1 Idu ileruu odo range’ su Yuda hantahorunge ile yi ndre rang ndre Lapan ihnuwii su ha‑au odo Isip, pe rangen Bret Yis Indrila Lon Pwi, eri sa mandra‑ane odo lotu pe sa tisa odo Lo hapa hehreh hesel sal odo hondrotowe Yesus. Su hopunou hapa we hotong kopwi pe hondrotowe Yesus pe hapwi Iy kimet. 2 Odoke su hapa ihpah, “Tidu titpo kolwii oh. Iy keti ma mundrun rang mandra‑an pe sa lau sulo‑on ho‑us hendrek pe hendrek hansa Yerusalem. Kihne tidu titpo ti pe sa lau we hohmbrus Iy pe hopo handrai punou kile ta tidu.”

3 Yesus imin um ta Saimon odo Betani. Saimon pihe ti sik lepra idu tadan. Yesus imin pwoi imin ndruhun yo‑on song, pe pedih homou ihir. Pedih kuti isori puken wo pus sih. Ka‑an handrai ihpa ndre ndronun ndrilkiya mbrunen mandra‑an pe menuhun huyen idu lom puken wo kutih. Pedih ti itmbru‑e kowen wo pus kuti pe iruhten ka‑an menuhun huyen kuti ile mburmpalan Yesus.

4 Sa lau se ndre hodo ti lon ndrine’ su inei. Homou indre‑et ile ta homou pe hapa ihpah, “Pedih kuti ineruhten ka‑an kuti ile sa? Ka‑an ti huyen le. Iy ineruhten ile ke porah. 5 Ipe ye iy kipe pe homou kisihnen, eri moni mandra‑an we kihir odo eriy. Moni ti we kihir tulpweu, pe lehpe heduwe kile ta sa lau ndre tasa sane pwi tih.” Pe sa lau kuti hehrurute idu pule‑en pedih kutih.

6 Yesus ipe ile ta su ihpa, “Adahnan iy kolwii! Oduu edempa iy ile sa? Iy ti ipu huyen lakopwi ile Todo. 7 Sa ndramat tasa sane pwi ti we honto ndrongo oduu sei ihpa ke sei, pe oduu we edenehnuwii su. Odoke Yu ti we kundrumwin ndrodan oduu elwe‑en pwi. 8 Homosa ndre pedih kuti kenon kipu kile Todo eri iy indripo. Sa we hedoni Yu, ile pe ka‑an ndre iy iruhten ile puli‑i ti we kidu ndre mundre. 9 Yu kupwe ndre ndrokene kile ta oduu, uh sa henen gutnius kile kehe ndre kehe odo lokpoi, eri sa we heninen homosa ndre iy ipu ile Todo kuti yi. Sa ndramat odo lokpoi we hentahorungon iy kise eriy.”

10 Yudas Iskariot ti iy homou odo lo’ su lewen Yesus ndre sungoh-pe-rumuu. Iy ile hu su pris mandra‑ane, pe ipe ile ta su ipe we ki‑in munen su, pe su hondrotowe Yesus. 11 Su pris hepwo‑es ile nolou ta Yudas, pe hapa we hesihnen iy kile moni. Ile pe Yudas intametme‑et rang kehe ndre iy we kiduwe Yesus kile lumwe’ su tih.

12 Into Krismas sih pe sih, eri su Yuda hantahorungon rang odo Bret Ndre Yis Inna Lon Pwi tih. Pe into mundrun eriy, eri su hantahorungon rang ndre su hodo Isip pe heduwe ndrayen sipsip hala pohngkiu odo kile pe engel ta Lapan we kindrapwi nedu’ su kamal pwi tih. Ile pe mundrun Bret Ndre Yis Inna Lon Pwi ti kah indrihir, pe su ka we horoh sipsip odo tawonon rang ndre Lapan ihnuwii su odo Isip. Rang ti kah indrihir, ile pe su disaipel hehndremte Yesus ihpa, “Ou apa odu adahnan song mandra‑an ti kidu kehe? Ou ereh idu kehe lakopwi?”

13 Ile pe Yesus ipe ile ta horu rumuu ihpah, “Oruu arla lon taon odo Yerusalam. Pe orngon homou inesursor kur sehir wo idu lon we kihrah taruu. Oruu oru‑us iy arla um kehe ndre iy kile eriy tih. 14 Pe arpa kile tan taman um ti kihpah, ‘Tisa ipe rum Tadan ti kehe? Iy ndroda su disaipel Tadan we hasa eriy pe hoyo‑on song mandra‑an odo kastam ta taha ti hodo eriy.’ 15 Pe iy we kipahran rum sih mandra‑an ise eleng odo um etih. Tepol pe sia holto lon rum ertih. Oruu arla pe arlahnan ana’ tidu song odo rum etih.”

