1 Yomba ye Yesus pre Mesaia moglmedi pirngi dingwa, ye God nangiglma meglkwa. Yomba ta eremogl neno pre munduno panan, ana ye nangiglma pre akiye munduno pangwa.*1 Jon 2:22 ya 4:2 ka pangwa i kanamga. 2 Nono God nangiglma pre munduno pango pirkan ounga i mambuno yegl: God wedi munduno pango ana ye lomo prapra pinande orumnara i dipoglkwa. 3 Nono God pre munduno panan, ye lomo prapra pinande eramga. Ye lomo i wirigl ta paikrukwa. 4 Sraglpre, God nangiglma wagle ye makandle embriye mambuno kinde i engre atne endingwa. Ana nono pirngi dumunara i mina yombuglo ere makandle embriye mambuno kinde i ama engre atne endumga. 5 Ana makandle embriye mambuno kinde i yomba ira yombuglo ere engre atne endume? Yomba ta Yesus pre God Wam moglmedi pirngi dungwa yomba i keunde yombuglo erikwa.†1 Jon 4:2 ka pangwa i ombugl kanamga.

6 Ana Yesus Krais nigl mina baptais ormara mambuno i ya te gogl bormaimo toindi endumara mambuno i mina ungwa.‡Grik kanno mina ka i mongomo ta wu pene pikrukwa. Ye bormai ya nigl pre keunde dungwa. Ba yomba mere pirkwa nigl iwe Yesus baptais orkwa ipre dumedi pirkwa, te bormai iwe Yesus goglkwa ipre dumedi pirkwa. Ye nigl mina suwara i keunde ta ukrukwa, ba nigl mina ya te bormaimo mina akiye ungwa. Ana Holi Spirit ka di nongugl ende taragl i kaima we dungwa. Sraglpre, Holi Spirit ka kaima nem moglkwa pre ye ka kaima dungwa. 7 Ana taragl suwota mambuno i dipeglkwa: 8 Holi Spirit ya nigl ya te bormai, ana taragl suwota i ka digo wu suwara ongwa. 9 Yomba ka dipene endigo nono punga, ba God ka di nongugl endungwa i yombuglo ere yomba kanno engre tongwa. Sraglpre, God ka dungwa i yene Wam pre dipene endungwa. 10 Yomba ta God Wam wedi pirngi dingwa, God ka dipene endungwa i ye nomano suna yei-pangwa. Ta ye God kamo pirngi dikrikwa, ye God kakimbi di-di orkwa yagle we dingwa. Sraglpre, God yene Wam pre kamo dipene endungwa i ye pirngi dikrikwa. 11 Ana God kamo dipene ende norkwa i yegl kra: Nono kor aimande moramga i God norkwa. Ana kor aimande moramga mambuno i yene Wam mina yongwa. 12 Yomba ta ye God Wam i-wan morambuka, ana kor aimande moraglkwa ye mina yongwa. Te ta God Wam i-wan moglkrambuka, ana kor aimande moraglkwa i ye mina yeikrukwa.

13 God Wam ye kangiye mina ene pirngi dindre ana kor aimande moraglkwa i-kondingwa i ene pirkan eraglkwa, ipre na pepa muno i bogl ene teinga. 14 Yeglpre nono God kunduglmo goglkre ye moglmara magl pindre ana ye prumere nono taragl kanekane ta norambedi krapogl tomun, ye pra nono pir norambuka. 15 Ana nono pirkan ounga: Taragl ta inamunedi pre kamange ounga i God ama pirkan orkwa. Te nono pirkan ounga: Ye taragl ta norambedi krapogl tomga ikra i-kondumnedi prumga.

16 Yomba ta angigle tandaglme eran kanambuka, ba tandaglme i mina ye ta goglkrambuka mere panan, ana ye kamange ere God tenan ana angigle kor aimande morambuka i God tenambuka. Sraglpre, tandaglme tau pango erikwa i yomba sigoglkwa pre na ka i diga. Te tandaglme tau pangwa i yomba erimbi ana ye goraglkwa. Ipre ene kamange ere God teiyo na yegl ta dikrika.§Kamambunomo kaima ta wu pene pikrukwa. Yomba tau pirkwa i yomba kaima geglkwa ipre dumedi pirkwa. Te yomba tau pirkwa aglke kor goraglkwa ipre dumedi pirkwa (Ka Teke Pangwa 2:11 ya 20:14), ye ka i akete “geglkwa” i yeglmere, “ende guglo kamun enaglkwa”. 17 Ana mambuno kinde prapra erikwa i tandaglme orkwa, ba tandaglme tau pango erikwa i ta goglkraglkwa.

18 Nono pirkan ounga, God nangiglma meglkwa i tandaglme aimande ta ere wanmoglkrikwa. God yene nangiglma sugl wakai moglko ana Satan ta ye erekinde eretekrukwa. 19 Nono God nangiglma mounga pre ana pirkan ounga, te makan koglkoglo mogl eimara suna igle Satan kongun akeningandi ere ende okuna ongwa. 20 Nono ama pirkan ounga God Wam undre ana pirpogl sinamga nomano norkwa. Yegl orko kade nono God kaima moglkwa i pirpogl sumga. Ana God kaima ya Wam Yesus Krais, ye mina nono sidakagl mounga. Ye God kaima moglkwa, te kor aimande meglkwa i ye mina yongwa.

21 Na nangrima wagle, god kimbi mina ene sidakaglkre mogl eglke endiyo.