2
Aname Ateŋa Leyamo Pii Doko
Ana baame dopa pyuo ateŋa lao peteya.
 
Kamongome nambana monarena rae maiyanyi pyambwapya.
Baame mende pipyamo dokona lao rae mailyu.
Nambana randa jingi wambu dupwa kando giyalya giyana pilyu.
Anatumi nyisapya dokona namba raeme kumulyu.
 
Mendali Kamongo poo pyasi dopale ingyuo kara nalyamo.
Mendali Kamongo dokopa manda manjo karande daa.
Anatu baa namwana konambena mendeke ingyuo karamo dopale ingyuo karande daa.
Kamongo doko baa Anatu karamo dokome akalinya pilyaminyi dupwa soo karamo.
Yulu koo keyangepena yapalya yapana pyuo lao karenge.
Dokona lao emba piimi range yuku napala mangalyilinyi doko kaeyape.
Pelyanyi nembo range mupwa lao suu pyao pii leene doko kui lape.
Ami yanda singi porai dupwana yanda imbu dupwa rokapyamopape poraiya nange dupwana yulu doko andelyamo.
Nenge kakana silyamo nao pisamo dupwa nenge isa pelyamo.
Dokona lao yulu mendena pyakamipala nenge nyuo narami.
Lopange dupwa dee lopa nalyamo.
Ingi porailyamo petenge doko wane yanda ipingi nyero kando nyilyamo.
Wane malunya endangi doko wane mendepa role pali nalyamo.
Kamongome pyao kumasepala dee lete nyingi.
Baame wambu kumuo penge panda nembapala dee nyingiko.
Kamongo baame akali lapo pendewa inginyi pyambwapala menge dupwa kamonganyi pyambungi.
Baame lapo inyimungyu kuki ingyuo kararaminyipa menge dupwa andake ingyuo karena lao pingi.
Baame pendewa pelyamo palyuo karenge dupwa nyiso
dee yangilyamo pee paro singi dupwa nyuo minyalyuo pingi.
Baame nakama kiŋinya akali mupwa dupwa pipya puu minyinyi pyambungi.
Baame nakama yulu andakena wambumi ketae nembaramili dupwa maingi.
Yuu doko Kamongome kanda soo susa pyao waso reteyamo silyamo.
Yuu dokona baame bange peparae konda pyuo wasiinyi pyambuya.
 
