Yesus Ilnget Ngendre‑en, Imet, Pe Itlang Yi
11
(Sapta 11—16)
Yesus Ihir Yerusalem Ihpa ndre King
(Matyu 21.1-11 pe Luk 19.28-40 pe Jon 12.12-19)
1 Yesus pe su disaipel Tadan kah handrila mukehe Yerusalem. Su kah hapa hehir hala Betpage pe Betani.*Betpage pe Betani. Betpage ti ise rai odo Yerusalem. Alau odo eriy ti kilomita sih. Betani yi ti ise rai odo Yerusalem. Alau odo eriy ti kilomita toloh. Lok ndre rukur kuti horso puliy Oliv. Pe Yesus ihtakalan horu disaipel Tadan rumuu harla munen. 2 Iy ipe ile ta horu ihpah, “Arla lok ilso munen ilso kitih. Oruu we erihir kopwi ti we erndroni donki homou, sa heduwe osukei ise tadan iseu. Homou lau indrimin pule‑en pe illa mapwi. Oruu oruwyon iy pe erkuni kise. 3 Uh homou kihndremte oruu, eri oruu arpa kile tadan kihpah, ‘Lau Mandra‑an Tadan marai idu eriy.’ Kinum oh pe Iy we kiporitai kisetawei yi.”
4 Horu disaipel ti harla pe herndroni donki homou, mapwi inek tapa eriy. Sa heduwe esukei ise tadan ise madan pohngkiu. Horu hereneruprup ti pe 5 sa lau se hodo erti hehndremte horu, “Oruu erempo sa ile tan donki kitih?” 6 Horu harpahran nolou ta Yesus ile ta su, ile pe su handripa hangka‑an pwi. 7 Horu hartakuni donki ti ile hu Yesus, pe hartalahtan siot elwe‑en ta horu ile pule‑en. Inum pe Yesus inek ile ndritan pe imin pwoi pule‑en donki. 8 Sa lau sulo‑on henswi siot elwe‑en ea ha‑au odo mundre’ sa pe hatlahtan hala sal. Sa se ti hemndrel ndrandran kei odo ngerin sal pe hatlahtan hala sal. 9 Lau sulo‑on hala munen pe lau sulo‑on hala omur, pe Yesus imin pule‑en donki imin ndrokoron. Sa ndre sulo‑on hoyyuw pe henesangar ihpah,
“Hosana!†Hosana. Nolou Hibru ihpa ndre nolou Kurti “Etsori rangan Lapan.” Etsori rangan Lapan!”
“Lapan kipu huyen kile Tadan,
odosa Iy ikuni pohon Lapan!”
10 “Lapan kipu huyen kile tan King ta tidu,
iy ihir odo ndrayen papo’ tidu Devit!”
“Hosana! Etsori rangan Lapan imin lok eleng!”
11 Yesus ihir Yerusalem pe ile lon omwen surok mandra‑an. Iy iturtur sane ndre sulo‑on, odoke lok ti ke ipe kile lukumwen, ile pe Iy iyeu ile yi ndre Betani. Su disaipel Tadan ndre sungoh-pe-rumuu ti ho‑us Iy.
Yesus Irson Poh Ile Pule‑en Fik He‑ei
(Matyu 21.18-19)
12 Su hemtir hodo Betani, pe ndre meseren sei yi, eri su halla hala yi ndre Yerusalem. Su honu‑us sal ti pe Yesus imet song. 13 Iy indroni fik he‑ei, pe illa ile kendrun. Iy ipe kihne fik ti sengin, kile pe Iy kiyo‑on. Iy ihir kendrun fik ti, odoke fik ti sengin hendre‑en pule‑en pwi. Fik ti ndrowuyen mapwi, ndron kopwi iyin pule‑en. 14 Ile pe Iy ipe ile tam fik ti ihpa, “Homou lau ka we kinyo‑on sengim pwi yi.” Su disaipel hehrungi Iy ipe nolou ile tan kei kutih.
