12
Ambu ya te toki kande dragon
1 Ana heven suna diu kande ta wu pene ongwa. Igle ambu ta moglko ana ande ye gaglmo suna mereyegl endungwa te ba ye kagle mina atnekra pangwa. Te bre mina kugl-kuri 12 ekin bre gagl wakai kaima mereyegl ende moglkwa. 2 Ambumo gak dane pangwa. Te gak kugl yenambuka engemo yongo, ana ye giugl pir kai kaglkane pond orkwa. 3 Yegl eremoglko ana heven suna diu ta ama plau dungwa, i yegl: Toki dragon gogl mundu ta bre 7 pango, te bre yongagle 10 pangwa. Ana bre 7 mina ikra king bitno gagl prapra pangwa. 4 Toki dragon yagle mina kugl-kuri kamun mitna pangwa i epigl suwarata kuro endungo yange makan mina sungwa. Te kugl-kuri epigl suwo yoko pai meglkwa. Ana tokimo ikra ambu gak kuragledi eremoglmara igle gakmo kuran ana sigogl ninagledi pre ambu guma mina andigl sugl kan moglkwa. 5 Ana ambumo wam kugl yongwa. Gakmo i okuwo ain muglmbo ake mogltre ana makan koglkoglo yomba mogl-eingwa i sutno morambuka. Ba ambumo wam i tambre kana i-egli God moglmara ya sia kingmo mina eingwa. 6 Te ambumo teke ende makan waule ta God akekun ereyei tomara igle ongwa. Dumo igle ambumo suglmo wakai eremogl embi ande enge 1,260 yenambuka.*Juda yomba ande enge kerko 30 orko ana ba suwarata dundungwa. Ana “Ande enge 1,260 i”, ba 42 orko te buglayungu suwota ya te ta ikine kuno orkwa.
7 Ana heven suna kunda kande pangwa. Angelo Maikel ye angelomo wagle bogl kunda ere toki kande dragon teingo, te toki kande dragon angelomo wagle bogl ama kunda ere ikine endingwa. 8 Ba toki dragon kunda yombuglo erekrukwa pre heven suna simenda endigo ana heven suna ye erme dumomo kaima ta yeikrukwa. 9 Te toki kande dragon ikra si-atne endingwa, tokimo i okuna imbo toki, ye kangiye spirit kinde mo Satan. Ye makan koglkoglo yomba bakaglte erekinde eretongwa. Sraglpre, ye si makandle endigo angelomo wagle bogl akiye ende makandle wingwa.
10 Ana ka kande ta heven suna yegl dungo nungo embriye pirka:
“Erme Godno nono
ere-yungwa, ya yombuglomo
ya ye kingdomo ya te Krais
yombuglomo kande i ombuno
dinambuka. Sraglpre, nono
angro pirngi dingwa wagle
God ongumuglo mina ermine
ya enduwer ka-tange te
meglkwa yomba ikra si makandle endingwa.
11 Nono angro pirngi dingwa
ye Sipsip Nangigle bormaimo
mina ya God kamo kaima di
nongugl endingwa igle mina
ye pirngidi kunda yombuglo
ere kunda ikine engre atne
ende meglkwa. Yegl ere yene
nangino ake-gingir dikre ana
goramnedi pre kinde kondingwa.
12 Ipre heven ya te yomba
heven suna meglkwa ene gun
yeiyo! Ba makan ya te mundi
nigl ene mina yumbun plau
dinambuka! Sraglpre, Satan
ende atne ene mina ungwa te
ye kangwa engemo sungunagle pangwa, ipre ye dem
pond kumbruko ana mambuno
kinde kanekane ere wanmoglkwa.”
13 Ana toki kande ikra kango, ye si makandle endingwa pango ana ye eremogl ambu gak yagl kugl yongwa ambumo ikra erekinde eretena pre sika sungwa. 14 Ba ambumo ana kua-dua koiyemo suwo pandigl teingo ye pigladi endpi makan waule ta ye pre akekun ere yeimara ongwa, igle toki kande mina eglkekra moran ana ye suglmo wakai mogl eimbi buglayungu suwota ya te ta ikine yenambuka. 15 Ana toki dra mina nigl membigl simenda endungwa. Niglmo i wu nigl kande mereyegl pindre ana si waidi ambu i omara okuwo sikasi ongwa. Sraglpre, toki prukwa nigl pi ambu sikake yendenan wau borambuka. 16 Ba makan ye ambu i akeple dindre ana dra audi toki kande dragon nigl membigl sungwa ikra pemge endungwa. 17 Yegl orko, toki dem pond kumburo ambu ikra tendre, ana ye nangiglma God lomo ake giglendi mogl te Yesus Krais kamo kaima dipene endingwa i kunda eretena pre ende menda ongwa. 18 Ana tokimo kande dragon mundi nigl bina okupole andigl moglkwa.
*12:6: Juda yomba ande enge kerko 30 orko ana ba suwarata dundungwa. Ana “Ande enge 1,260 i”, ba 42 orko te buglayungu suwota ya te ta ikine kuno orkwa.