2 SAMYUELE
1 Samyuele buku dokona arome pii wambo pyasi palamo. Dokome lao yaki nyiyamo dokona kimbu sepala 2 Samyuele dokona letamo. 2 Samyuele dokona akali Dapiti lenge baa kiŋi akali ingyuo wambu iso kareya yulu dokona lao pyasi palamo. Rombo 1 lao pao rombo 4 dokona Dapitimi yuu pakirename Juta lenge dokona iso kareya. Rombo 5 lao pao rombo 24 dokona Dapitimi Isaraele wambu peparae yuu Juta wambu dupwape yuu Isaraele lenge wambu dupwape peparae isiya. Dapitimi banya isingi yuu malu ingyuo nyelana pyuo karo banya gapomane doko porainyi pyambuyamo dokona arome pii dakena pyasi palamo. Pii yaka lao dokopa Dapiti baame poraiyuo Anatu kapa ingingi lao suu pyao banya mona Anatu keta pyamalyapala kareyamo doko kandelyamano. Isaraele wambu dupwa rae maiyuo banya pii leyamuli pyuo kimbu moko minyuo pyuo kareyami. Dapiti dopa pyuo rolae pyuo kareyamopape yuu lapo dokopa nyipuli nyipuli lao suu pyao wambu dupwa keta randa maiyuo pyuo kareya. Dopa pyuo karapala baame yulu koo andake lapo piya. Anatunya poropeta akali Netane lenge dokome Dapiti banya koo dokona lao polo lamaiyamo dokopa Dapitimi elyame kumapala Anatu polo lamaiya. Anatumi Dapiti randa maiyamo dokopa Dapiti mee mumu laa nao randa nyuo kareya.
Dapiti baa yulu andake pyuo akali mupwa ingyuo kareyamo dokome enakana Isaraele wambu dupwa moŋo nyepalape dokopa nakamana rora ambasu Dapiti kame see nao kiŋi akali Dapiti yale mendeme Dapitinya panda nyipyali lao suu pyao kareyami. Dopa lao suu pyao Dapitinya ikinyingi mendeme namwana kiŋinya panda doko nyakara, leyami.
1
Sole Kumapeyamo Doko Dapiti Siya
Sole kumapeyamopa Dapiti Amaleke wambu pipya yanda pyuo anamasi minyuo isa palyapala baa epo yuu Sikilake dokona yuu gii lama kareya. Dokopa yangama yulu repo dokona wane parange mende Solena komau anda pyuo paleyamo dokona piso epeya. Dokome banya kondange renge doko lasaka pilyuŋu lao dokopa banya komau dupwa minyuo kanguo dee banya kyawa awai pyao pipala Dapiti peteya dokona papala baa yuu dokona pangu soo piya. Dokopa Dapitimi akali doko piso soo lao, Emba anja karo epane? leya.
Leyamo dokopa akali dokome isingi lao, Namba Isaraele wambu komau anda pyuo palimi dokona namba iki kyawa lete nyuo epelyo, leya.
Dokopa Dapitimi lao, Doo pipyamo dupwa apa pipyape namba langi, leya.
Namwana yanda singi dupwa pyakao pumisa namwana akali dupwa pyao kumako otami. Dee Solepa banya ikinyingi Jonatanepa opetaeko pyao kumakami, leya.
Dokopa Dapitimi piso soo lao, Emba Sole Jonatanepa kumambi lao apa pipala silisi? leya.
Dokopa akali dokome isingi lao, Namba yuu kyau Gilipoa dokona karapala kandapu dokopa Sole banya kaku dokome yuu dokona pii pyaro baa roya karapya. Dokopa mena oseme ipyuo penge uliuli dupwana yanda pela piso penge akali dupwape dee mena ose matana piso yanda pela penge dupwamepe baa repe kura lapala pyalena piyami. Dokopa baame kapu kyepala namba kandapala kee leya. Nambame isingi lao, Yaa, leyo. Dokopa baame namba apipi lao piso siya. Piso siyamosa cambame baa lamaiyuo, Namba Amaleke akali, leyo. Leyono dokopa Soleme lao, Nakamame namba pyaminyi dokome randa andake nyuo koo keta palyuo repeta kumaro ingilyamo dokona emba dae epapala namba pyao kumaka, leya. 10 Leyamo dokopa baa pao palipala kumwara doko namba soo oteyo dokona namba baa pyao kumakala peyo. Dopa pipala kiŋinya kyawa rarange pee pingi dokope dee kinginya pisingi bange dokope nyepala emba minyuo jela epelyo, leya.
11 Leyamo pii dupwa sepala Dapitimi baa kondome kumuo mona randapala banya komau dupwa minyuo pilyiya dee banya akali dupwa opetae dopako piyami. 12 Dopa pipala nakama Sole dee Jonatanepa dee Isaraele rara Kamongona wambu malu yanda dokona kumuyaminyi dokona mona rando kumanda piso nenge naa nao pao alemanji ingiyami.
13 Dokopa Dapitimi akali parange wai pii minyuo epeyamo doko pcco soo lao, Emba yuu anja rangese? leya.
Leyamopa akali dokome isingi lao, Namba Amaleke rara dokonaŋa. Namba nakamana yuu dakena palyuo karenge, leya.
14 Dokopa Dapitimi baa piso soo lao, Doko dee apa pipyasa paka nao Kamongona rombo palyuo nyisi kiŋi doko pyao kumakamipisi? leya. 15 Dapitimi banya akali dupwana mende kee lao nyepala, Baa pyao kumakana leya. Dokopa akali dokome Amaleke range doko waiya lao minyarapala baa pyao kumakaya. 16 Dokopa Dapitimi Amaleke kumasi siyamo doko kando lao, Emba rangena kopetame pipi dokona emba kumulini. Kamongo dokome kiŋi karena lao rombo palyiyamo doko embame pyao kumakapu lapi kandape dokona emba range kumulini kande leya.
Sole Jonatanepana Lao Dapitimi Kondome Kumuo Ee Lao Kenane Piya
17 Dapitimi kondome kumuo kenane dake Sole dee banya ikinyingi Jonatanepana suu pyao piya. 18 Dee kenane doko Juta wambu dupwa peparae mana lamainya lao lamaiya. Kenane doko Akali Rolae Pingi Dupwana Buku dokona pyasi palamo.
19 Isaraele wambunya yuu kyau dupwana namwana lita akali dupwa kumami.
Dee namwana ami yanda singi akali porai paka nange dupwa isa palimi.
20 Dopa pipya lao yuu Gati dokonape dee yuu taone Asekelone kata barete dupwanape arome pyao laa nalapape.
Dee Pilisitia enda dupwa rae mainyi pyambwa nalapape.
Dee anatu lao suu pyaa nange wambu dupwana wanenge dupwa rae mainya laa nalapape.
 
