2 TESALONAIKA
Yesu dee eparamo dokona lao soo rola napala pii wakale wakale leyami dokome Elyambu Pingi doko kapa pisa nayami. Lapome Yesu Koraisa doko epo kaeya leyaminyi dokome Pole baame pepa pase lapo dake pii dokona piya. Pole baame nakama rolo lamaiyuo dokopa Yesu dee eparaŋa epana piramo dokopa randa malu pyaka sera, leya. Yulu koo doko ando puu pao paramopa akali koo mende sipurapala Yesunya yulu doko yanda pira, leya.
Poleme banya pii dake yaka larami dupwa lamaiyuo, Yulu koo dopakale doko eparamopape nakama rapa rapa pyuo porayapala karalapape, leya. Nakama Polemoo banya yulu role pyao pingi akali dupwape nakama palyuo karo pilyaminyi doko suu pyao range nenge kanape porayapala nao piso karo pipwape, leya. Yulu keyange doko yaki nyii nao nyuo ketae palyuo pyuo puu pupwape, leya.
Buku Dakena Pii Palamo Dusipa
1. Pii kanda soo leya 1:1-2
2. Nakama apa pyuo piso karo pilyaminyi dokona suu pyao lakandeya 1:3-12
3. Koraisa eparamo dokona lao pii lapo leya dupwa 2:1-17
4. Kurisene yulu dokona poraiyuo pinya lao lao porainyi pyambuya 3:1-15
5. Pii lao oto leya 3:16-18
1
Rakane Anatu Kamongo Yesu Koraisapana Elyambu Pingi wambu yuu Tesalonaika karenge dokona namwa Pole Sailasa Timotimoome pepa pyao jilyamano.
Rakane Anatupa Kamongo Yesu Koraisapana mona keyange palyuo ipingi renge dokope mona kyuu lao singi renge dokope nakama keta palena.
Yesu Epapala Kote Andake Lara Doko
Yangonemoo yuu peparae nakamana lao Anatu sangyu lapenge ingilyamo. Nakamana Yesu kapa ingingi lao suu pingi doko ando andakyapala nakamana wambu yango kando mona retaminyi renge doko ando pelyamoko. Ando pupyamosa namwa Anatu kando kapa sangyu letamano. Dokona lao Anatunya Elyambu Pingi dokona nakamana yulu piminyi dupwana lakandelyamano. Wambu lapome nakama kando randa wakale wakale jiminyipape nakama kaeya nao Anatu kapa ingingi lao suu pyao karaminyi dokome namwa nakama kando rae maiyuo lakandelyamanoko.
Anatunya isingi panda dorena reke lao randa andake nyuo kata wapulyaminyi. Nakama dokona sukusa parami dokopa Anatu rolae pyuo kote lenge doko panara. Anatu baame rolae ingyuo nakama randa jilyaminyi wambu dupwa randa maira. Nakama randa nyilyaminyi dokona Anatumi mandaranyi pyambwara. Kamongo Yesumoo banya aŋala porai dupwamoo yake dokona piso pano eparaminyi dokopa namwa opetae koo soo pisarama. Wambu Anatu see nangepe Kamongo Yesunya waili pii keyange warombo soo pisa nange dupwape Yesu banya aŋala porai dupwa pipya isare kekenge dokome randa maiyala eparami. Anatu see nange wambu dupwa Kamongopa pakao kara narami. Yuu gii pyaka seramo dokopa baa porai wakasa neta renge ingyuo epapala dokopa nakama rekya lanyi nembalu nembo nembara. 10 Baa eparamo dokopa banya wambu baa kapa ingingi lao suu pyao karenge dupwame banya kingi ketae pyambuo lakandarami. Dokopa nakama waili pii langiyama doko soo nyiyami dokona nakama opetae role pyao kararami.
11 Namwana Anatu baame nakama kee lao rombo palyiyamuli pyuo nakama kapa karamili lao yuu peparae ateŋa lakao karamano. Anatu banya porainya renge dokome nakama pyuo au pyuo nyeramopa nakamana kapa ingingi lao suu pingi doko ando kameya inginya lao ateŋa letamano. 12 Dokopa namwana Kamongo Yesunya kingi doko nakama dokona mange karanyi pyambwaraminyipa nakama baame dopako pira. Dokopa namwana Anatu Kamongo Yesu Koraisapana mona keyange palyuo ipyuo pingi dokona ingyuo para.