16 Horu disaipel harla taon, pe sane ndre sulo‑on hehir ihpa ke ndre Yesus ipe tih. Pe horu harahnan song.

17 Mundroi ndre inna pwoi pe lok irkweh, pe Yesus ndroda su disaipel ndre sungoh-pe-rumuu hala taon. Su hala rum mandra‑an ndre song iyin eriy tih. 18 Su hodo pwoi pe hoyo‑on song. Su ma ndre hana‑an song ti pe Yesus ipe ihpa, “Yu kupwe ndre ndrokene kile ta oduu, homou odo lenga’ oduu ti we kiduwe Yu kule lumwe’ sa lau ndre mbore’ sa Yu tih. Homou erti ina‑an song kemin ndroda Yu mahkele.”

19 Su disaipel hehrungi nolou kuti pe tawene ta su ihrut. Su homou homou ihndremte Yesus ihpah, “Kihne yu, erih?”

20 Yesus ipe ihpah, “Homou erti iy odo lon oduu ndre sungoh-pe-rumuu. Homou erti iy pe Yu erena‑an song into hondroh pe erenelila iso hondroh. Pe mahkele eri oru ertawe lumwe’ oru ile lom palet ke sih pe oryo‑on song. Mahkele ti oru orputon bret taru ile lom palet ke sih. 21 Ndre ndrokene, Nolwo‑on Lapan iyin buk ti ipe we Nedun Ndramat ti kimet, odoke iy lau ndre iduwe Nedun Ndramat ile lumwe’ su lau mo‑osa ti ihnan hono‑on karundrum lakopwi. Kile huyen, eri lehpe tinen kindretawe iy pwi.”

22 Su hana‑an ndre song ti pe Yesus ikuni bret ise lumwen, Iy ide ureh ile ta Lapan, Iy iptan, pe itou ile ta su disaipel pe ipe ihpah, “Atakunii pe otyo‑on. Iy kurti sengi.”

23 Inum pe Yesus ikuni kap ndre wain idu lon tih. Iy ide ureh ile ta Lapan yi, Iy iduwe kap ti ile ta su pe su ndre sulo‑on he‑ing. 24 Pe Yesus ipe ile ta su ihpah, “Iy kurti ndrayi. Ndrai kurti ndrai odo poromis, pe we kimuw kile sihnen sa lau sulo‑on. 25 Yu kupwe ndre ndrokene kile ta oduu, Yu we kundri‑ing yi hepe wain pwi, kenon ndre kapman ta Lapan kihir pe Yu ku‑ing wain morowin.”

26 Inum pe su hopo weriy handrai odo lotu oh pe ha‑au hala kiu, pe hanak hala puliy Oliv.

27 Pe Yesus ipe ile ta su ihpah, “Bilip ta oduu we ke‑eu odo Todo, pe oduu we ada‑au Todo, odosa nolwo‑on Lapan iyin buk ti ipe ihpa,

28 Odoke Yu we kutlang yi, pe we kunemunen kule Galili.”

29 Pita ipe ile ta Yesus ihpa, “Su ndre sulo‑on ti bilip tasu we kideketi pe su we ha‑au Tadam. Yu kopwi ti pwi.”

30 Yesus ipe ile tadan ihpah, “Yu kupwe ndre ndrokene kile tadam, Pita. Mahkele lukumwen eri pawol we kindritang peruweh mapwi, pe ou we apa tunom Yu pwi kihndre patoloh.”

31 Odoke Pita ihkike‑ei puko‑on ihpah, “Konan, sa we hapa hapwi yu kumwet ndrodan Ou, odoke yu we kundranon kundripa upwe yu tuno Ou pwi ti pwi. Yu we kundripa pwi ndre ndrokene.” Su disaipel ndre sulo‑on hapa ihpa ke Pita ti yi.

32 Yesus pe su disaipel Tadan helihir lok sehir, rangan Getsemani. Iy ipe ile ta su disaipel ihpah, “Otto ketih. Yu kule kulsurok kule ilsou.” 33 Iy ikuni ke Pita, Jems pe Jon ho‑us Iy. Iy mundren ile pede‑en, pe lom mundren ndre homou ti ngendre‑en ile puko‑on lakopwi. Pe Iy inuh ile mo‑on. 34 Pe Iy ipe ile tam Pita, Jems pe Jon ihpah, “Yu uhnangkarundrum. Mo‑o kah le. Lon ndrine pe polo indrehndrepit, pe Yu uhkalmanan ihpa ndre upwe kumwet. Odu otto keti pe mada’ oduu kiseu.”