21 Yuu kyau Gilipoa dokona namwana yanda singi paka nange porai dupwa kumuyami dupwana konambe dupwa mee silyamo.
Dee Solena konambe mamba dokome kisapa naminyi mee silyamo.
Renge dokona apu pipyaepe dupwa yuu Gilipoa kyau dupwana pisa nana dee yuu dokona nenge pulya nana.
22 Jonatanena yanda dokome wambu malu piya.
Dee Sole baame wambu sakame kuma nao
banya wua gela dokome wambu porai dupwa pyao yanda pimwai dupwa pyao kumako piya.
 
23 Wambu peparaeme Sole Jonatanepa kando rae maingi.
Nakamba laparae akali keyange.
Nakamba yuu gii peparae lete karo dokopa range puu minyuo karenge.
Dee nakamba laparae kapa kapa kumambi.
Nakambame mena laene poraipi dee yaka kambe puu lao makando pengenye dupwa isa palyuo nakamba kamame wakase makandapala nakambana nyisu petenge dupwa pingi.
 
24 Isaraele enda dupwa, Solena lao kumanda pisipwape.
Baame nakama komau kone keyange kana malu penge dupwa nyuo jingi.
Dee kana goleme wasisi bange dupwame nakama kalya pyakange.
 
25 Yanda singi porai paka nange dupwa isa palimi.
Nakamba yanda piyami dokona pyao kumuyami.
Yuu kyau dupwana Jonatane kumasi silyamo.
 
26 Nambana yangone Jonatane nambame emba range ingi rando kondalyo. Nambame emba mona wakasa reto pingi dee embame namba mona kulisa wakasa retenge.
Akalimi enda mona retenge dokope daa kamame wakasa ingyuo nambwa mona retenge.
 
27 Yanda singi porai paka nange dupwa yanda dokona isa palyuo oteyami.
Dee yanda pingi bange dupwa kwaeyo mee bange ingyuo peya.