1 Kamongo Mupwa Andake Wakasa karenge dokome pii repa repa pyuo pii mende kamba langiyamo siyu. Isa jingi pisiki minyasi dokona paleta siyamo kandeyo. 2 Kamongo dokome namba langyuo, Emosa emba aki bange kandelese? leya.

Nambame isingi lao, Isa jingi pisiki minyasi mendena sipyasa kandelyo, leyo.

Dokopa Kamongo dokome namba pii langyuo dopa leya. Isaraele wambu dupwa randa nyerami yuu gii doko epelyamo. Nambame Isaraele range wambu dupwa randa mairu. Dokona nambana suu pingi dee alowa pii nalu nao naro. 3 Yuu gii dokopa enda akalipi dupwa peparae kiŋinya anda pisiraminyi dupwa kenane pyao rae mai napala nakama ee lao kararami. Akali mange pukusi dupwa ranaro kararamo mumiko isu pyuo nyuo nembarami.

4 Nakama kale yukupala selapa. Nakamame bange yano pipyamo petaminyi dupwa nyuo kalyinyi palyuo yuu dokona wambu pendewa dupwa pyuo koo keta piso pilyaminyi. 5 Nakama range lanyi pyano dopa lao karaminyi. Yuu gii poo pyasi doko waiya lao paa nalepe dokopa namwana nenge dapwame minyuo kana nyemanale. Nenge dapwa waiya lao maketena nembamanale misi lenge gii doko anjukupa otara kandapisi lao suu pyao petaminyi. Dokona namwame bange dupwa kana namba ketae palyarama. Palyaramano dokona sikyali angi rolaena pii napala kyambo lao maiyuo wambu dupwa dereke pyuo bange ropo pinya lao kana nyerama. 6 Borete wasingi witi koole dupwa kana andake lao nyemanale. Kimbu suu kana penge dopale dinau nyepala isingi ropo pyalena saka nara akali dupwa namwame ropo pyao nyepala namwana kendemande ingyuo karena lamanale lao karaminyi.

7 Kamongo, Isaraele wambunya Anatu dokome pii kana minyuo lalu lao lao, Nambame Isaraele wambunya yulu koo dupwa kame see napala suu pyaro kararo. 8 Dopa pirono dokopa yuusili andake minyara. Minyaramo dokopa wambu yuu range dupwa peparae koo keta palyuo ee lao pisirami. Yuu dokona yuu muu dupwa peparaena yuusili andake minyara. Ipwa Naele andake ingyuo palipala pyao sepala enakana lyaneya doko suu pyao yuu doko ando ketae papala enakana isa para. 9 Yuu gii mende eparamo dokopa andawai korakama neta karara doko kaepala anda pao alemanji ingyuo yapa sii pyuo yalyinya laro. Korakama neta rao karenge gii dokopa yuu doko iminjo umi ami lena laro. Lao, Namba Kamongo Mupwa Andake Wakasa karenge dokome pii dake lapunu pilyamo, leya. 10 Nambame nakamana kanape ee kanape minyuo nenge yaowa nao mali lyuo pingi dupwa alowa pyuo wambu malu pyuo kumanda piso pingi yuu gii dokore ingyuo retakaro. Dopa pyuo rae maiyuo kenane pingi kenane dupwa alowa pyuo mona rando ee lenge yuu gii inginyi pyambwakaro. Enda akalipa wane mendaki iki doko nembarala piso ee palelyamo lengenyili pyuo larami. Dopa pyuo endangipa rakangepa kyawasi rokapala kumanda piso wapungi bange dupwa nyuo yanenge yambe pyao wapuo petengenyili pyuo pirami. Yuu gii dusipa kwao nyiki nyiki piramoko karo paraminyipa lumwa pira.

11 Yuu gii mende eparamo dokopa yuu dokona lopo sinya laro. Wambu dupwa loparami doko nenge ipwape lopa daa. Kamongo dokona pii doko nakama keta epa narasa doko ipwa nengepe ingyuo nanarami. Namba Kamongo Mupwa Andake Wakasa karenge dokome pii dake lapunu pilyamo. 12 Wambu dupwa yuu muu peparaena Kamongona pii soo nyelana koto paeyaraminyipa kapa pyuo kando nyii narami. 13 Yuu gii dusipana enda mapwae keyange dupwape akali parange porai dupwape peparae ipwa nanome kumapala malawai laramo pao palirami. 14 Dopa piraminyi dokopa wambu lapome yuu Samaria dokona kingimi wasisi anatuŋu lenge dupwa kando pii lalu lao lenge dupwa yuu Dane dokona anatu dokona kingi lao yuu Biasipa dokona anatu dokona kingi lao letamano lao lao karaminyi. Doo lao karaminyi dupwa kumarami doko dee lenge rao sipura narami, Kamongome leya.