35 Iy ile ndre alau hepe ti pe ideketi ile poi, pe isurok ipe uh Lapan waso‑on, eri kiduwe ngendre‑en ndre Iy kawe kikun ti ke‑eu. 36 Iy isurok ihpah, “Aba, a Tomo, Ou owonon opo sane ndre sulo‑on. Ekuni kap kuti ke‑eu odo Todo. Odoke Ou owus reh Todo ti kolwii. Ou reh Tadam apa we kihpa kehe eri kihpa ke ndre eriy.”

37 Iy ile ndre ndrongo su disaipel ndre tulmuu pe iltuwe su hendremetir, ile pe Iy ipe ile tam Pita ihpah, “Saimon, ou enemetir ile sa? Ou andranon endrimin hepe eleng elwe‑en pwi, erih? 38 Oduu otto eleng pe etsurok, kihne tawene mo‑on hehir ta oduu pe oduu ataketi. Reh pe waso odo po sane huyen ti idu, odoke mundrei ti puko‑on odo po pwi.”

39 Yesus ile ndre mahun petsih yi, pe ilsurok ihpa ndre surok Iy ipu ndre mamunen. 40 Inum pe Iy ise yi ndre ndrongo su disaipel ndre tulmuu kuti, odoke su mada’ su imeh ile mo‑on pe hendremetir yi. Su hehretek ti Yesus insa yi pe inolou ile ta su, odoke su tuno’ su nolou sa su we hapa kile Tadan ti pwi. Ile pe Iy ilsurok petsih yi.

41 Yesus ise petsih ti su henemetir, ise peruweh ti su henemetir, pe ise yi kah patoloh ti su henemetir yi. Ile pe Iy ipe ile ta su ndre tulmuu ihpah, “Oduu mapwi edenemetir pe edemiyau, erih? Kah kahrii! Sa ka we heduwe Nedun Ndramat kile lumwe’ sa lau mo‑osa. 42 Atalang pe tidu tida‑au. Etndre‑et oh, iy lau ndre we kiduwe Yu kule lumwe’ sa lau mo‑osa ti insa mukehe!”

43 Yesus ma impa ise pohon ti pe Yudas ihir. Yudas ti iy homou ta sa lau ndre sungoh-pe-rumuu ta Yesus. Iy ihir ndroda sa lau sulo‑on. Sa lau kuti eri su mandra‑ane odo Lo pe lotu hahtakalan su ho‑us Yudas. Su hokuni semel pe kapwiy pe helpondrih Yesus.

44 Yudas indripa munen ile ta su ihpah, “Iy si lau ndre yu kuyahah kile won pe kuhngi purmadan, Iy eti Yesus. Oduu edehrus kile Tadan pe atakuni Iy.” Yudas indripa ile ta su ihpa kuti munen kah, 45 ile pe iy ile ndresale ile hu Yesus pe ipe ihpa, “Tisa todo,” pe ihngwi purmadan. 46 Eri pe sa lau hohrus ile ta Yesus pe hadakepti Iy. 47 Pe su homou disaipel ti iporepti painat hondrou pe irson ile ta lewen marai homou ta su pris, pe isimndri ndralngan hakap iyeu.

48 Yesus isohou ile ta sa lau ihpah, “Oduu etakuni semel pe kapwiy, pe atpa etsaroh pe etndrotou Yu ti ile sa? Oduu atpa Yu ti homou raskel? 49 Yu unesohou sei ihpa ke sei ile taduu odo lon sariy odo omwen surok mandra‑an odo Yerusalem, pe ihpa kehe pe oduu etndrendrotowe Yu odo eriy pwi? Odoke konan, odosa sane kuti we ndre hehir, kile pe nolou iyin Buk ta Lapan ti kihir ndre ndrokene.”

50 Pe su disaipel ndre sulo‑on hohtot ha‑au. Yesus Iy ke homou indriso ndre lumwe’ sa lau mo‑osa.

51 Anah homou eleheu ti idu ndruwen Yesus pe ile, odoke sa hondrotowe iy. Anah ti idesan kolau peren. 52 Odoke sa hohrus ile tadan ti pe iy ipkwe, ile pe kolau ti iseket pe iso ndre lumwe’ sa. Iy kolowen ke pwi pe ihtot iyeu.

