EKESETASE
Isipi Yaki Nyuo Peyaminyi Pii Doko
Yaki nyuo peyaminyi doko Ekesetase lenge. Isaraele wambu dupwame yuu Isipi dokona kendemande wambu ingyuo karo Isipi doko yaki nyuo peyaminyi dokona lao Isaraele wambunya arome pii mupwa pyasi palamo. Arome pii dake buku Ekesetase lenge dokona palamo dokona kingi Ekesetase dake yaka lenge dokopa arome pii dakeme dokona lao suu pingi. Buku Ekesetase dake mendaki sipyamopape arome pii liti rema ingyuo pyasi palamo.
1. Rombo 1-18 Ipuru wambu dupwa kendemande yulu piyaminyi doko moko manda rao nyiyamo pao yuu kyau Sainai lenge dokona peyaminyi pii dolapo pyasi palamo.
2. Rombo 19-24 Anatupa Ipuru wambu dupwa pipya yuu kyau Sainai dokona kana minyuo lalu lao leyami arome pii doko palamo. Anatumi Ipuru wambu dupwa reke lao mawa pii dupwa maiya. Maiyamo dusipa Anatu lakandenge mawa pii dusipa pipya wambu yalya kando role pyao randa nyii nao karenge mawa pii dusipa pyasi palamo.
3. Rombo 25-40 Isaraele wambu dupwa Anatu lakandenge anda pyuo bange taepope bange misi anda singi dupwa retarami lao mawa pii dusipa palamo. Purisi dupwana yulu wakale wakale dupwana mawa pii dupwa pipya misi anda lakandenge yulu pii dupwa pyasi palamoko.
Anatumi Isaraele wambu dupwa anjisi kareyaminyipa moko nyiya. Moko nyiyamo dokopa wambu dupwa yuku peyami. Peyaminyi dokopa Anatumi wambu dupwa enenge inginyi pyambuya.
Buku dakena akali Mosese lenge baa mupwa ingilyamo. Anatumi baa Isaraele wambu yuu Isipi karo lanyuo paeyara lao rombo palyiya.
Buku Ekesetase lenge dakena mawa pii akalisa rombo 20 dokona palyapyamo dokona lao wambu yuu muu dupwana kareyami dupwame siyamilyamo.
Anatunya porai renge dokome Mosese keta yulu pipala kiŋi Peraona suu pingi alowa piyamopa baame Ipuru wambu dupwa neta pena leya. Anatunya porai renge dokomeko Ipuru wambu dupwa kyawa minyiyamopa yuu Sainai dokona pena peyami.
1
Isipi Wambu Dupwame Isaraele Wambu Dupwa Randa Andake Maiyami
Jekope yuu Isipi banya wane dupwa pipya peyami. Nakama nakamana enda wanepe dupwa role pyao peyami. Jekopena wanena kingi dupwa dakena palamo. Urupene Simione Lipae Juta Isaka Sepyulane Benjamene Dane Napatalai Gate dee Asamoo peyami. Jekopena wane mandeyamo dupwa para piyamo dupwa peparae nyuo pyaso akalisa yanda ipingi nyepo (70) ingiyamopa Isipi pao kareyami. Dokopa Josepe baa yuu Isipi wambo papala kareya. Josepemoo yangonge dusipape wambu kapa kapa kareyaminyi dupwa peparaepe Isipi karo kumuyami. Dopa piyamopape Isaraele wambu nakamana para piyamo dupwana wane wanakepe mandeyami doko ama malu mee ingyapala porai ingyuo karo yuu doko simbuya.
Dopa pyuo peyamo yuu gii dokopa kiŋi enenge mende Josepe soo gisa nangendeme yuu Isipi dokona rapu piya. Kiŋi dokome Isipi range wambu dupwa lamaiyuo dopa leya. Kandalapape. Isaraele wambu dupwa ama malu mee ingyuo porailyaminyi. 10 Dokona yanda mende sipuro pira ramo dokopa namwana nyisu petenge doko keta nakamba ree maipala namwa pyapala nakamba pasaramiŋi dokona namwame Isaraele wambu dupwa ama kandokondali pyuo rapu pirama. Wambu wai malu mee kisilyamo doko isa pena lao rapu pimanale, lamaiya. 11 Dokopa Isipi akali lapo Isaraele wambu yulu pinya lao rapu piyami dupwame randa wakasa maiyuo yulu andake pinya lao nyuo maiyami. Dopa piyaminyipa Isaraele wambu dupwame Peraona taone andake lamana nenge retenge Pitomo Oramese lenge dolapo pyakamiyami. 12 Isipi wambu dupwame Isaraele wambu dupwa kumuo ree nao otapyali lapala yulu andake maiyaminyipape doko kaepala Isaraele wambu ama malu ando yuu dupwa minyarambu nyinya piya. Dokona lao Isipi wambu dupwame Isaraele wambu kando pakame kumuyami. 13 Pakame kumapala ama randa andake maiyuo karapusi yulu andake maiyami. 14 Isaraele range wambu dupwa randa maiyuo mona kendanyi pyambuo ee yulupi anda pingipi poraiyuo pinya leyami. Dopa pyuo karo nakamame Isaraele wambu dupwa kando sakame kuma nao mee randa maiyuoko pyuo kareyami.
15 Enakana Isipi range kiŋi dokome enda Sipira Puwapa lenge Ipuru enda dupwa wane mandelyaminyi dokopa nyiso mandenge enda dolapo lamaiyuo leya. 16 Nakamba Ipuru enda dupwa wane mandena lao nyiso parambinyi dokopa wane ane ramo doko pyao kumako wanake ramo doko andena kaeyo pipwape, lamaiya. 17 Dopa lamaiyamopape enda dolapome Anatu dokona lao poraiyuo suu pyao pakapala kiŋimi pinya leyamuli pyuo pii napala Ipuru wane dupwa ando karena kaeyambi. 18 Dokopa kiŋi dokome dopa piyambinyi kandapala Sipira Puwapa epena lapala piso soo, Akipamo doo lapu doko pii napala wane dupwa mee ando pena kaeyambisi? leya.
19 Dokopa enda dolapome isingi leyambi. Isaraele enda dupwa Isipi enda dopalende daa. Ipuru enda dupwa awa pyuo waiya lao wane manjo otelyaminyipa nambwa enakana papapu pingi, leyambi. 20 Enda dolapo Anatu baa poraiyuo suu pyao pakayambi dokona baame nakamba keta keyange pyuo rangena wane wai kiso maiya. 21 Maiyamopa Isaraele wambu dupwa konda pyuo manjoko pao porai ingyuo ando kareyami. 22 Dokopa kiŋi Perao dokome mawa pii dake poraiyuo lamaiyuo Ipuru wane nyaŋa manjiraminyi dupwa nyuo ipwa Naelena pyao nembo wanake dupwa andena kaeyo pinya leya.