8
Yesus nono prisno kande moglkwa
1 No erme ka mem ta i pandigl dumga i yegl: No erme prisno kande ta moglkwa, ye heven suna God ongo wokra mogl te amedungwa king boglmo i mina amedi moglkwa. 2 Ye pris kande mogl God holi yungumo kaima mina suna igle, kongun orkwa yungumo i yomba ta kei yeikrukwa, tamanga, Yaglkande yene kei yongwa.
3 Pris kande wagle prapra kongun eraglkwa, ofa ertre te kombuglange gagl God tenaglkwa, te pris kande Yesus ama sragl ta iyu God ofa tenambuka. 4 Yesus makandle moglma dagl ye pris kongun ta erekruko, sraglpre, yomba pris kongun okuna ere meglkwa i lo dumere ere ofa ya kombuglange gagl God te meglkwa. 5 Ana pris kongun erikwa i heven kaima yomere pre makandle wolyei erikwa. Moses sel yungu keinagledi orko ana God ka giglendi ditongwa, “Pro, ene sragl prapra ta eratnga i kamun muglo iro ombuno digo kanmere ikra ero.”*Ka Teke Pangwa 25:40 6 Ba Yesus erme pris kongun orkwa i pai mitna ende ye erikwa i engre tongwa, ana yeglmere ye kontrakmo i mina sunawom moglkwa, i pai mitna ende Moses kontrakmo i engre tongwa igle mina God ka giglendi dipanduglmara i mina kontrakmo i sunawom panambuka, kamo i pai mitna ende okuna ka i engre tongwa.
Kontrak kor pai mitna ende okuna kontrak tongwa
7 Kontrak okuna pangwa i ta aglaumo ta paikruma, ana kontrak okuwo i sraglpre erambu. 8 Ba God kangwa yomba aglauno pangwa pre ana yegl dungwa:
“Na kontrak kor ta
Israel yunguno ombuno mina
ya te Juda yungu ombuno
mina eraglka engemo magl
umedi Yaglkande dipene endungwa.
9 Na kontrak kor eraglka i
okuna neno kowano Isip imbo
kane paimeglko na kontrak
ere, enge igle ye auro yend
menda wimere yeglkra
tamanambuka. Sraglpre,
na kontrak ye mina pangwa i
ye ake gigle kaima di
moglkrikwa, ipre na ye kondo ende eglke einga.
10 Yaglkande yegl dungwa,
Enge ta unan na kontrak kor
ta eraglka i Israel yungu
ombuno mina eraglka, ana na
lona i ye nomano mina ya te
deno munduno mina pepa
muno bogl pandraglka, te na
ye Godno moglmbo ana ye na yombanma moraglkwa.
11 Ana yomba ta yene
yombama ya yene angiglma
wagle wakane beke tendre,
Yaglkande kamo pirkan eriyo
ta dikrambuka, sraglpre,
yomba kembra mina mambuno
bogl yei endpi yomba kande
mina ongwa. Ye prapra na pirkan eraglkwa.
12 Ana na ye mitno gogl
tandaglmeno prapra koko
ende tendre i aimande ta pir moglkraglka.”✡Jeremaia 31:31-34
13 God kontrak kor we dungwa. Ana ye ka dumara i kontrak komuno ikra wu goglo pi kondungwa, ana taragl prapra goglo ongwa, i wu kinde ongwa pre, enge kurita paimogl dundinambuka.