Kamongome wambu banya yulu kare kare soo pyuo karenge dupwa kyawa minyingi.
Dopa pilyamopape yulu koo pingi dupwa iminjingi dokona nyuo ope ape pokenge.
Akali rangena poraindeme koo dupwa nyuo kalyuo anamengende daa.
10 Kamongome yake panda piso pii porakaiyuo lapala
banya nyisu petenge dupwa pyao kokwa sinyi nembara.
Kamongome yuu muu peparaena wambu nakama yapalya yapana pyuo lara.
Baame banya kiŋi doko porai renge maipala
banya rombo palyisi kiŋi dokome wakale dupwa pyao isa palyinya lao pira,
leya Aname.
11 Dokopa akali Elekana banya yuu Orama dokona dee lambu peya. Peyamopape wane doko purisi akali Ilai yuu Sailo dokona Kamongona yulu pyuo kareyamo dokona role pyao nyiso kareya.
Ilaina Ikinyingi Dolapo Kwaeyambi
12 Ilaina ikinyingi dolapo kapa kara nayambi. Nakamba Kamongome mende lalyamo lao kale yuku see nayambi. 13 Purisi dolapome mena minju naramili pyuo nyinya lao mawa pii retenge doko kaepala yalalya yalana piyambi. Dopa pyuo akali mendeme mena pyao kiso maiyala epeyamo dokopa purisinya kendemande akali dokome isakuli paka rema karetande minyuo epenge. 14 Epapala mena minju rao karenge penge dokona ene rao karelyamo dokona rano karapala dokona pare peta epelyamo doko purisinya ingingi Ilaina ikinyingi dolapome yuu Sailo dokona Isaraele wambu dupwame mena pyao kiso maiyala epeyaminyi dokona dopa pipa pyuo kareyambi. 15 Koo mende opetaeko pyuo mawa pii dokona yaleyambi. Mena kapa dorena kisinyi ene nembapa nayami dokopa purisi akalinya kendemande dokome epapala mena pyao kiso maingi akali doko kando lao purisi baa mena lapo isarena kisara lao kyaka maikamipi lenge. Mena sanena kisasi doko rae mai naraŋa kyaka mainya lenge.
16 Dokopa baame isingi lamaiyuo, Kapa kisinginyili pyuo kisa paramanopa nyelapaleŋe leya ramo dokopa kendemandeme lao, Daaŋa dakepa namba jepe. Daaŋa lapala jii narami ramo dokopa rolae nyoloponoŋo lenge.
17 Kamongo mena pyao kiso maingi dokona Ilaina ikinyingi dolapome male male lapala mambu inginyi palyiyambinyisa Kamongo dokome ama koo pilyambinyi lao suu piya.
Wane Samyuele Baa Yuu Sailo
Dokona Kareya
18 Wane Samyuele baa komau yapasinde wapwaro karo Kamongona yulu dokona kaeya nao piya. 19 Banya endangimi rakangepa ee kana yaka lao mena pyao kiso maipa pinginyili pyuo maiyala pao karo dokopa ikinyingi banya komau kimbunya pao suu lao pee pingi mende waso minyakamyuo papa piya. 20 Dokopa Ilaime Elekana etengepa yako lao lamaiyuo, Elekana emba Kamongome enda dake keta wane lapo wane Anatu maipinyi dokona panda nyinya lao jera lapa piya.
Dopa lapa piyamo dokopa anda papa piyambi.
21 Kamongome enda Ana elyape keta pisipala wane rema wanake lamape dee konda pyuo maiya. Wane Samyuele Kamongona yulu dokona moko minyuo pyuo karo ando peya.
Ilai Dee Banya Ikinyingi Dolapo
22 Ilai baa emo oteyamo dokopa ikinyingi dolapome Isaraele wambu dupwa keta yulu apa pyuo pyakamilyambinyi lao soo kareyamopa enda Kamongona komau anda kambu konandowame dokona yulu pingi dupwa pipya reto palambinyi leyaminyi siya. 23 Sepala nakamba lamaiyuo, Wambu peparaeme nakamba yulu koo pilyambinyi lao langimiŋi. Akipamo koo doko pilyambisi? leya. 24 Rakane nakambame yulu koo dopale doko yaki nyuo kaeyapenge lao silyu. Kamongona wambu dupwame kando mambo pyao letaminyi doko kwaeyo pelyamo. 25 Akali mendeme akali yango mende kando koo pirande ramo doko Kamongome banya lao pii lakamira ingilyamo. Dopa pipyamopape akali mendeme Anatu kando koo pira ramo doko apimi soo lakamirase? leya.
Dopa leyamopape Kamongome pyalana suu pyao oteyamo dokome nakambame rakangena mana pii doko mende lalyamo lao sakami nayambi.
26 Dokopa wane Samyuele baa Kamongopa mee wambupinya lenge kambu dokona rolae wakasa pyuo ando pelyamo lao kandeyami.
Ilaina Ree Palu Dokona Lao Kamongome Yango Palyuo Leya
27 Kamongona pii dake poropeta mendeme minyuo epo Ilai lamaiyala epeya. Embena imbwange akali Erone banya ree palu pipya kiŋi Perona karapusi yulu pyakamyuo yuu Isipi paleyamo dokopa namba rangeme epo baa keta maro leyoŋo, leya. 28 Isaraele doloma kareyaminyipa banya ree palu doko nambame rombo palyuo purisi wambu ingyuo rendamu pingi kiso maingi kana pyarena kiso yulu pyuo karo purisinya komau wapuo nambana yulu dokona soo karena leyo. Nambame kana pyarena kisiyaminyi rao kareyamo dokona nakama lapo kata rolaena kapa nyinya leyo. 29 Akipamo nakama yama lenge kambu nyepala nambana kisakana lapu dupwa napuli napuli lao suu pilyamisi? Akipamo nambana wambu dupwame namba pyao kiso jiminyi dokona kapa palenge angi dusa ingyuo Ilai embena wane dolapo namba lakandarenele pyuo lakanda minya minya pyuo nao karena lapala kaelese? 30 Ilai embena ree palu dee embena rarape dupwa namba Kamongo Isaraele wambunya Anatu dokome purisi yulu yuu peparaena piramiŋi lao langyuo kaeyo leyo kande. Dopa leyoko doŋo dee dakepa nakambameko pyakamili lao suu pyaa nalyo. Nakambame pingi kandale doko suu pyao mendeme namba lakanda minya minya pirami dupwa kando isingi dopako pyuo lakando dee namba kilya kandanyi nembarami dupwa isingi kilya kandaroko. 31 Epapu embena ree palu dee embena rarape dokona wanyane akali dupwa langa kanya pyao kumakaronopa pyuo mendalipi karo emapala kuma narami. Gii doko epapu dakeŋe. 32 Nambame Isaraele wambu doloma renge keyange mairunu dupwana kando gyaa soo yango palyuo kararaminyipape nakamana ree palu dokona mendepe karo emaraminde daa. 33 Dopa piramopape embena ree palu dokona mende lete wai pyaronopa baame purisi yulu pyakara. Pyakaramopape baa lenge koo ingyuo saka nalya nana pyuo mee isa sulu sulu karara. Embena para pyao nyerene wakale dupwa peparae randako nao kumuo parami. 34 Dopa pyuo embena wane Opini Pineyasepa yuu gii mendaki dokonako kumarambinyi kandarene dokopa namba leto dake kinyi lalyane lao panaramo kandare. 35 Nambame purisi mende yulu kare kare soo pyuo dee nambame yulu peparae suu pilyu dokona moko minyuo pirande kando rombo palyaro. Nambame baa para pyao nyeraminyi dupwape kiso mairunupa dupwame yuu peparae nambame kiŋi mende rombo palyarono lenge kambu dokona nambana yulu pyakao kararami. 36 Embena para pyao nyeraminyi dupwana lapo lete kararami ramo dupwame nenge nalena dokopa purisi pisiramo dokona papala kana nengepe jinya lao kee lao dee purisi dupwa nyisamape lao poraiyuo piso soo pirami.