53 Su lau ndre hondrotowe Yesus ti hokuni Iy ile um ta hetpris. Su pris mandra‑ane ndre sulo‑on, su lau mandra‑ane odo lotu, pe su sape ndramat odo lo, su ndre sulo‑on ti hodo um ta hetprisa. 54 Pita ti iyus sa ile, odoke iy isella mukehe pwi, iyeu into ke ndre mahun. Iy ile lon sariy odo um ndre sa mandra‑ane hodo lon tih. Iy imin pwoi ndroda su polis pe ireng yih.

55 Su pris mandra‑ane pe su sape ndramat odo lo, ndroda su lau mandra‑ane odo lotu, hapa hehreh handrai hangka‑an ndre Yesus ipu ihrut, kile pe su hapwi Iy kimet, odoke su hehreh tahit. 56 Su witnes sulo‑on hala pe holsohou taheweh, odoke suhwo’ su inna ke handrai pwi.

57 Inum pe sa lau se hodo eleng pe hadaheweh ihpah, 58 “Odu atahrungi Iy ipe ihpah, ‘Yu we kutparan omwen surok mandra‑an odo Yerusalem, pe Yu we kutmon yi kidu lon rang ndre tul. Omwen surok ndre Yu we kutparan ti sa ndramat hotmon ile lumwei, odoke iy ndre Yu we kutmon ti we lumwen ndramat kindretumon pwi!’ ” 59 Odoke nolou su hopo kuti inna ke handrai pwi yi. Homou ipe ile hesel pe homou ipe ile hesel.

60 Inum pe hetpris itlang idu eleng pe ihndremte Yesus ihpah, “Ou mborim sohou, erih? Ou nolou sa ile nolou ndre su hampa ile puli‑im kutih?” 61 Odoke Yesus indripa handrai nolou pwi. Ile pe hetpris ihndremte Iy ihpah, “Ou ti Nedun Lapan Mandra‑an Imin Eleng, tih? Ou ti Kristus tih, erih?”

62 Yesus ipe ihpah, “Ewuh, Yu ti Kristus. Pe oduu we etndroni Nedun Ndramat we kimin sia ise lumwei mudon ea ta Lapan, pe oduu we etndroni Iy kimin lon kohut pe kise pwoi.” a

63 Hetpris iy ndre iy ire‑ei kolson pe ipe ihpah, “Orkom! Tidu tidenehereh nolou sa yi? 64 Oduu etndretahrungi Iy mahkele kopwi impa nolou mo‑on ile pule‑en Lapan tih! Oduu atawene ihpa kehe?” Su ndre sulo‑on hapa Iy indretaparan Lo mandra‑an, ile pe we hapwi Iy kimet.

65 Su se ha‑amburngihi Iy. Su hehndrusi kolau ihndrepit idu madan. Inum pe su ho‑up Iy ile mbrutulumwe’ su pe hampa ile Tadan ihpah, “Iy si irson lumwen ile Tadam tih? Kehe apahran eh?” Pe su polis ta hetpris ti hala hekuni Iy iyeu, pe hentalahtan lompurlumwe’ su ile mundren.

66 Pita mapwi imin lon sariyen um ta hetpris, pe enihin homou lewen marai ihir. 67 Iy iltuwe Pita ireng yih, pe iy ihlilsi Pita, pe ipe ihpah, “Ou yi ti lewen orngon Naseret ndre Yesus tih!”

68 Odoke Pita ipe ihpah, “Yu tuno pwi. Yu tuno homosa ou ampa ti pwi.” Pita itlang pe ipe ke‑eu kile kiu, odoke iy ma idu ke ndre sal ti pe pawol ideng.

69 Pita ma inu‑us sal ile kiu ti pe enihin kuti ile pe ipe ile ta sa lau hodo eriy ti ihpah, “Orngon kuti iy homou ta su.”

70 Odoke Pita ipe ihpah, “Enihin ti intaheweh, yu ti pwi.”

Indralau ke pwi ti pe sa lau ndre hodo pohngkiu ti hapa ile tam Pita ihpah, “Ou adaheweh kolwii. Ou ti homou ta su, odosa ou yi ti odo Galili.”

71 Odoke Pita idamumoi ihpah, “Mondre eleng, yu tuno iy lau ndre oduu edempa kiti pwi!”

72 Idu ke ndre erti pe pawol ideng petsih yi, pe Pita idehorungon nolou ta Yesus. Pingi kopwi ti Yesus ipe ile tam Pita ihpah, “Pawol we kindritang peruweh mapwi, pe ou we andripa patoloh apa tunom Yu pwi.” Pita idehorungon nolou kuti pe iy ideng ile mo‑on.