Yesus Iyes Sa Lau Hompo Suhen odo Lon Omwen Surok Mandra‑an
(Matyu 21.12-17 pe Jon 2.13-22)
15 Yesus pe su disaipel Tadan helihir yi ndre Yerusalem. Iy ile lon sariy odo omwen surok mandra‑an pe iyes sa lau hompo suhen hodo eriy. Iy iruhten tepol ta su lau ndre hompotili‑it moni, pe pai ta su lau ndre heduwe pal odo sihsih he‑en eriy tih. 16 Pe Iy isongodi sa odo takun sane odo suhen odo lon sariyen omwen surok mandra‑an. 17 Inum pe Iy ipahran ile ta su ihpah, “Nolou ndre Lapan ipe pe su profet hadatorwei ti ihpah,
“ ‘Yu emwe ti sa we heyuwen kile omwen surok
ta sa kantri ndre sulo‑on.’‡ Nolou kuti iyin Aisaiah 56.7
Odoke oduu etndrahnan ile ihpa ndre ndruhun tudong ta sa raskel.Ӥ
18 Su pris mandra‑ane pe su tisa odo Lo hehrungi nolou ta Yesus ti pe lon ndrine’ su inei. Su hapa hehreh sal odo we hapwi Iy kimet, odoke su honoh Tadan. Su honoh Tadan, odosa sa lau ndre sulo‑on hehrungi suhwon ti pe hehretek ile eriy pe hemesi‑iy.
19 Lok ile ndre pehon ti pe Yesus pe su disaipel Tadan ha‑au yi odo lon siti odo Yerusalem, pe hala ndre Betani.
Bilip pe Surok
(Matyu 21.20-22)
20 Maping sei yi ti su hala yi ndre Yerusalem. Su hala sal ti pe heltuwe fik ti ndre he‑ei indremi‑is. 21 Pita idehorungon pe ipe ile ta Yesus ihpah, “Tisa, endre‑et oh, kei ndre Ou orson poh idu pule‑en ti ndre he‑ei indremi‑is!”
22 Yesus isomwii ihpah, “Otpo bilip kile ta Lapan. 23 Uh homou lau ipe kipe kile ta sih puliy kityuh kile lon ndras, pe iy ipu bilip ihpa ndre puliy ti we kityuh, eri puliy ti we kityuh, odosa iy mundren pe tawene tadan hepe indrohrok pwi tih. 24 Ile pe Yu kupwe kile ta oduu, sa ndre sa oduu edehndremte kidu lon surok, eri otpo bilip ihpa ndre oduu etndretakunii, kile pe we kihir kihpa ndre eriy. 25 Pe uh, oduu otto eleng pe etsurok, pe atawonon homou lau ipu handrai punou mo‑on ile pule‑e’ oduu, eri oduu ada‑amelyen, kile pe Tama’ oduu ilmin heven ti kolon ke‑eu odo to‑ir taduu.”
Sa Hehndremte Yesus ile Si Iduwe Puko‑on ile Tadan pe Iy Impo Sane Kutih
(Matyu 21.23-27 pe Luk 20.1-8)
27 Yesus pe su disaipel hala yi ndre Yerusalem. Yesus inelila iyin lon sariyen omwen surok mandra‑an ti pe su pris mandra‑ane, su tisa odo lo, pe su lau nusuwo’ su odo lotu hala hun Iy. 28 Su hehndremte Iy ihpah, “Ou okuni puko‑on kiti odo kehe pe ompo sane kitih? Si iduwe puko‑on odo po sane kiti ile Tadam?”
29 Yesus ipe ile ta su ihpah, “Yu we kuhndremte oduu kile nolou handrai. Uh oduu atpahran, eri Yu we kupahran si iduwe puko‑on ile Todo tih. 30 Atpa kile Todo, si iduwe puko‑on ile tan Jon pe iy itou baptais tih? Lapan ndre pwi ndramat?”
31 Su hehkike‑ei idu lenga’ su pe su hahpah, “Uh tidu titpa ‘Lapan,’ eri Iy we kipe kihpah, ‘Pe ihpa kehe pe oduu mbore’ oduu otpo bilip kile ta Jon?’ 32 Pe uh tidu titpa ‘ndramat,’ eri we kihpa kehe? Sa lau ndre sulo‑on ti hapa Jon ti iy profet.”
Su honoh ta sa lau 33 ile pe su hapa ile ta Yesus ihpah, “Odu tuno’ odu pwi.”
Yesus ipe ile ta su ihpah, “Oduu etndrepahran pwi, eri Yu ti kundrepahran Todo ti pwi yi. Yu we kundrepahran si iduwe puko‑on ile Todo ti pwi yi.”