1 TESALINAIKA
Pol pepa muno namba 1 bogl Tesalonaika yomba tongwa
Ka mongo yegl ende okuna ongwa
Tesalonaika i taun kande, Masedonia Provins mina suna yongwa. Ana Pol ye Filipai taun kondo endpi Tesalonaika pindre ana yungu ombuno igle i-pene endungwa. (Aposel 17:1-9 kaniyo.) Ba Juda yomba kango yomba merkinde Pol kamo pirtre ana wu yungu ombuno eriko, ye mirmogl kiam siteingwa ana Pol dumo igle kondo endinambedi erikwa. Okuwo Pol pi taun Korin moglko, ye kongun suwara eurika yagle Timoti undre ana taragl tau Tesalonaika yungu ombuno meglmara plau dungwa i ye boglo kugl Pol tongwa.
Pol ka i prukwa enge, ana ye ya Sailas te Timoti, ye prapra yungu ombuno pirngino sigigle dina pre pepa i bogl teingwa. Ba erme pirpogl singwa yomba tau merkinde pirkwa Pol pepa tau boglmara, ana pepa i kermongo kaima boglkwa mereyegl yongwa. Pepa i mina Tesalonaika yungu ombuno pirngino ya embriyeno wakai ipre Pol gun pond yongwa.
Ana Tesalonaika yungu ombuno meglmara mambuno yegl pangwa: Krais sraglmere ikine unambuka i ye ta pirdime dikrikwa. Te ye kra yegl peglkwa, ana Krais ende ikine ukrukwa enge yomba kamkand geglkwa ye ama kor aimande moraglkwa i inaglmo? Ye mambuno i pirkan eramunedi pirkwa. Te Krais enge aunake kaima unambe? Pol ka kra i di ikine ende ana engenge mambuno wakai pamara duglo bogl ana Yaglkande unambuka enge ipre akekun eremoraglme dungwa.
1
Pol pepa muno namba 1 bogl Tesalonaika God yombama tongwa
Pol ya Sailas te Timoti, no pepa muno i bogl ene Tesalonaika God yombama tomga.
Ene eremogl God Neno ya te Yaglkande Yesus Krais mina meglkwa i God wakaimo ya te nomanemo pokndungwa i ene mina pandigl tenambiwo.
Tesalonaika yomba pirngi dingwa ipre Pol diwakai yeitongwa
No engenge ene prapra pre God diwakai yeitomga. Te kamange ounara ene kangino dagl ere ere mounga. Ene pirngi dindre kongun erikwa te munduno yomba tau pre pango wakai eretengwa te Yaglkande Yesus Krais unambedi yombuglo ere sugl meglkwa. Te ene yegl erikwa ipre nono neno God ye mambuglo wagle no aimande pir mogl ana dite wanmounga.
Angrima wagle, no punga, God ene pre munduwo pango, ana ene ye yombama moraglmedi pre ene keunde pinde i-kondungwa. Ipre kamambuno wakai no iyu ene ditomga i ka keunde tamanga, ba kamo i yombuglo bogl ya te Holi Spirit bogl akiye pangwa pre, ana ene kamambuno wakai i pirko nomano mina kaima giglendi pangwa. Te no ene akeple dina pre ene meglmara pukamugl no sraglmere taragl ere wanmounga i enene pirkan erikwa. Te God kamo ene pir ingwa pre ana yumbun kanekane ingwa. Ba ene ama no mambuno ounere ya Yaglkande mambunomo ene siye erikwa. Ipre Holi Spirit ene nomano ake undungo gun yeingwa. Ana ene mambuno wakai yegl erikwa i Yesus Krais wedi pirngi dingwa yomba Masedonia ya Akaia kamun meglkwa ye prapra wakai moraglkwa pre ene ombunodi teingwa. Ene Yaglkande kamo dingwa Masedonia ya Akaia kamun keunde ta pirkrikwa. Tamanga. Ene God wedi pirngi dingwa kamo i waidi endpi dumo kamun koglkoglo ongo yomba prapra pirkan erikwa. Yegl orkwa ipre no ka kanekane di ene ta tenamga paikrukwa. No ene meglmara umgo ana yomba ikra no koglkare di-indre god kimbi kanekane kindekondo nomano yake tendre, ana God kaima kor aimande moglkwa ene mina pindre nigl-kongunmo erikwa i ye boglo kugl norikwa. 10 Te okuna gogltre aglke andigl ukor ongwa. Ye kangiye Yesus. Ana God dem kumbrukwa nono mina una ormara i ye nono i-eglke endungwa pre nono wakai moramga.