma eleema kaŋ nijoro moma noo uunanoŋ kaaŋagadeeŋ qeaŋgoŋ sororogonaga. 20 Momalaarigianoŋ kotiiju me loorijuti, iinoŋ yaŋodeeŋ oŋoojoŋ majakaka kaeŋ moma noo kooronanoŋ nanja. Tosianoŋ koi laligojuti, iyoŋonoŋ mono “Iyaŋgiaa majakakagiaga,” jeŋ qaago totooŋ kotiŋgoŋ oŋombombaajoŋ momakeju. 21 Yoŋonoŋ kuuya iyaŋgiaa iwoiwaajoŋ moma ii koma horoŋ meŋ somariiwombaajoŋ janjariŋ riiŋkejuto, Kraist Jiisaswaa gawoŋanoŋ hoŋawo kolooŋkebaatiwaajoŋ mende kaparaŋ komakeju. Mono qemasologeŋ laŋ laligoju.
22 Laŋ laligojuto, Timotinoŋ kania awaa qendeenoti, ii oŋoaŋgio moma yagoju. Meranoŋ aŋaa maŋa weleŋ qeŋ muŋkeji, iinoŋ mono iikawaa so nii Oligaa Buŋa gawombaa ilaaŋ noma weleŋ qeŋ laligoro. 23 Kawaajoŋ Room gawman yoŋonoŋ noo qaa nomaeŋ ama nombombaajoŋ somoŋgowuti, ii momago mono saanoŋ Timoti wasiwe uulaŋawo oŋoonoŋ kawaatiwaa jejeromoŋromoŋ anjeŋ. 24 Neeno kaaŋiadeeŋ Pombo nama kambaŋ mende koriro oŋoonoŋ kamambaajoŋ awasaŋkaka kaeŋ moma laarijeŋ.
Epafroditus wasiwe Filipai oŋoonoŋ kawaa.
25 Niinoŋ iwoi moŋgama amamaaŋ laligowe oŋonoŋ neŋana Epafroditus wasigi kaŋ naŋgoŋ ilaaŋ nono. Iinoŋ noo kooronanoŋ gawoŋ meŋ manja qeŋ laligoroto, toroqeŋ somoŋgoŋ mubenaga, iikanoŋ mende sokonaga. Kaeŋ romoŋgoŋ uumeleeŋ alana ii kambaŋ kokaambaga wasiwe oŋoonoŋ eleema kawaa. 26 Iinoŋ kuuya oŋo iŋiimambaajoŋ kaparaŋ koma laligoja. Ji kiro eroti, oŋo qaa ii mogi oŋoonoŋ bimooro moma kawaajoŋ uukamakamaa laligoja. 27 Iinoŋ oŋanoŋ jinoŋ eŋ koomu borianoŋ meroto, Anutunoŋ kiaŋkomuŋ muro qeaŋgoro. Anutunoŋ Epafroditus iigadeeŋ mende kiaŋkomuŋ muroto, nii kaaŋagadeeŋ niima kobooŋ meŋ afaaŋgoŋ nono. Iinoŋ komunagati eeŋ, neenaa wosobirinanoŋ mono somariiŋ seiŋ qana qana uro laligowenaga.
28 Oŋo Epafroditus iima mombo aisoogi noo wosobirinanoŋ kaaŋagadeeŋ afaaŋgowaatiwaajoŋ mojeŋ. Kawaajoŋ kambaŋ kokaambadeeŋ uulaŋawo wasiwe oŋoonoŋ kawaa. 29 Oŋo Pombaa ejemba yoŋoojoŋ honoŋa mende aisooŋkejuti, korisoro iikawaa qaganoŋ mono iinoŋ karo koma horoŋ mubu ano gawoŋ meme ejemba kaaŋa ii mono goda qeŋ oŋoma laligowu. 30 Iinoŋ Kraistwaa gawombaajoŋ ama koomu borianoŋa uma komuŋ tagoro. Oŋo nii naŋgoŋ ilaaŋ nombombaajoŋ mogito, ii amamaagitiwaajoŋ iinoŋ oŋoo kitigianoŋ kaeŋ ama nomambaajoŋ kaŋ laaligoya mesaoro tiwilaaŋ tagoro. Kiaŋ.